ວິທະຍຸກະຈ່າຍສຽງຫວຽດນາມ, ວັນທີ 16 ກັນຍາ, ຢູ່ນະຄອນໜານໜິງ, ແຂວງກວາງຊີ ຂອງສປ ຈີນ, ທ່ານ ຟ້າມຢາຕຸກ ຮອງນາຍົກລັດຖະມົນຕີຜູ້ປະຈຳການລັດຖະບານຫວຽດນາມ ໄດ້ພົບປະເຈລະຈາກັບ ທ່ານ ດິງຊ່ຽວຊຽງ (Ding Xuexiang) ຮອງນາຍົກລັດຖະມົນຕີຜູ້ປະຈຳການລັດຖະບານຈີນ. ທີ່ການພົບປະ ເນື່ອງໃນໂອກາດຮອງນາຍົກລັດຖະມົນຕີ ສອງປະເທດພ້ອມກັນເຂົ້າຮ່ວມງານຕະຫລາດນັດ ຈີນ – ອາຊຽນ (CAEXPO) ແລະ ກອງປະຊຸມສຸດຍອດການຄ້າການລົງທຶນຈີນອາຊຽນ(CABIS) ຄັ້ງທີ 23. ຈາກນັ້ນ ທ່ານ ຟ້າມຢາຕຸກ ຮອງນາຍົກລັດຖະມົນຕີ ຜູ້ປະຈຳການລັດຖະບານຫວຽດນາມ ໄດ້ສະເໜີ ຈີນສ້າງເງື່ອນໄຂ ທີ່ສະດວກກວ່າ ໃຫ້ຜະລິດຕະພັນກະສິກຳຫວຽດນາມ ສົ່ງອອກໄປຍັງ ສປ ຈີນ, ສືບຕໍ່ຮ່ວມມື ຢ່າງເລິກເຊິ່ງກ່ຽວກັບການກັກກັນພະຍາດຢ່າງເລິກເຊິ່ງກວ່າອີກ, ລົງນາມບົດບັນທຶກຊ່ວຍຈຳວ່າດ້ວຍການກຳນົດຫວຽດນາມ ແມ່ນປະເທດເຈົ້າຂອງ ຂອງກິດຈະກຳ “ແບ່ງປັນຕະຫລາດໃຫຍ່-ການສົ່ງອອກຈີນ”ໃນປີ 2027 ໂດຍໄວ. ກ່ຽວຂ້ອງເຖິງການຄ້າ ແລະ ການເຊື່ອມຕໍ່, ຫວຽດນາມ ສະເໜີສ້າງບັນດາເຂດຮ່ວມມືເສດຖະກິດຜ່ານຊາຍແດນໂດຍໄວ, ຜັນຂະຫຍາຍຮູບແບບດ່ານຊາຍແດນອັດສະລິຍະ, ຊຸກຍູ້ການຮ່ວມມືດ້ານວິທະຍາສາດເຕັກໂນໂລຢີ, ບຳລຸງສ້າງແຫລ່ງຊັບພະຍາກອນມະນຸດ, ການຖ່າຍທອດເຕັກໂນໂລຢີ ແລະ ຍູ້ແຮງບັນດາໂຄງການອຸປະຖຳໃຫ້ແກ່ ສສ ຫວຽດນາມ ຢ່າງແຮງກວ່າອີກ. ສ່ວນ ທ່ານ Ding Xuexiang ຮອງນາຍົກລັດຖະມົນຕີຜູ້ປະຈຳການລັດຖະບານຈີນ ຢັ້ງຢືນວ່າ ສປ ຈີນ ພ້ອມແລ້ວ ທີ່ຈະຊຸກຍູ້ບັນດາໂຄງການຮ່ວມມືອັນແທ້ຈິງສືບຕໍ່ບັນລຸຄວາມຄືບໜ້າ, ຍູ້ແຮງການສ້າງບັນດາເສັ້ນທາງລົດໄຟບັນລຸມາດຖານເຊື່ອມຈອດ ສອງປະເທດ ແລະ ເຊື່ອມຈອດກັບເສັ້ນທາງລົດໄຟຈີນ-ເອີຣົບ ກຽມພ້ອມກັບ ສສ ຫວຽດນາມ ສ້າງລະບົບສະໜອງ, ລະບົບຜະລິດເປັນປົກກະຕິ, ຍູ້ແຮງການຜັນຂະຫຍາຍຮູບແບບດ່ານຊາຍແດນອັດສະລິຍະ ແລະ ເຂດຮ່ວມມືເສດຖະກິດຜ່ານຊາຍແດນ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
