ໃນວັນທີ 22 ພະຈິກ 2022 ນີ້, ທ່ານ ໄຊຊະນະ ໂຄດພູທອນ ກໍາມະການສູນກາງພັກ,ຫົວຫນ້າອົງການໄອຍະການ ປະຊາຊົນ ສູງສຸດ ພ້ອມດ້ວຍຄະນະ ຊີ້ນຳການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດຢູ່ແຂວງຜົ້ງສາລີ. ໂດຍມີທ່ານ ຄຳໄຊ ສູນວີເລີດ ຫົວໜ້າອົງການໄອຍະການແຂວງຜົ້ງສາລີ, ຫົວໜ້າອົງການໄອຍະການປະຊາຊົນເຂດI, ເຂດII ແລະ ພະນັກງານໄອຍະການເຂດປະຈຳເມືອງ, ຫົວໜ້າພະແນກໄອຍະການທະຫານແຂວງເຂົ້າຮ່ວມ.
ທ່ານ ຄຳໄຊ ສູນວີເລີດ ຫົວໜ້າອົງການໄອຍະການແຂວງຜົ້ງສາລີ ໄດ້ລາຍງານສະພາບການຈັດຕັ້ງປະຕິບັດວຽກງານໂດຍຫຍໍ້ ໃນໄລຍະທີ່ມາຜ່ານ ອົງການໄອຍະການປະຊາຊົນທົ່ວແຂວງໄດ້ເອົາໃຈໃສ່ປະຕິບັດພາລະບົດບາດຕິດຕາມກວດກາການປະຕິບັດກົດໝາຍ ໃນນີ້ການແກ້ໄຂ້ຄະດີຂັ້ນຕົ້ນອົງການໄອຍະການປະຊາຊົນແຂວງ ແລະ ເຂດ ມີຄະດີອາຍາຄ້າງມາແຕ່ປີ 2021 ຈໍານວນ 5 ເລື່ອງ,ໄດ້ຮັບໃນ 11 ເດືອນ, ມີ 113 ເລື່ອງ ລວມທັງໜົດ 118 ເລື່ອງ ,ໄດ້ແກ້ໄຂແລ້ວ 114 ເລື່ອງ ຍັງກໍາລັງຄົ້ນຄວ້າ 04 ເລື່ອງ, ມີຄະດີແພ່ງຂັ້ນຕົ້ນ ໄດ້ຮັບໃນ 11 ເດືອນ, ມີ 05 ເລື່ອງໄດ້ຖະແຫຼງສົ່ງສານ 05 ເລື່ອງ, ເຂົ້າຮ່ວມປະຊຸມສານ 5 ຄັ້ງ; ຄະດີແພ່ງຂັ້ນອຸທອນ ເຂົ້າໃໜ່ໃນ 10 ເດືອນ 03 ເລື່ອງ,ໄດ້ຖະແຫຼງສົ່ງສານ 03 ເລື່ອງ, ຈໍານວນຄະດີໄດ້ຖະແຫຼງສົ່ງສານຂັ້ນອູທອນ ຂັ້ນແຂວງທັງໜົດ 03 ເລື່ອງ, ຄະດີທີ່ສານເອົາຕາມການສະເໜີໄອຍະການ 03 ເລື່ອງ, ການຕິດຕາມກວດກາຄ້າຍຄຸມຂັງ-ດັດສ້າງ ໃນ 11 ເດືອນຜ່ານມາ ມີຜູ້ຖືກຫາທັງໝົດ 529 ຄົນ, ຍິງ 37 ຄົນ,ໃນນີ້ມີຜູ້ຖືກຫາກັກຂັງເກີນກໍານົດໝືງປີ 115 ຄົນ, ຍິງ 07 ຄົນ, ທຽບກັບປີ 2021 ເພີ່ມຂຶ້ນ 122 ຄົນ; ຜູ້ຖືກດັດສ້າງທັງໝົດ 150 ຄົນ, ຍິງ 05 ຄົນ; ທຽບກັບປີ2021 ເພີ່ມຂຶ້ນ 35 ຄົນ; ນັກໂທດທັງໝົດ 583 ຄົນ, ຍິງ 34 ຄົນ, ຕ່າງປະເທດ 03 ຄົນ; ຍິງ 01 ຄົນ, ທຽບກັບປີ2021. ເພີ່ມຂຶ້ນ 67 ຄົນ; ໃນນີ້ມີນັກໂທດປະຫານຊີວິດ 130 ຄົນ, ຍິງ 07 ຄົນ; ເພີ່ມ 07 ຄົນ ແລະ ນັກໂທດຕະຫຼອດຊີວິດ 133 ຄົນ, ຍິງ 05 ຄົນ, ເພີ່ມຂຶ້ນ 17 ຄົນ; ການຕິດຕາມກວດກາການປະຕິບັດຄໍາຕັດສີນຂອງສານ ຄະດິອາຍາຄ້າງປີ 2021 ມີ 274 ເລື່ອງ, ເຂົ້າມາໃນ 11 ເດືອນ. ມີ 77 ເລື່ອງ ລວມທັງໜົດ 351 ເລື່ອງ, ປະຕິບັດສໍາເລັດ 25 ເລື່ອງ, ພວມປະຕິບັດ 326 ເລື່ອງ; ຄະດີແພ່ງຄ້າງປີ 2021 ມີ 32 ເລື່ອງ, ເຂົ້າໃໜ່ໃນ11 ເດືອນ, ມີ 05 ເລື່ອງ, ລວມທັງໜົດ 37 ເລື່ອງ, ປະຕິບັດສໍາເລັດ 06 ເລື່ອງ ພວມປະຕິບັດ 31 ເລື່ອງ.
