ໃນວັນທີ 28 ກັນຍາ 2026 ທີ່ ໂຮງແຮມ ອາວານີ ລ້ານຊ້າງ, ນະຄອນຫຼວງວຽງຈັນ, ທ່ານ ພົງສະຫວັນ ສີສຸລາດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ເຂົ້າຮ່ວມກອງປະຊຸມປຶກສາຫາລືອາຊຽນ (ASEAN Consultative Meeting) ໂດຍການເປັນປະທານຮ່ວມຂອງ ທ່ານ U Aung Ko, ເອກອັກຄະລັດຖະທູດ ເເຫ່ງ ສສ ມຽນມາ ປະຈຳ ສປປ ລາວ. ເຂົ້າຮ່ວມໃນກອງປະຊຸມຄັ້ງນີ້ ມີບັນດາເອກອັກຄະລັດຖະທູດ, ອຸປະທູດ ແລະ ຜູ້ຕາງຫນ້າຈາກບັນດາສະຖານເອກອັກຄະລັດຖະທູດຂອງປະເທດສະມາຊິກອາຊຽນ ປະຈຳ ສປປ ລາວ.
ກອງປະຊຸມໄດ້ຮັບຟັງການລາຍງານກ່ຽວກັບຜົນຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 59 ແລະ ບັນດາກອງປະຊຸມທີ່ກ່ຽວຂ້ອງ, ຊຶ່ງໄດ້ຈັດຂຶ້ນໃນເດືອນກໍລະກົດ 2026 ແລະ ການກະກຽມດ້ານຕ່າງໆສໍາລັບກອງປະຊຸມສຸດຍອດອາຊຽນ ຄັ້ງທີ 49 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ຈະຈັດຂຶ້ນໃນເດືອນພະຈິກ 2026 ທີ່ ມະນິລາ, ປະເທດຟິລິບປິນ. ນອກນັ້ນ, ກອງປະຊຸມຍັງໄດ້ຮັບຟັງການສະເໜີບົດ ແລະ ແລກປ່ຽນຄຳຄິດຄຳເຫັນ ກ່ຽວກັບວຽກງານດ້ານພະລັງງານຂອງ ສປປ ລາວ ແລະ ການຮ່ວມມືດ້ານພະລັງງານຂອງອາຊຽນເຊັ່ນ: ແຜນຍຸດທະສາດການພັດທະນາພະລັງງານແຫ່ງຊາດ, ສະພາບການດ້ານພະລັງງານ, ຍຸດທະສາດການຄ້າໄຟຟ້າຂ້າມຊາຍແດນຮ່ວມກັບປະເທດເພື່ອນບ້ານ, ເເລະ ສິ່ງທ້າທາຍ ແລະ ທິດທາງໃນອະນາຄົດ, ໂດຍສະເພາະການເຊື່ອມໂຍງລະຫວ່າງພະລັງງານທົດແທນ, ພະລັງງານແສງຕາເວັນຂະໜາດໃຫຍ່ ແລະ ພະລັງງານລົມ ເພື່ອຫຼຸດຜ່ອນການຜະລິດພະລັງງານຕາມລະດູການ, ການສ້າງໂຄງສ້າງດ້ານກົດໝາຍ, ດ້ານເຕັກນິກ ແລະ ດ້ານການດໍາເນີນງານ ແລະ ບຳລຸງຮັກສາ, ການຂະຫຍາຍການເຊື່ອມຕໍ່ຕາຂ່າຍໄຟຟ້າອາຊຽນ, ການປັບປຸງໂຄງສ້າງສາຍສົ່ງໄຟຟ້າພາຍໃນປະເທດໃຫ້ທັນສະໄໝ ຜ່ານການຍົກລະດັບຕາຂ່າຍໄຟຟ້າ, ການຫຼຸດຜ່ອນການສູນເສຍດ້ານເຕັກນິກ ແລະ ການສົ່ງເສີມອຸດສາຫະກຳພາຍໃນ ແລະ ການເຕີບໂຕ ການຄ້າເອເລັກໂຕຣນິກ.
