ຢູ່ບໍລິເວນຈຸດບັນຈົບກັນຂອງແມ່ນ້ຳຂອງ ແລະ ແມ່ນ້ຳຄານ, ແສງອາລຸນສາດສ່ອງເຂົ້າສູ່ບໍລິເວນໂຮງຮຽນມັດທະຍົມສັນຕິພາບ ແຂວງຫຼວງພະບາງ ສປປ ລາວ. ກ່ອນເປີດສົກຮຽນໃໝ່, ຫໍສະໝຸດກາກບອນເປັນສູນ “ໄຟຟ້າສີຂຽວ TO” ຫໍສະໝຸດກາກບອນເປັນສູນແບບບູລະນາການໂຊລາເຊວ, ການກັກເກັບພະລັງງານ ແລະ ການສາກໄຟ ແຫ່ງທຳອິດຂອງ ສປປ ລາວ ທີ່ ສປ ຈີນ ສະໜັບສະໜູນການກໍ່ສ້າງ ໄດ້ເປີດນຳໃຊ້ຢ່າງເປັນທາງການ ໃນວັນທີ 29 ສິງຫາຜ່ານມາ ທີ່ແຂວງຫຼວງພະບາງ. ແສງແດດ, ກິ່ນອາຍແຫ່ງປຶ້ມ ແລະ ໄຟຟ້າສີຂຽວໄດ້ມາພົບກັນ, ເພີ່ມໂຄງການສະຫວັດດີການປະຊາຊົນທີ່ “ນ້ອຍແຕ່ງົດງາມ” ອີກໜຶ່ງໂຄງການ ພາຍໃຕ້ຂອບການຮ່ວມມື “ໜຶ່ງແລວ ໜຶ່ງເສັ້ນທາງ” ລະຫວ່າງ ຈີນ-ລາວ.
“ຂອງຂວັນສີຂຽວ” ທີ່ເດີນທາງມາແຕ່ໄກຈາກແຂວງເຈີ້ຈ່ຽງນີ້ ມີຄວາມໝາຍສອດຄ່ອງກັບຍຸກສະໄໝຢ່າງຊັດເຈນ. ປີນີ້ແມ່ນວາລະຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ຈີນ-ລາວ ແລະ ເປັນ “ປີແຫ່ງມິດຕະພາບຈີນ-ລາວ”. ໃນເດືອນມິຖຸນາຜ່ານມາ, ສະຫາຍ ທອງລຸນ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ, ໄດ້ເດີນທາງຢ້ຽມຢາມ ສປ ຈີນ ໂດຍເລືອກແຂວງເຈີ້ຈ່ຽງ ເປັນຈຸດໝາຍທຳອິດ; ສອງຝ່າຍໄດ້ບັນລຸຄວາມເຫັນຮ່ວມກັນຫຼາຍປະການ ກ່ຽວກັບການລົງເລິກການສ້າງປະຊາຄົມຮ່ວມຊະຕາກຳ ຈີນ-ລາວ; ສອງເດືອນຕໍ່ມາ, ຄວາມເຫັນຮ່ວມດັ່ງກ່າວໄດ້ກາຍເປັນຫໍສະໝຸດແຫ່ງໜຶ່ງ ທີ່ມາປັກຮາກຢູ່ແຄມແມ່ນ້ຳຂອງ.
ເມື່ອກ້າວເຂົ້າໄປໃນຫໍສະໝຸດ, ຄວາມຮ້ອນອົບເອົ້າ ຢູ່ພາຍນອກຄືກັບຖືກກັ້ນໄວ້ຫຼັງປະຕູ, ເຄື່ອງປັບອາກາດສົ່ງຄວາມເຢັນສະບາຍ, ພາຍໃນມີຄອມພິວເຕີ, ໂທລະພາບ, ຕູ້ປຶ້ມ ແລະ ປຶ້ມສອງພາສາ ຈີນ-ລາວ ຈັດວາງຢ່າງເປັນລະບຽບ, ນັກຮຽນສາມາດອ່ານປຶ້ມຢູ່ທີ່ນີ້, ຄົ້ນຫາຂໍ້ມູນຜ່ານຄັງປຶ້ມດິຈິຕອນ ແລະ ຮຽນຮູ້ດ້ວຍຕົນເອງໃນສະພາບແວດລ້ອມທີ່ງຽບສະຫງົບ ແລະ ສະດວກສະບາຍ.
“ຫຼັງຈາກ ທາງລົດໄຟຈີນ-ລາວ ເປີດນຳໃຊ້, ພວກເຮົາໄດ້ສຳຜັດກັບສິ່ງໃໝ່ໆຫຼາຍຢ່າງ, ແນວຄິດທີ່ເມື່ອກ່ອນບໍ່ຄ່ອຍໄດ້ຍິນ ເຊັ່ນ: ປັນຍາປະດິດ ແລະ ເສດຖະກິດດິຈິຕອນ ເຮັດໃຫ້ພວກເຮົາຮູ້ວ່າໂລກພາຍນອກນັ້ນກວ້າງໃຫຍ່ຫຼາຍ, ພວກເຮົາຍັງເປັນນັກຮຽນ ຈຶ່ງບໍ່ມີໂອກາດເດີນທາງອອກໄປຂ້າງນອ, ການອ່ານປຶ້ມຈຶ່ງກາຍເປັນຊ່ອງທາງສຳຄັນ ສຳລັບພວກເຮົາໃນການເປີດກວ້າງສາຍຕາ ແລະ ເພີ່ມພູນຄວາມຮູ້”, ນັກຮຽນ ມັດທະຍົມຕອນປາຍ ຂອງໂຮງຮຽນມັດທະຍົມສັນຕິພາບ ແຂວງຫຼວງພະບາງ ກ່າວ.
ແຕ່ຊັບພະຍາກອນປຶ້ມອ່ານນອກຫຼັກສູດໃນທ້ອງຖິ່ນຍັງມີຈຳກັດ, ເພື່ອຫາປຶ້ມອ່ານເພີ່ມເຕີມ, ເດັກນ້ອຍຫຼາຍຄັ້ງຕ້ອງນັ່ງລົດໄຟໄປນະຄອນຫຼວງວຽງຈັນ ທີ່ຢູ່ຫ່າງອອກໄປກວ່າ 200 ກິໂລແມັດ, ໂດຍໃຊ້ເວລາປະມານ 2 ຊົ່ວໂມງເຄິ່ງ. “ຕອນນີ້ ອອກຈາກຫ້ອງຮຽນກໍເຖິງຫໍສະໝຸດເລີຍ, ທີ່ນີ້ມີປຶ້ມຫຼາຍເຫຼັ້ມທີ່ຂ້ອຍຢາກອ່ານ ແລະ ຍັງມີເຄື່ອງປັບອາກາດ, ຮູ້ສຶກວ່າສະດວກ ແລະ ສະບາຍຫຼາຍ.” ທ້າວ ຈະເລີນ ກ່າວ.
ຕາມທັດສະນະຂອງທ່ານ ບຸນຄຳ ວັນສີ ຜູ້ອຳນວຍການໂຮງຮຽນ, ຫໍສະໝຸດແຫ່ງນີ້ ບໍ່ພຽງແຕ່ເປັນຫ້ອງອ່ານປຶ້ມ, ແຕ່ຍັງເປັນຊ່ອງທາງໃໝ່ທີ່ເຊື່ອມຕໍ່ກັບໂລກພາຍນອກ. ທ່ານກ່າວວ່າ: “ຫຼັງຈາກທາງລົດໄຟຈີນ-ລາວ, ນີ້ແມ່ນອີກໜຶ່ງຊ່ອງທາງທີ່ເຊື່ອມອອກສູ່ພາຍນອກ, ເປັນເສັ້ນທາງໃຫ້ນັກຮຽນໄດ້ຮູ້ຈັກຄວາມຮູ້ ແລະ ແນວຄິດໃໝ່ໆຂອງໂລກ. ໂຮງຮຽນຈະນຳໃຊ້ ແລະ ບໍລິຫານຫໍສະໝຸດໃຫ້ດີ, ເພື່ອໃຫ້ກາຍເປັນສ່ວນໜຶ່ງຂອງການຮຽນ-ການສອນປະຈຳວັນຢ່າງແທ້ຈິງ, ສ້າງໂອກາດດ້ານການຮຽນຮູ້ ແລະ ການເຕີບໂຕໃຫ້ນັກຮຽນຫຼາຍຂຶ້ນ ແລະ ສ້າງຄຸນຄ່າສູງສຸດໃຫ້ແກ່ຫໍສະໝຸດ.”
