ໃນວັນທີ 30 ມີຖຸນາ 2026 ຄະນະສະເພາະກິດ ປກສ ແຂວງຫຼວງນໍ້າທາ ປະສານສົມທົບກັບ ກອງບັນຊາການ ປກສ ເຂດບໍ່ເຕ່ນ ໄດ້ເຂົ້າມ້າງກຸ່ມແກ້ງສໍ້ໂກງຊັບທາງອອນລາຍ ແລະ ການສື່ສານ (ສະແກມເມີ) ຢູ່ຕຶກສະພາການຄ້າສາກົນ ຊັ້ນ 10 ເຂດເສດຖະກິດພິເສດບໍ່ເຕ່ນແດນງາມ, ສາມາດກັກຕົວຜູ້ຖືກຫາທັງໝົດ 135 ຄົນ, ຍິງ 62 ຄົນ;
*ມີຄົນລາວ 21 ຄົນ, ຍິງ 10 ຄົນ
* ໄທ 22 ຄົນ, ຍິງ 12 ຄົນ,
* ຈີນ 8 ຄົນ, ກຳປູເຈຍ 2 ຄົນ,
*ຫວຽດນາມ 82 ຄົນ, ຍິງ 40 ຄົນ,
ຢຶດຂອງກາງທີ່ນໍາໃຊ້ເຂົ້າໃນການກະທໍາຜິດ ມີຈໍຄອມພີວເຕີ 182 ໜ່ວຍ, ໂທລະສັບ 1.902 ໜ່ວຍ, ໂຕະ, ຕັ່ງ ແລະ ອຸປະກອນອື່ນໆ ອີກຈໍານວນຫຼວງຫຼາຍ, ເງິນກີບ 67,882,000 ກີບ, ເງິນຢວນ 55,047 ຢວນ, ເງິນບາດ 1,140 ບາດ, ເງິນໂດລາ 707 ໂດລາ, ເງິນດົງ 1,964,000 ດົງ, ຕູ້ເຊັບ 08 ໜ່ວຍ.
ໃນຕູ້ເຊັບຈຳນວນດັ່ງກ່າວພົບເຫັນ ເງິນກີບ 416,351,500 ກີບ, ເງິນບາດ 27,610 ບາດ, ເງິນຢວນ 135,181 ຢວນ, ເງິນໂດລາ 20,950 ໂດລາ, ເງິນດົງ 20,901,000 ດົງ, ເງິນໂດລາ ຟິລະປິນ 3,000 ໂດລາ ຟິລະປິນ, ເງິນໂດລາ ຮົງກົງ 170 ໂດລາ ຮົງກົງ, ເງິນກໍາປູເຈຍ 62,300 ລຽວ, ເງິນໄຕ້ຫວັນ 100 ໄຕ້ຫວັນ, ເງິນຍີ່ປຸ່ນ ຈໍານວນ 18,000 ເຢັນ.
ຜ່ານການສອບສວນເບື້ອງຕົ້ນ, ກຸ່ມແກ້ງດັ່ງກ່າວໄດ້ມີການຈັດຕັ້ງກັນເປັນລະບົບ, ແບ່ງໜ້າທີ່ກັນເຮັດວຽກຢ່າງຄັກແນ່ ເປັນຕົ້ນແມ່ນ ການສ້າງໂປຣໄຟລ໌ປອມໃນສື່ສັງຄົມອອນລາຍ, ການຊັກຊວນລົງທຶນທີ່ມີຜົນຕອບແທນສູງ (ຫຼອກລວງແບບແຊລູກໂສ້), ການຕົວະວ່າສົ່ງເຄື່ອງມີຄ່າແລ້ວໃຫ້ໂອນເງິນຄ່າພາສີ ແລະ ການນຳໃຊ້ເວັບໄຊການພະນັນ ຫຼື ແອັບພລິເຄຊັນປອມ ເພື່ອດຶງດູດເອົາເງິນຈາກຜູ້ຫຼົງເຊື່ອ ພາຍໃນ ແລະ ຕ່າງປະເທດ.
ປັດຈຸບັນ, ທາງກອງບັນຊາການ ປກສ ແຂວງຫຼວງນໍ້າທາ ໄດ້ມອບໝາຍໃຫ້ພະແນກວິຊາສະເພາະ ສືບຕໍ່ຂະຫຍາຍຜົນ, ຄັດແຍກປະເພດຜູ້ຖືກຫາ ເພື່ອດຳເນີນຄະດີຕາມລະບຽບກົດໝາຍຢ່າງເຂັ້ມງວດ ສ່ວນຜູ້ຖືກຫາທີ່ເປັນຄົນຕ່າງປະເທດ ແມ່ນໄດ້ດຳເນີນການປະສານງານກັບ ປະເທດກ່ຽວຂ້ອງ ໄປດຳເນີນຄະດີຕາມຂັ້ນຕອນຂອງກົດໝາຍປະເທດຕົນເອງ.
