ໃນຕອນເຊົ້າຂອງວັນທີ 12 ທັນວາ 2022 ນີ້ ສະຫາຍ ພົນຈັດຕະວາ ສີພັນ ພຸດທະວົງ ຄະນະພັກອົງການ ກົມໃຫຍ່ເສນາທິການກອງທັບ ຫົວໜ້າກົມຊາຍແດນ ພ້ອມດ້ວຍພະນັກງານວິຊາການ ໄດ້ລົງເຄື່ອນໄຫວຊຸກຫຍູ້ ການຈັດຕັ້ງປະຕິບັດວຽກງານການຄຸ້ມຄອງຊາຍແດນ ແລະ ບັນດາເກາະດອນຕ່າງໆຕາມແມ່ນໍ້າຂອງ ທີ່ຂື້ນກັບ ກອງບັນຊາການທະຫານແຂວງ ສະຫວັນນະເຂດ ໃນເບື້ອງຕົ້ນສະຫາຍໄດ້ເຂົ້າຮ່ວມຮັບຟັງການລາຍງານສະພາບທີ່ພົ້ນເດັ່ນລຽບຕາມຊາຍແດນໃນໄລຍະຜ່ານມາ ທີ່ຫ້ອງປະຊຸມເຮືອນຮັບຕ້ອນ ກອງບັນຊາການທະຫານແຂວງ ໂດຍໃຫ້ກຽດເຂົ້າຮ່ວມຂອງ ສະຫາຍ ພັນເອກ ຄໍາຜົງ ພັດທະນາ ຄະນະພັກກອງບັນຊາການ ຫົວໜ້າຫ້ອງການເມືອງກອງບັນຊາການທະຫານແຂວງ,ມີສະຫາຍ ພັນໂທ ແກ້ວ ຄໍາບຸນເລີຍ ຮອງຫົວໜ້າຫ້ອງເສນາທິການ ຜູ້ຊີ້ນໍາວຽກງານຊາຍແດນ ແລະ ຫົວໜ້າພະແນກຊາຍແດນ ຕະຫຼອດຮອດພະນັກງານວິຊາການ ຂອງພະແນກຊາຍ ແດນກອງບັນຊາການທະຫານແຂວງເຂົ້າຮ່ວມ.
ໃນການລາຍງານ ສະຫາຍ ພັນໂທ ບຸນໃສ ແກ້ວພິຈິດ ຫົວໜ້າພະແນກຊາຍແດນ ກອງບັນຊາການທະຫານແຂວງໄດ້ຍົກໃຫ້ເຫັນທີ່ຕັ້ງ,ຈຸດພິເສດ,ພາລະບົດບາດ ແລະ ບັນດາສະພາບການຕ່າງໆທີ່ເກີດຂື້ນຢູ່ຕາມຊາຍແດນ, ໄດ້ຈັດຕັ້ງກໍາລັງຮັບຜິດຊອບ ຈໍານວນ 8 ກອງຮ້ອຍ ໂດຍແບ່ງຄວາມຮັບຜິດຊອບເປັນ2ທິດຄື: ທິດຕາເວັນອອກ ແລະ ທິດຕາເວັນຕົກ,ສ່ວນທິດຕາເວັນອອກຕິດກັບຫວຽດນາມ ໄດ້ຈັດຕັ້ງກໍາລັງ3ກອງຮ້ອຍຮັບຜິດຊອບ ແລະ ທິດຕາເວັກຕົກ ຕິດກັບລາຊາອານາຈັກໄທ ໄດ້ຈັດຕັ້ງກໍາລັງ5ກອງຮ້ອຍຮັບຜິດຊອບ ແລະ ມີການປ້ອງກັນເວນຍາມ ພ້ອມທັງສາລະເວຢ່າງເປັນປົກກະຕິ ແລະ ຕະຫຼອດ24ຊົ່ວໂມງ ເພື່ອເຮັດໃຫ້ສະພາບການຢູ່ຕາມຊາຍແດນມີຄວາມສະຫງົບປອດໄພ ໃນໄລຍະຜ່ານມາ ສະພາບການຂອງກຸ່ມຄົນບໍ່ດີບໍລິເວນຊາຍແດນ ເຫັນວ່າຍັງມີການເຄື່ອນໄຫວຢູ່ບາງພື້ນທີ່ເປັນປະຈໍາ ໂດຍສະເພາແມ່ນການລັກລອບຄ້າຂາຍເຖື່ອນ,ສໍາຄັນແມ່ນການລັກລອບຄ້າຂາຍຢາເສບຕິດ,ລົດເຖື່ອນ ແລະ ເຄື່ອງອຸປະໂພກ-ບໍລິໂພກຕ່າງໆ ໃນນີ້ສາມາດຢຶດໄມ້ຂະຍຸງໄດ້1ຄັ້ງ ເທົ່າກັບ4,768ກິໂລ,ຢຶດຢາໄອສໄດ້1ຄັ້ງ ເທົ່າກັບ60ກຼາມ,ຢຶດຢາບ້າໄດ້5ຄັ້ງເທົ່າກັບ3.448.000ເມັດ,ຢຶດໃບກະທ້ອມໄດ້ 137ກິໂລ,ຢຶດລົດຈັກໄດ້4ຄັ້ງ ເທົ່າກັບ5ຄັນ,ຢຶດລົດໃຫຍ່ໄດ້1ຄັ້ງ ເທົ່າກັບ1ຄັນ,ຢຶດປືນຍາວ ຈໍານວນ1ກະບອກ,ຢຶດເຮືອໄດ້7ຄັ້ງ ຈໍານວນ8ລໍາ ພ້ອມເຄື່ອງຈັກ7ເຄື່ອງ,ກັກຄົນໄດ້111ຄົນ,ຍິງ43ຄົນ,ກັກຄົນລາວຄະດີຢາເສບຕິດຈໍານວນ8ຄົນ,ຄະດີລົດເຖື່ອນ1ຄົນ,ຄະດີນໍາຄົນເຂົ້າເມືອງ1ຄົນ,ກັກຄົນໄທຄະດີເຂົ້າເມືອງຜິດກົດໝາຍ ແລະ ນໍາເຂົ້າລົດເຖື່ອນ4ຄົນ,ກັກຄົນຈີນຄະດີລັກລອບເຂົ້າເມືອງຜິດກົດໝາຍ3ຄົນ ແລະ ກັກຄົນລາວລັກລອບອອກ-ເຂົ້າເມືອງບໍ່ຖືກຕ້ອງ92ຄົນ,ຍິງ43ຄົນ. ນອກຈາກນັ້ນສະຫາຍຍັງໄດ້ລາຍງານຂໍ້ສະດວກ,ຂໍ້ຫຍຸ້ງຍາກ ແລະ ທິດທາງແຜນການໃນຕໍ່ໜ້າ ເພື່ອເຮັດໃຫ້ສະພາບຊາຍແດນມີຄວາມສະຫງົບ ແລະ ປອດໄພ.
ໂອກາດດັ່ງກ່າວ ສະຫາຍ ພົນຈັດຕະວາ ສີພັນ ພຸດທະວົງ ຫົວໜ້າກົມຊາຍແດນ ກໍ່ໄດ້ໃຫ້ທິດຊີ້ນໍາໃນການຈັດຕັ້ງປະຕິບັດວຽກງານການຄຸ້ມຄອງຊາຍແດນຢ່າງມີຫຼັກການ ແລະ ມີແບບແຜນ ໂດຍໃຫ້ນໍາໃຊ້ເຄື່ອງມືທີ່ທັນສະໄໝເຂົ້າຊ່ວຍໃນວຽກງານ,ພ້ອມດຽວກັນສະຫາຍກໍ່ໄດ້ເໜັນໜັກເລື່ອງການຄຸ້ມຄອງບັນດາເກາະດອນຕ່າງໆທີ່ມີຢູ່ແລ້ວ ແລະ ເກີດຂື້ນໃໝ່ ຢູ່ພາຍໃນແຂວງ ເພື່ອໃຫ້ປະຊາຊົນໄດ້ໃຊ້ປະໂຫຍດ ໃນການທໍາມາຫາກິນ ແລະ ຍັງໄດ້ໃຫ້ວິຊາການ ທີ່ມາຈາກກົມຊາຍແດນ ຝຶກສອນການເຂົ້ານໍາໃຊ້ແຜນທີ່ ແລະ ການຄິດໄລ່ເນື້ອທີ່,ລວງກວ້າງ,ລວງຍາວຂອງດອນຕ່າງໆດ້ວຍເຄື່ອງມືທີ່ທັນສະໄໝ ແລະ ການລົງມາຊຸກຍູ້ວຽກງານຊາຍແດນຢູ່ແຂວງສະຫວັນນະເຂດ ສະຫາຍ ພ້ອມວິຊາການ ແລະ ພາກສ່ວນກ່ຽວຂອງຍັງໄດ້ລົງໄປຢ້ຽມຢາມບັນດາເກາະດອນ ແລະ ຊາຍແດນນໍາອີກ.
ຂ່າວ-ພາບ:ວິລະພົງ
