ໃນວັນທີ 4 ກໍລະກົດ 2026 ນີ້, ທ່ານ ມິນ ອອງ ລາຍ ປະທານາທິບໍດີ ແຫ່ງ ສາທາລະນະລັດ ສະຫະພາບ ມຽນມາ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຈັນທະວົງ ແສນອາມາດມົນຕີ ປະທານສະມາຄົມມິດຕະພາບ ລາວ-ມຽນມາ ພ້ອມດ້ວຍຄະນະ ຢູ່ນະຄອນຫລວງວຽງຈັນ. ໃນໂອກາດດັ່ງກ່າວ, ທ່ານ ຈັນທະວົງ ແສນອາມາດມົນຕີ ໄດ້ສະແດງຄວາມຂອບໃຈຢ່າງສູງ ແລະ ຮູ້ສຶກເປັນກຽດຢ່າງຍິ່ງທີ່ ທ່ານ ມິນ ອອງ ລາຍ ສະລະເວລາອັນມີຄ່າ ຕ້ອນຮັບຄະນະບໍລິຫານງານສະມາຄົມມິດຕະພາບ ລາວ-ມຽນມາ ເຂົ້າຢ້ຽມຂໍ່ານັບ ໃນໂອກາດຢ້ຽມຢາມລັດຖະກິດ ຢູ່ ສປປ ລາວ ໃນຄັ້ງນີ້, ພ້ອມທັງໄດ້ຕີລາຄາສູງ ຕໍ່ຜົນສໍາເລັດຂອງການພົບປະຢ່າງເປັນທາງການ ຂອງ ທ່ານປະທານປະເທດ ທອງລຸນ ສີສຸລິດ ແລະ ທ່ານ ມິນ ອອງ ລາຍ ຊຶ່ງເຕັມໄປດ້ວຍບັນຍາກາດ ແຫ່ງໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີ ຊຶ່ງເປັນການປະກອບສ່ວນສໍາຄັນເຂົ້າໃນການຮັດແໜ້ນ, ເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນໃກ້ຊິດ ລະຫວ່າງສອງປະເທດ ລາວ ແລະ ມຽນມາ ໃຫ້ນັບມື້ໄດ້ຮັບການເສີມຂະຫຍາຍ ແລະ ກ້າວເຂົ້າສູ່ລວງເລິກຢ່າງບໍ່ຢຸດຢັ້ງ. ພ້ອມກັນນີ້, ທ່ານກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດຂອງປະຊາຊົນມຽນມາ ທີ່ຍາດມາໄດ້ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາອັນຖືກຕ້ອງຂອງພັກ ແລະ ລັດຖະບານມຽນມາ ຕະຫລອດໄລຍະຜ່ານມາ ຊຶ່ງໄດ້ເຮັດໃຫ້ເສດຖະກິດມີການຂະຫຍາຍຕົວຢ່າງຕໍ່ເນື່ອງ ແລະ ຊີວິດການເປັນຢູ່ຂອງປະຊາຊົນມຽນມາ ໄດ້ຮັບການປັບປຸງໃຫ້ດີຂຶ້ນເທື່ອລະກ້າວ, ລັດຖະບານມຽນມາ ໄດ້ຮັບຄວາມໄວ້ວາງໃຈ ແລະ ເຊື່ອໝັ້ນຈາກທົ່ວປວງຊົນ, ພ້ອມທັງເຊື່ອໝັ້ນວ່າ ພາຍໃຕ້ການນຳພາອັນປີຊາສາມາດຂອງ ທ່ານ ມິນ ອອງ ລາຍ, ມຽນມາ ຈະສືບຕໍ່ໄດ້ຮັບຜົນສຳເລັດອັນໃໝ່ໃຫຍ່ຫລວງກວ່າເກົ່າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮັ່ງມີ ເຂັ້ມແຂງ ແລະ ສີວິໄລ ຍິ່ງໆຂຶ້ນ.
