ລົດໄຟຟ້າ 100% ລຸ້ນໃໝ່ ອໍນິວໂອລາ 5 ເອັດຢູວີ (All-new ORA 5 SUV) ມີວາງຈຳໜ່າຍແລ້ວໃນຕະຫລາດ ສປປ ລາວ ຊຶ່ງພິທີນຳສະເໜີລົດຍີ່ຫໍ້ດັ່ງກ່າວ ຈັດຂຶ້ນໃນວັນທີ 25 ກໍລະ ກົດ 2026 ຢູ່ຫ້ອງຂາຍລົດ GWM ບ້ານໂພນທັນ ເມືອງໄຊທານີ ນະຄອນຫລວງວຽງຈັນ ໂດຍມີຜູ້ບໍລິຫານຂອງບໍລິສັດໂອໂຕເອເຊຍ, ພ້ອມດ້ວຍພາກສ່ວນກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.
ທ່ານ ນາງ ສົມປະສົງ ພະສິນສັກສິດ ຜູ້ຈັດການທົ່ວໄປ ບໍລິສັດ ໂອໂຕເອເຊຍ ໄດ້ກ່າວວ່າ: Great Wall Motor (GWM) ແມ່ນໜຶ່ງໃນຜູ້ຜະລິດລົດຊັ້ນນຳ ທີ່ມີປະສົບການຍາວນານດ້ານການພັດທະນາເຕັກໂນໂລຊີລົດພະລັງງານໃໝ່. ສຳລັບ ຍີ່ຫໍ້ ຫລື ແບຣນ ORA ໄດ້ຖືກພັດທະນາຂຶ້ນເພື່ອນຳສະເໜີລົດພະລັງງານທາງເລືອກໃໝ່ ທີ່ປະສົມປະສານການອອກແບບທີ່ທັນສະໄໝ, ເຕັກໂນໂລຊີອັດສະລິຍະ ແລະ ມາດຕະຖານຄວາມປອດໄພລະດັບໂລກ. ການນຳສະເໜີ All-new ORA 5 SUV ເຂົ້າສູ່ຕະຫລາດລາວ ເປັນອີກທາງເລືອກໃໝ່ໃຫ້ແກ່ຜູ້ບໍລິໂພກ ໂດຍສະເພາະ ຜູ້ທີ່ສົນໃຈລົດໄຟຟ້າ, ມັກການອອກແບບທີ່ເປັນເອກະລັກ ແລະ ຕ້ອງການລົດທີ່ປະຢັດ ແລະ ເປັນມິດຕໍ່ສິ່ງແວດລ້ອມ.
ຈຸດເດັ່ນຂອງ ORA 5 ລົດຮຸ່ນນີ້ ມາພ້ອມມໍເຕີໄຟຟ້າ ກຳລັງ 150 ກິໂລວັດ ແລະ ແຮງບິດ 260 ນິວຕັນແມັດ, ຕິດຕັ້ງແບັດເຕີຣີ Lithium Iron Phosphate (LFP) ຂະໜາດ 58,3 ກິໂລວັດໂມງ, ສາມາດຂັບຂີ່ໄດ້ໄກເຖິງ 520 ກິໂລແມັດ ຕາມມາດຕະຖານ NEDC, ລົດຮອງຮັບການສາກໄຟດ່ວນ DC ສູງສຸດ 120 ກິໂລວັດ ແລະ ສາມາດສາກຈາກ 10-80% ໄດ້ພາຍໃນ 30 ນາທີ. ຕົວລົດຮັບປະກັນ 4 ປີ ຫລື 150.000 ກິໂລແມັດ, ມໍເຕີ ແລະ ແບັດເຕີຣີ ຮັບປະກັນ 8 ປີຕໍ່ 150.000 ກິໂລແມັດ.
ດ້ານການອອກແບບ ORA 5 ເນັ້ນການປະສົມປະສານແບບຍ້ອນຍຸກ (ສະໄຕຄລາສສິກ) ແລະ ຄວາມທັນສະໄໝ ດ້ວຍຮູບຊົງທີ່ລຽບຫລູ, ໂດດເດັ່ນ, ພາຍໃນ ແລະ ນອກລົດ ອອກແບບເນັ້ນຄວາມລຽບຫລູ, ສວຍງາມ ແລະ ການໃຊ້ງານທີ່ສະດວກ ພ້ອມເຕັກໂນໂລຊີທີ່ທັນສະໄໝ, ມີຈໍສະແດງຜົນກາງຂະໜາດ 14,6 ນິ້ວ ຮອງຮັບລະບົບສັ່ງງານດ້ວຍສຽງ, ມີເມນູພາສາໄທ ແລະ ຮອງຮັບການອັບເດດລະບົບແບບໄຮ້ສາຍ. ລາຄາເລີ່ມຕົ້ນ 19.990 ໂດລາສະຫະລັດ, ສຳລັບລູກຄ້າທີ່ຈັບຈອງໃນໄລຍະນີ້ ຈະໄດ້ຮັບຂອງແຖມຫລາຍລາຍການ ຊຶ່ງລາຍລະອຽດ ສາມາດຕິດຕໍ່ພະແນກຂາຍ GWM Laos.
