ທີມຊາດອັງກິດ ສວມບົດຫົວໃຈນັກສູ້ໃນສະຖານະການເຫຼືອຜູ້ຫຼິ້ນ 10 ຄົນ ແຕ່ສາມາດເອົາຊະນະເຈົ້າພາບຮ່ວມ ທີມຊາດເມັກຊິໂກ ໄປແບບສຸດມັນ 3-2 ປະຕູ, ໃນການແຂ່ງຂັນເຕະບານໂລກ 2026 ຮອບ 16 ທີມສຸດທ້າຍ ເມື່ອຕອນເຊົ້າວັນທີ 6 ກໍລະກົດນີ້ ທີ່ສະໜາມເອັດຕາດິໂອ ອັດເຕກ້າ ປະເທດເມັກຊິໂກ.
ເກມເຄິ່ງທຳອິດ ອັງກິດ ເປັນຝ່າຍຍິງປະຕູຂຶ້ນນຳກ່ອນ 2-0 ຈາກການເໝົາຄົນດຽວສອງປະຕູຂອງ ຈູດ ເບວລິງແຮມ ໃນນາທີທີ 36 ແລະ 38, ກ່ອນທີ່ ຮູລຽນ ກິນໂຍເນດ ຈະຍິງຕີໄຂ່ແຕກໃຫ້ເຈົ້າພາບຮ່ວມ ແມັກຊິກໂກ ໃນນາທີທີ 42, ຈົບເຄິ່ງເວລາທຳອິດ ອັງກິດນຳຢູ່ 2-1.
ກັບເຂົ້າສູ່ເຄິ່ງເວລາທີ 2, ໃນນາທີທີ 54 ອັງກິດຕ້ອງເຫຼືອຜູ້ຫຼິ້ນພຽງ 10 ຄົນ ເມື່ອ ຈາກາເຣວ ຄວານຊາ ໄດ້ຮັບໃບແດງ ຖືກໄລ່ອອກຈາກສະໜາມ, ເຖິງວ່າ ອັງກິດ ຈະເຫຼືອຜູ້ຫຼິ້ນພຽງ 10 ຄົນ ແຕ່ກໍມາໄດ້ຈຸດໂທດ ໃນນາທີທີ 58, ແຮຣີ ເຄນ ຮັບໜ້າທີ່ ຍິງເຂົ້າໄປ ເຮັດໃຫ້ອັງກິດນຳຫ່າງເປັນ 3-1.
ເກມດຳເນີນມາຮອດນາທີທີ 67, ແມັກຊິກໂກ ກໍມາໄດ້ຈຸດໂທດ ແລະ ເປັນ ຣາອູນ ຮິເມເນດຮັບໜ້າທີ່ຍິງເຂົ້າໄປ ເຮັດໃຫ້ແມັກຊິກໂກໄລ່ມາເປັນ 2-3 ໃນໄລຍະເວລາທີ່ເຫຼືອອັງກິດ ບໍ່ມີທາງເລືອກ ຕ້ອງຖອຍລົງມາຕັ້ງເກມຮັບໃນແດນຂອງຕົນເອງ ແລະ ປ່ອຍໃຫ້ເມັກຊິໂກ ທີ່ໄດ້ປຽບຕົວຜູ້ຫຼິ້ນເດີນໜ້າພັບສະໜາມບຸກກົດດັນຢ່າງໜັກໜ່ວງ. ແຕ່ດ້ວຍເກມຮັບອັນໜຽວແໜ້ນຂອງອັງກິດ ສາມາດຢັນເອົາໄວ້ໄດ້ທັງໝົດ, ຈົບເກມ ອັງກິດ ເອົາຊະນະໄປແບບຫວຸດຫວິດ 3-2 ປະຕູ, ຜ່ານເຂົ້າສູ່ຮອບ 8 ທີມສຸດທ້າຍ ໄປພົບກັບ ນອກແວ ໃນວັນທີ 11 ກໍລະກົດນີ້.