ສປປ ລາວ ມີຊັບພະຍາກອນນ້ຳທີ່ອຸດົມສົມບູນ ແລະ ໄຟຟ້າພະລັງງານນ້ຳແມ່ນໜຶ່ງໃນແຫຼ່ງພະລັງງານຫຼັກຂອງທ້ອງຖິ່ນ, ເນື່ອງຈາກປະລິມານນ້ຳປ່ຽນແປງຕາມລະດູການ, ໃນລະດູແລ້ງຈຶ່ງມີແຮງກົດດັນຕໍ່ການສະໜອງໄຟຟ້າສູງ. ໃນຂະນະດຽວກັນ, ຫຼວງພະບາງຕັ້ງຢູ່ພາກເໜືອຂອງລາວ, ໂຄງສ້າງພື້ນຖານຂອງຕາຂ່າຍໄຟຟ້າໃນບາງພື້ນທີ່ຍັງມີຂໍ້ຈຳກັດ, ການຮັບປະກັນໄຟຟ້າໃຫ້ໂຮງຮຽນຈຶ່ງຍັງປະເຊີນກັບຄວາມທ້າທາຍບາງປະການ.
ເມື່ອຕາຂ່າຍໄຟຟ້າຂະໜາດໃຫຍ່ຍັງບໍ່ສາມາດຍົກລະດັບໄດ້ຢ່າງຄົບຖ້ວນໃນໄລຍະສັ້ນ, ກໍເລືອກໃຊ້ແນວທາງຕາຂ່າຍໄຟຟ້າຂະໜາດນ້ອຍ. ທີມງານສາທາລະນະປະໂຫຍດ “ໄຟຟ້າສີຂຽວ TO” ຂອງບໍລິສັດໄຟຟ້າເຈີ້ຈ່ຽງ ຈຳກັດ ສັງກັດບໍລິສັດຕາຂ່າຍໄຟຟ້າແຫ່ງລັດຈີນ ຈຶ່ງຕັດສິນໃຈນຳໃຊ້ເຕັກໂນໂລຊີໄມໂຄຣກຣິດແບບບູລະນາການໂຊລາເຊວ-ກັກເກັບພະລັງງານ-ສາກໄຟ ທີ່ຈີນໄດ້ພັດທະນາຈົນສຸກງອມ.
ດ້ວຍເຫດນີ້, ຫໍສະໝຸດ “ກາກບອນເປັນສູນ” ແບບບູລະນາການໂຊລາເຊວ-ກັກເກັບພະລັງງານ-ສາກໄຟ ແຫ່ງທຳອິດຂອງລາວຈຶ່ງເກີດຂຶ້ນ; ໃນຕອນກາງເວັນ, ແຜງໂຊລາເຊວເທິງຫຼັງຄາຮັບແສງຕາເວັນ ແລະ ຜະລິດໄຟຟ້າ, ໄຟຟ້າທີ່ໃຊ້ບໍ່ໝົດຈະຖືກກັກເກັບໄວ້ໃນລະບົບກັກເກັບພະລັງງານ, ເມື່ອຮອດຕອນກາງຄືນ ພະລັງງານທີ່ກັກເກັບໄວ້ຈະຖືກປ່ອຍອອກມາໃຊ້ ເພື່ອຮັບປະກັນການສະໜອງພະລັງງານຢ່າງໝັ້ນຄົງໃຫ້ຫໍສະໝຸດ.
ພ້ອມກັນນັ້ນ, ຫໍສະໝຸດໄດ້ຖືກຜະລິດເປັນຫ້ອງສຳເລັດຮູບຢູ່ໂຮງງານໃນແຂວງເຈີ້ຈ່ຽງ, ແລ້ວນຳມາປະກອບຢູ່ລາວ ໂດຍໃຊ້ເວລາກໍ່ສ້າງພຽງ 4 ວັນ, ຊ່ວຍຫຼຸດຜ່ອນການປ່ອຍອາຍກາກບອນໄດອອກໄຊໃນຂະບວນການຜະລິດ ແລະ ປະກອບຕິດຕັ້ງໄດ້ຫຼາຍຂຶ້ນ.
