ໃນຕອນເຊົ້າວັນທີ 08 ທັນວາ 2022 ທີ່ ຫ້ອງປະຊຸມພະແນກກະສິກໍາ ແລະ ປ່າໄມ້ ແຂວງ ສະຫວັນນະເຂດ ທາງພະແນກສາທາລະນະສຸກແຂວງໄດ້ຈັດກອງປະຊຸມປິດທ້າຍໂຄງການສົ່ງເສີມສຸຂະອະນາໄມແບບຍືນຍົງເພື່ອທຸກຄົນ ຢູ່ 03 ເມືອງເປົ້າໝາຍ ຄື: ເມືອງ ຈໍາພອນ, ພະລານໄຊ ແລະ ເມືອງອາດສະພອນ ຂອງອົງການພັດທະນາຂອງປະເທດເນເທີແລນ( SNV )ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ດຣ ແສງດາວ ສີດາໄລ ຫົວໜ້າພະແນກສາທາລະນະສຸກແຂວງ,ຜູ້ຕາງໜ້າຈາກ ກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ, ຕາງໜ້າ ກົມແຜນການ ແລະ ການຮ່ວມມື ກະຊວງສາທາລະນະສຸກ, ຮອງສູນນໍ້າສະອາດ ແລະ ອະນາໄມສິ່ງແວດລ້ອມ ກະຊວງສາທາລະນະສຸກ ນອກຈາກນີ້ກໍ່ມີ ທ່ານຮອງເຈົ້າເມືອງຈາກ 03 ເມືອງເປົ້າໝາຍ, ຕ່າງໜ້າຈາກ 07 ຫ້ອງການອ້ອມຂ້າງ ຂອງ 03 ເມືອງເປົ້າໝາຍ ກໍ່ໄດ້ເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມແມ່ນເພື່ອນໍາສະເໜີຄວາມຄືບໜ້າຂອງໂຄງການ,ຜົນໄດ້ຮັບ,ສິ່ງທ້າທາຍ, ບົດຮຽນຖອດຖອນໄດ້ ແລະ ຜົນສໍາເລັດອີງຕາມລະດັບຄາດໝາຍຕົວຊີ້ວັດນັບແຕ່ປີ 2019 ຮອດ ປີ 2022.
ໂອກາດນີ້ ທ່ານ ດຣ ແສງດາວ ສີດາໄລ ຫົວໜ້າພະແນກສາທາລະນະສຸກແຂວງ ໄດ້ມີຄໍາເຫັນວ່າ: ກອງປະຊຸມຄັ້ງນີ້ມີຄວາມໝາຍຄວາມສຳຄັນຫລາຍ ເພື່ອຕີລາຄາຄືນຜົນໄດ້ຮັບໃນການຈັດຕັ້ງປະຕິບັດໂຄງການ ມາຮອດເດືອນ 12 ປີ 2022 ຊຶ່ງເປັນປິສຸດທ້າຍຂອງໂຄງການ, ຕີລາຄາການຈັດຕັ້ງປະຕິບັດຄືນ ອີງຕາມບົດບັນທຶກຄວາມເຂົ້າໃຈ ທີ່ໄດ້ເຊັນກັນລະຫວ່າງພະແນກສາທາລະນະສຸກແຂວງ ແລະ ອົງການພັດທະນາຂອງປະເທດເນເທີແລນ (SNV) ໂດຍສົມທຽບໃສ່ເປົ້າໝາຍທີ່ວາງໄວ້ ຢູ່ 3 ເມືອງ ໃຫ້ສາມາດປະກາດບ້ານ ຈຳນວນ 217 ບ້ານ ເປັນບ້ານຢຸດຕິການຖ່າຍຊະຊາຍ ແລະ ສາມາດປະກາດໃຫ້ໂຮງໝໍນ້ອຍ 34 ແຫ່ງ ເປັນແບບຢ່າງດ້ານການປັບປຸງລະບົບນໍ້າ ແລະ ສຸຂາພິບານ ແລະ ຫວັງຢ່າງຍິ່ງວ່າ ຜົນງານທີ່ໄດ້ຮັບ ກໍຄືຂໍ້ຄົງຄ້າງ ຊ່ອງຫວ່າງທີ່ມີຈະເປັນບ່ອນອີງໃຫ້ຄະນະກຳມະການຄຸ້ມຄອງການໂຄງການມີທິດຊີ້ນຳຕື່ມເພື່ອເສີມຂະຫຍາຍທ່າແຮງ ຈຸດດີ ແລະ ຫລຸດຜ່ອນ ເຮັດໃຫ້ປາດສະຈາກ ຈຸດອ່ອນຂໍ້ຄົງ ຄ້າງທີ່ເປັນອຸປະສັກໃນການສືບຕໍ່ດຳເນີນການຈັດຕັ້ງປະຕິບັດໂຄງການດັ່ງກ່າວ
ພາບ-ຂ່າວ: ກຸ່ມວຽກຂ່າວສານເພື່ອສຸຂະພາບ ແລະ ສຸຂະສຶກສາ
