ວິທະຍຸ-ໂທລະພາບສູນກາງຈີນ, ອົງການສຶກສາວິທະຍາສາດ ແລະ ວັດທະນະທຳແຫ່ງສະຫະປະຊາຊາດ ຫລື UNESCO ທີ່ມີສຳນັກງານໃຫຍ່ຕັ້ງຢູ່ນະຄອນຫລວງປາຣີ ປະເທດຝຣັ່ງ ໄດ້ປະກາດໃນວັນທີ 5 ສິງຫານີ້ວ່າ: ຕາມການສະເໜີ ຂອງຄະນະກຳມະການຮ່ວມ ວ່າດ້ວຍນະຄອນຫລວງແຫ່ງສະຖາປັດຕະຍະກຳໂລກ, ປັກກິ່ງ ໄດ້ຮັບການຄັດເລືອກເປັນ “ນະຄອນຫລວງ ແຫ່ງສະຖາປັດຕະຍະກຳໂລກ” ຂອງອົງການ UNESCO ແລະ ສະມາຄົມສະຖາປະນິກສາກົນ ປະຈຳປີ 2029. ໃນບົດຂ່າວທີ່ອົງການ UNESCO ປະກາດຢູ່ເວັບໄຊທາງການຂອງຕົນ ໄດ້ລະບຸວ່າ: ຫລຽວເບິ່ງໄປຂ້າງໜ້າເຖິງນະຄອນຫລວງປັກກິ່ງໃນປີ 2029 ມໍລະດົກທາງສະຖາປັດຕະຍາກຳທີ່ໂດດເດັ່ນ, ຂະບວນການຫັນປ່ຽນເປັນຕົວເມືອງແບບທັນສະໄໝຢ່າງຟົດຟື້ນ ແລະ ວິໄສທັດການພັດທະນາທີ່ມຸ່ງໜ້າສູ່ອະນາຄົດ, ແນ່ນອນວ່າ ຈະເປັນການຊຸກຍູ້ໃຫ້ມີການເຈລະຈາສາກົນຮອບໃໝ່ ເພື່ອລົງເລິກຄົ້ນຫາບົດບາດອັນສຳຄັນຂອງສະຖາປັດຕະຍະກຳ ໃນການຍົກສູງລະດັບຄຸນນະພາບຊີວິດ ຂອງປະຊາຊົນ ແລະ ການປົກປັກຮັກສາ ມໍລະດົກຮ່ວມ ຂອງມວນມະນຸດໄວ້ໃຫ້ຄົນຮຸ່ນຫລັງ. ກ່ອນໜ້ານີ້, ນະຄອນຣີໂອ ເດ ຈາເນໂຣ, ໂຄເປເຮເກັນ ແລະ ບາເຊໂລນາ ເຄີຍໄດ້ຮັບການຂະໜານນາມວ່າເປັນ “ນະຄອນຫລວງ ແຫ່ງສະຖາປັດຕະຍະກຳໂລກ”.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