ໃນວັນດຽວກັນ, “ຫ້ອງຮຽນອອນລາຍ” ກໍໄດ້ເປີດຂຶ້ນພ້ອມກັບຫໍສະໝຸດ, ເມື່ອຈໍຂະໜາດໃຫຍ່ສະຫວ່າງຂຶ້ນ, ຝັ່ງໜຶ່ງແມ່ນໂຮງຮຽນມັດທະຍົມສັນຕິພາບ ແຂວງຫຼວງພະບາງ, ອີກຝັ່ງໜຶ່ງ ແມ່ນໂຮງຮຽນມັດທະຍົມຕອນຕົ້ນກາວສຽວ ເຂດຊຽວຊານ ແຂວງເຈີ້ຈ່ຽງ; ເດັກນ້ອຍຈາກສອງພື້ນທີ່ໄດ້ “ພົບໜ້າ” ກັນຢ່າງເປັນທາງການ ໂດຍຂ້າມນ້ຳ ຂ້າມພູຜາ ເປັນໄລຍະທາງ 2,500 ກິໂລແມັດ.
ບັນດາຄູອາຈານຈາກຈີນໄດ້ພານັກຮຽນລາວ ຜ່ານໜ້າຈໍ ໄປສຳຜັດກັບວັດທະນະທຳຈີນ ແລະ ໂລກວິທະຍາສາດອັນໜ້າອັດສະຈັນ. ທ່ານ ໄລ ຫານປິນ, ວິສະວະກອນກາກບອນເປັນສູນ, ໄດ້ສອນບົດຮຽນເຜີຍແຜ່ຄວາມຮູ້ດ້ານລະບົບໄຟຟ້າຮູບແບບໃໝ່ໃຫ້ເດັກນ້ອຍຜ່ານອອນລາຍຢ່າງມີຊີວິດຊີວາ, ບັນດາອາສາສະໝັກຈາກບໍລິສັດໄຟຟ້າເຈີ້ຈ່ຽງ ຈຳກັດ ສັງກັດບໍລິສັດຕາຂ່າຍໄຟຟ້າແຫ່ງລັດຈີນ ໄດ້ປະກອບໝາຫຸ່ນຍົນຮ່ວມກັບເດັກນ້ອຍ, ເມື່ອເຫັນຫຸ່ນຍົນອັດສະລິຍະເດີນຢູ່ເທິງສະໜາມຫຍ້າ, ທຸກຄົນຕ່າງຮູ້ສຶກຕື່ນເຕັ້ນຫຼາຍ; ນັກຮຽນລາວກໍໄດ້ນຳເອົາເລື່ອງລາວທາງວັດທະນະທຳຂອງຕົນມາແບ່ງປັນ ແລະ ແນະນຳບຸນປີໃໝ່ລາວທີ່ມີປະເພນີຫົດນ້ຳໃຫ້ນັກຮຽນຈີນ. ເຖິງວ່າພາສາຈະຕ່າງກັນ ແລະ ໄລຍະທາງຈະຫ່າງໄກ, ແຕ່ໜ້າຈໍໜຶ່ງກໍເຮັດໃຫ້ເດັກນ້ອຍສອງພື້ນທີ່ມີຫ້ອງຮຽນຮ່ວມກັນ ແລະ ມີຫົວຂໍ້ສົນທະນາຮ່ວມກັນ.
ຈຸດທີ່ໄດ້ຮັບຄວາມນິຍົມຫຼາຍທີ່ສຸດ ແມ່ນການເຜີຍແຜ່ຄວາມຮູ້ກ່ຽວກັບເປົ້າໝາຍການພັດທະນາທີ່ຍືນຍົງຂອງສະຫະປະຊາຊາດ ທີ່ຢູ່ດ້ານຂວາຂອງຫໍສະໝຸດ, ນັກຮຽນພາກັນຖີບລົດຖີບຜະລິດໄຟຟ້າຢ່າງຄຶກຄັກ ແລະ ສົ່ງສຽງເຊຍເປັນໄລຍະ, ເມື່ອເຫັນແຜງໂຊລາເຊວ ແລະ ມ້ານັ່ງໂຊລາເຊວ, ນັກຮຽນພາກັນເວົ້າວ່າ: “ທີ່ແທ້ ນີ້ເອງຄືຄວາມເປັນສີຂຽວ ກາກບອນຕ່ຳ ແລະ ການພັດທະນາທີ່ຍືນຍົງ!”