ໃນໂອກາດນີ້, ປະທານສະມາຄົມມິດຕະພາບ ລາວ-ມຽນມາ ໄດ້ລາຍງານສະພາບການເຄື່ອນໄຫວຂອງ ສະມາຄົມມິດຕະພາບ ລາວ-ມຽນມາ ຊຶ່ງມີກົນໄກປະສານງານ, ແລກປ່ຽນຂໍ້ມູນຂ່າວສານ, ແລກປ່ຽນການຢ້ຽມຢາມເຊິ່ງກັນ ແລະ ກັນ ແລະ ປະຕິບັດພາລະບົດບາດເຄື່ອນໄຫວວຽກງານການທູດປະຊາຊົນໃນການເປັນຂົວຕໍ່, ສະໜັບສະໜູນ ແລະ ຊຸກຍູ້ໃຫ້ປະຊາຊົນສອງປະເທດມີການພົວພັນຮ່ວມມື ແລະ ໄປມາຫາສູ່ກັນນັບມື້ນັບຫລາຍຂຶ້ນ ລວມທັງມີການຈັດກິດຈະກໍາ ເນື່ອງໃນໂອກາດວັນສໍາຄັນຕ່າງໆຂອງທັງສອງປະເທດ ລາວ ແລະ ມຽນມາ. ຄຽງຄູ່ກັນນີ້, ປະທານສະມາຄົມມິດຕະພາບ ລາວ-ມຽນມາ ໄດ້ສະເໜີ ໃຫ້ລັດຖະບານມຽນມາ ຊ່ວຍສະໜັບສະໜູນ, ຊຸກຍູ້ປະຊາຊົນສອງປະເທດໃຫ້ມີການໄປມາຫາສູ່, ພົວພັນຮ່ວມມື, ສ້າງຄວາມຮັກແພງ, ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ສະໜັບສະໜູນຊຸກຍູ້ນັກທຸລະກິດ, ນັກລົງທຶນ ແລະ ນັກທ່ອງທ່ຽວ ຂອງສອງປະເທດໃຫ້ມີການພົວພັນຮ່ວມມືກັນໃຫ້ນັບມື້ນັບຫລາຍຂຶ້ນ ໂດຍສະເພາະແມ່ນປະຊາຊົນສອງປະເທດທີ່ອາໄສຢູ່ຕາມບໍລິເວນຊາຍແດນ ຊຶ່ງຈະເປັນການປະກອບສ່ວນເຂົ້າໃນການເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ລະຫວ່າງ ສອງປະເທດ ແລະ ປະຊາຊົນສອງຊາດ ລາວ-ມຽນມາ ໃຫ້ສືບຕໍ່ໄດ້ຮັບການພັດທະນາຍິ່ງໆຂຶ້ນ.
ໃນໂອກາດດຽວກັນນີ້, ທ່ານ ມິນ ອອງ ລາຍ ໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ສະມາຄົມມິດຕະພາບ ລາວ-ມຽນມາ ທີ່ໄດ້ຮ່ວມມືກັນ, ຊ່ວຍເຫລືອກັນ, ແລກປ່ຽນຂໍ້ມູນຂ່າວສານ ແລະ ແລກປ່ຽນການຢ້ຽມຢາມເຊິ່ງກັນ ແລະ ກັນ, ພ້ອມທັງປະຕິບັດພາລະບົດບາດການເຄື່ອນໄຫວວຽກງານການທູດປະຊາຊົນ ໃນການເປັນຂົວຕໍ່, ສະໜັບສະໜູນ ແລະ ຊຸກຍູ້ ໃຫ້ປະຊາຊົນສອງປະເທດມີການພົວພັນຮ່ວມມື ແລະ ໄປມາຫາສູ່ກັນນັບມື້ນັບຫລາຍຂຶ້ນ ເພື່ອເປັນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນໃກ້ຊິດ ລະຫວ່າງ ສອງປະເທດ ລາວ-ມຽນມາ ໃຫ້ໄດ້ຮັບການພັດທະນາ ແລະ ແຕກດອກອອກຜົນຍິ່ງໆຂຶ້ນ, ພ້ອມທັງ ອວຍພອນໃຫ້ສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມື ລະຫວ່າງ ສປປ ລາວ ແລະ ສສ ມຽນມາ ໄດ້ຮັບການສືບຕໍ່ເສີມຂະຫຍາຍ ແລະ ກ້າວຂຶ້ນສູ່ລະດັບໃໝ່.
