ວິທະຍຸກະຈ່າຍສຽງຫວຽດນາມ ວັນທີ 20 ກັນຍານີ້ ແມ່ນວັນສະເຫລີມສະຫລອງ 49 ປີແຫ່ງວັນ ສສ ຫວຽດນາມ ເຂົ້າເປັນສະມາຊິກທີ 149 ຂອງອົງການສະຫະປະຊາຊາດ (ສປຊ) ຢ່າງເປັນທາງການ (ວັນທີ 20 ກັນຍາ 1977 – ວັນທີ 20 ກັນຍາ 2026). ວັນນີ້ໄດ້ສ້າງຂີດໝາຍທີ່ສຳຄັນໃນວິວັດການເຊື່ອມໂຍງເຂົ້າກັບສາກົນ ຂອງ ສສ ຫວຽດນາມ. ພາຍຫລັງເຂົ້າເປັນສະມາຊິກອົງການສະຫະປະຊາຊາດ, ສສ ຫວຽດນາມ ສາມາດຍາດແຍ່ງໄດ້ຄວາມເຫັນດີເຫັນພ້ອມ ແລະ ການສະໜັບສະໜູນ ຂອງບັນດາປະເທດສະມາຊິກ ເພື່ອໃຫ້ກອງປະຊຸມສະມັດຊາໃຫຍ່ສະຫະປະຊາຊາດ ຄັ້ງທີ 32 (ປີ 1977) ຮັບຮອງເອົາມະຕິເລກທີ 32/2 ຮຽກຮ້ອງໃຫ້ບັນດາປະເທດ, ອົງການຈັດຕັ້ງສາກົນອຸປະຖຳ, ໜູນຊ່ວຍ ສສ ຫວຽດນາມ ກໍ່ສ້າງປະເທດຄືນໃໝ່ພາຍຫລັງສົງຄາມ. ໃນຊຸມປີຕໍ່ມາບັນດາໂຄງການຮ່ວມມືກັບລະບົບພັດທະນາ ຂອງອົງການສະຫະປະຊາຊາດ ໄດ້ປະກອບສ່ວນເຂົ້າ ໃນການສະໜອງທຶນ, ພູມປັນຍາ, ເຕັກນິກ ແລະ ບົດຮຽນສາກົນ ໃຫ້ແກ່ ວິວັດການພັດທະນາ ເສດຖະກິດ – ສັງຄົມ ຂອງ ສສ ຫວຽດນາມ. ສສ ຫວຽດນາມ ກໍ່ນັບມື້ນັບເຂົ້າຮ່ວມຢ່າງເລິກເຊິ່ງ ແລະ ປະກອບສ່ວນຢ່າງແທດຈິງເຂົ້າໃນວຽກງານລວມ ຂອງອົງການສະຫະປະຊາຊາດ, ນັບແຕ່ການຮັກສາ ສັນຕິພາບ, ການຮັບປະກັນສິດທິມະນຸດ, ການໜູນຊ່ວຍມະນຸດສະທຳ, ການພັດທະນາແບບຍືນຍົງຕະຫລອດຮອດການຮັບມືກັບບັນດາສິ່ງທ້າທາຍທົ່ວໂລກ; ພ້ອມກັນນັ້ນກໍ່ເຂົ້າຮ່ວມວິວັດການສ້າງຂໍ້ກຳນົດກົດລະບຽບ, ມາດຕະຖານ ແລະ ໂຄງການດຳເນີນງານ ຂອງອົງການເທື່ອລະກ້າວ. ເລື່ອງເຂົ້າຮ່ວມທີ່ນັບມື້ນັບຕັ້ງໜ້າ, ເປັນເຈົ້າການຢູ່ອົງການສະຫະປະຊາຊາດ ໄດ້ປະກອບສ່ວນຊ່ວຍໃຫ້ ສສ ຫວຽດນາມ ເຮັດໃຫ້ການພົວພັນຕ່າງປະເທດ ນັບທັງດ້ານຫລາຍຝ່າຍ ແລະ ສອງຝ່າຍເລິກເຊິ່ງຂຶ້ນຕື່ມ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