“ພວກເຮົາໄດ້ສ້າງສັນຮູບແບບການໃຫ້ບໍລິການເພື່ອສາທາລະນະປະໂຫຍດ ‘ພະລັງງານໃໝ່ + ການສຶກສາແນວໃໝ່’, ໂດຍນຳພະລັງງານສີຂຽວມາສະໜັບສະໜູນການສຶກສາທາງໄກ ແລະ ໃຊ້ການຮຽນຮູ້ແບບປະຕິສຳພັນເພື່ອຖ່າຍທອດແນວຄິດສີຂຽວ ແລະ ກາກບອນຕ່ຳ.” ຊຸນ ຢວນ, ອາສາສະໝັກຂອງທີມງານສາທາລະນະປະໂຫຍດ “ໄຟຟ້າສີຂຽວ TO” ຂອງບໍລິສັດໄຟຟ້າເຈີ້ຈ່ຽງ ສັງກັດບໍລິສັດຕາຂ່າຍໄຟຟ້າແຫ່ງລັດຈີນ ກ່າວວ່າ: “ໃນອະນາຄົດ, ຫໍສະໝຸດຈະຮ່ວມມືກັບສະມາຄົມເຜີຍແຜ່ວິທະຍາສາດແຂວງເຈີ້ຈ່ຽງ, ສູນບໍລິການອາສາສະໝັກ ‘ອາປິນ’ ຂອງບໍລິສັດສະໜອງໄຟຟ້ານະຄອນຫາງໂຈ່ວ ສັງກັດບໍລິສັດຕາຂ່າຍໄຟຟ້າແຫ່ງລັດຈີນ, ຫໍສະໝຸດຊຽວຊານ ນະຄອນຫາງໂຈ່ວ ແລະ ໜ່ວຍງານອື່ນໆ ເພື່ອສ້າງເຄືອຂ່າຍຫ້ອງຮຽນອອນລາຍໃຫ້ເດັກນ້ອຍຈີນ ແລະ ລາວ, ຄອບຄຸມ 5 ຂົງເຂດ ເຊັ່ນ: ວິທະຍາສາດທຳມະຊາດ ແລະ ວັດທະນະທຳດັ້ງເດີມ, ລວມທັງໝົດ 21 ຊົ່ວໂມງຮຽນ.”
ຈາກການອ່ານປຶ້ມໄປສູ່ການຮຽນ, ຈາກການແລກປ່ຽນອອນລາຍໄປສູ່ການລົງມືປະຕິບັດ, “ໜຶ່ງຫໍສະໝຸດ, ໜຶ່ງຫ້ອງຮຽນ, ໜຶ່ງຖານການຮຽນຮູ້” ໄດ້ເຊື່ອມໂຍງເຂົ້າຫາກັນ, ພະລັງງານສີຂຽວຢູ່ທີ່ນີ້ບໍ່ແມ່ນພຽງຊຸດອຸປະກອນອີກຕໍ່ໄປ, ແຕ່ໄດ້ກາຍເປັນສ່ວນໜຶ່ງຂອງຊີວິດປະຈຳວັນໃນໂຮງຮຽນ ທີ່ສາມາດອ່ານ, ແລກປ່ຽນ ແລະ ລົງມືປະຕິບັດໄດ້. ແນວຄິດຄວາມຮ່ວມມື “ພະລັງງານໃໝ່ + ການສຶກສາແນວໃໝ່” ກໍກຳລັງເຂົ້າໃກ້ນັກຮຽນຫຼາຍຂຶ້ນ ຜ່ານການອ່ານ ແລະ ການປະຕິສຳພັນແຕ່ລະຄັ້ງ.
“ນີ້ແມ່ນການປະຕິບັດສີຂຽວຄັ້ງໜຶ່ງທີ່ຂ້າມພູຜາ ແລະ ທະເລ.” ທ່ານ ຄຳຫຼ້າ ລຽນປະດິດ, ຮອງເລຂາພັກແຂວງຫຼວງພະບາງ ກ່າວວ່າ: “ໂຄງການນີ້ ບໍ່ພຽງແຕ່ນຳເອົາເຕັກໂນໂລຊີຕາຂ່າຍໄຟຟ້າທີ່ກ້າວໜ້າມາສູ່ລາວ, ແຕ່ຍັງນຳເອົາແນວຄິດການພັດທະນາ “ພູຂຽວ ນ້ຳໃສ ກໍຄືພູຄຳພູເງິນ” ແລະ ອຸດົມການອັນດີງາມໃນການຮ່ວມກັນສ້າງໂລກທີ່ສະອາດ ແລະ ສວຍງາມ ມາຫວ່ານລົງໃນຜືນແຜ່ນດິນແຫ່ງນີ້.”
ຂຽນໂດຍ: ຫຼົວ ເຈິ້ນ, ຈູ ສຽວເຫວີ່ຍ）
