ວິທະຍຸ-ໂທລະພາບສູນກາງຈີນ, ອຸດສາຫະກຳການຜະລິດຂອງ ສປ ຈີນ ໄດ້ສ້າງຄວາມປະທັບໃຈ ອີກຄັ້ງໃໝ່ໃຫ້ແກ່ຕະຫລາດໂລກ, ຄັ້ງນີ້ແມ່ນກ່ຽວກັບ “3 ຜະລິດຕະພັນໃໝ່ຫລ້າສຸດ” ຈາກການຜະລິດເຄື່ອງນຸ່ງຫົ່ມ, ເຟີນີເຈີ ແລະ ເຄື່ອງໃຊ້ໄຟຟ້າ, ຮອດການຫັນປ່ຽນສູ່ພະລັງງານສີຂຽວ ຄື: ລົດພະລັງງານໃໝ່, ໝໍ້ໄຟ ຫລື ແບັດເຕີຣີລີທຽມ ແລະ ຜະລິດຕະພັນພະລັງງານແສງຕາເວັນ, ຈົນຮອດ ປັນຍາປະດິດ, ຫຸ່ນຍົນ ແລະ ຢາປະດິດສ້າງໃໝ່, ປະສິດທິພາບ ຂອງການພັດທະນາອຸດສາຫະກຳການຜະລິດຢ່າງມີຄຸນນະພາບສູງ ຂອງ ສປ ຈີນ ແມ່ນໜ້າອັດສະຈັນຫລາຍ. ຜົນການສຳຫລວດ ຄວາມຄິດເຫັນຊາວເນັດທົ່ວໂລກ ທີ່ຈັດໂດຍ CGTN ຂອງວິທະຍຸໂທລະພາບສູນກາງຈີນ ຫລື CMG ສະແດງໃຫ້ເຫັນວ່າ: ຜູ້ຕອບແບບສອບຖາມ 93,1% ເຫັນວ່າ “3 ຜະລິດຕະພັນໃໝ່ຫລ້າສຸດ” ຂອງ ສປ ຈີນໄດ້ຮັບຄວາມສົນໃຈຈາກໂລກໄດ້ສະແດງໃຫ້ເຫັນເຖິງອຸດສາຫະກຳການຜະລິດ ຂອງ ສປ ຈີນ ເລີ່ມສະໜອງເຕັກໂນໂລຊີທີ່ຄົ້ນຄວ້າດ້ວຍຕົນເອງ, ລະບົບອັດສະລິຍະ ແລະ ວິທີແກ້ໄຂບັນຫາໃຫ້ແກ່ຕະຫລາດສາກົນ ແລະ ຈະສ້າງຜົນປະໂຫຍດຫລາຍກວ່າເກົ່າໃນອະນາຄົດ. ໃນຈຳນວນ 87,7% ເຫັນວ່າ “3 ຜະລິດຕະພັນໃໝ່ຫລ້າສຸດ” ໄດ້ສະແດງໃຫ້ເຫັນອີກຄັ້ງ ກ່ຽວກັບຄວາມສາມາດດ້ານການຜະລິດທີ່ເຂັ້ມແຂງ ຂອງ ສປ ຈີນ; 90,5% ເຫັນວ່າຜົນສຳເລັດດ້ານການປະດິດສ້າງໃໝ່ ກ່ຽວກັບ “3 ຜະລິດຕະພັນໃໝ່ຫລ້າສຸດ” ຂອງ ສປ ຈີນ ສາມາດເຮັດໃຫ້ປະເທດພວມພັດທະນາຫລາຍກວ່າເກົ່າຫັນເປັນແບບອັດສະລິຍະ ແລະ ອັດຕະໂນມັດ ດ້ວຍຕົ້ນທຶນທີ່ສາມາດເຂົ້າເຖິງໄດ້, ເຊິ່ງໄດ້ຢືນຢັນອີກຄັ້ງໜຶ່ງວ່າ: ການເປີດປະຕູ ແລະ ກວມລວມໄດ້ຊຸກຍູ້ໃຫ້ຄວາມສາມາດດ້ານການປະດິດສ້າງດ້ວຍຕົນເອງຂອງ ສ ປ ຈີນ ຍົກສູງຂຶ້ນຢ່າງວ່ອງໄວ ແລະ ຜູ້ຕອບແບບສອບຖາມ 89,5% ເຫັນວ່າ “3 ຜະລິດຕະພັນໃໝ່ຫລ້າສຸດ” ຂອງ ສປ ຈີນ ຈະນຳເອົາໂອກາດໃໝ່ມາໃຫ້ແກ່ການປະດິດສ້າງ ແລະ ການຍົກລະດັບຂຶ້ນ ຂອງອຸດສາຫະກຳການຜະລິດທົ່ວໂລກ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