ໂອກາດນີ, ທ່ານ ໄຊຊະນະ ໂຄດພູທອນ ຫົວຫນ້າອົງການໄອຍະການ ປະຊາຊົນ ສູງສຸດ ກໍ່ໄດ້ມີຄຳເຫັນໂອ້ລົມເຊິ່ງກ່ອນອື່ນທ່ານກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະທີ່ທາງອົງການໄອຍະການແຂວງຜົ້ງສາລີຍາດມາໄດ້ ຄຽງຄູ່ກັບຜົນງານດັ່ງກ່າວທ່ານຍັງໄດ້ຊີ້ນຳ ແລະ ຍົກໃຫ້ເຫັນ: ການຕິດຕາມ, ຊຸກຍູ້ການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ – ລັດ, ວາລະແຫ່ງຊາດກ່ຽວກັບການແກ້ໄຂບັນຫາຢາເສບຕິດໃຫ້ໄດ້ຮັບໝາກຜົນສໍາເລັດ, ການພັດທະນາວຽກງານໄອຍະການປະຊາຊົນ, ອົງການໄອຍະການປະຊາຊົນເຂດ, ພະນັກງານໄອຍະການປະຈຳເມືອງ, ໄອຍະການທະຫານ ຈົ່ງສືບຕໍ່ຈັດຕັ້ງປະຕິບັດບັນດານິຕິກໍາ, ຄໍາສັ່ງຂອງຫົວໜ້າອົງການໄອຍະການປະຊາຊົນສູງສຸດ ເຂົ້າສູ່ວຽກງານໄອຍະການປະຊາຊົນ ໃຫ້ໄດ້ຮັບການແກ້ໄຂຢ່າງເຂັ້ມງວດ, ຍົກສູງຄຸນນະພາບໃນການຕິດຕາມກວດກາການປະຕິບັດກົດໝາຍ ແລະ ສັ່ງຟ້ອງຜູ້ຖືກຫາຂຶ້ນສານ, ສ້າງກົນໄກປະສານງານລະຫວ່າງອົງການໄອຍະການປະຊາຊົນແຂວງ ກັບ ອົງການທີ່ກ່ຽວຂ້ອງຂອງແຂວງ ໂດຍສະເພາະ ການແກ້ໄຂບັນຫາຢາເສບຕິດ ເຂົ້າສູ່ວຽກງານໄອຍະການປະຊາຊົນ, ການຕິດຕາມກວດກາທົ່ວໄປ, ການດໍາເນີນຄະດີປົກຄອງ, ການປະຕິບັດຄໍາຕັດສີນຂອງສານ; ສ້າງກົນໄກປະສານງານລະຫວ່າງອົງການໄອຍະການປະຊາຊົນ ກັບ ອົງການປົກຄອງ, ອົງການສືບສວນ-ສອບສວນຂອງເຈົ້າໜ້າທີ່ຕຳຫຼວດ, ພາສີ, ປ່າໄມ້ ແລະ ອົງການສືບສວນ-ສອບສວນອື່ນ ຢ່າງກົມກຽວ, ພ້ອມກັນນີ້ທ່ານໄດ້ຊີ້ນໍາໃນການຈັດຕັ້ງປະຕິບັດ ທີ່ຕິດພັນກັບວຽກງານໃນຂົງເຂດໄອຍະການປະຊາຊົນ ໂດຍຮຽກຮ້ອງໃຫ້ພະນັກງານໄອຍະການ ແລະ ຈົ່ງເຊີດຊູຄວາມຮັບຜິດຊອບຂອງຕົນໃນການເຮັດລ້ອນໜ້າທີ່-ທີ່ພັກ, ລັດ ແລະ ປະຊາຊົນມອບໝາຍໃຫ້; ຮັບໃຊ້ຊາດ, ຮັບໃຊ້ປະຊາຊົນ ດ້ວຍຄວາມບໍລິສຸດໃຈ, ນໍາເອົາເນື້ອໃນຈິດໃຈໃນການຊີ້ນໍາໃນຄັ້ງນີ້ ໄປຈັດຕັ້ງຜັນຂະຫຍາຍເຂົ້າໃນວຽກງານວິຊາສະເພາະຂອງຕົນໃຫ້ມີປະສິດທິພາບ, ພັດທະນາວຽກງານໄອຍະການປະຊາຊົນ ຕາມທິດກ້າວໜ້າ, ທັນສະໄໝ ແລະ ມີວິທະຍາສາດເທື່ອລະກ້າວ.
ພາບ – ຂ່າວ: ແສງຄຳ ສາລີວັນ
