ທີມຊາດກົດດີວົວ (ໄອວໍຣີໂຄດ) ສາມາດເອົາຊະນະເໜືອ ກູຣາຊາວ 2-0 ເກັບເພີ່ມເປັນ 6 ຄະແນນ ເທົ່າກັບ ທີມຊາດເຢຍລະມັນ ແຕ່ຈົບອັນດັບ 2 ຂອງກຸ່ມ E ເນື່ອງຈາກເປັນຮອງຜົນໄດ້-ເສຍປະຕູ, ຜ່ານເຂົ້າສູ່ຮອບ 32 ທີມສຸດທ້າຍ ໃນການແຂ່ງຂັນເຕະບານໂລກ 2026.
ການແຂ່ງຂັນເຕະບານໂລກ 2026 ໃນຄືນວັນທີ 25 ມິຖຸນາ ຫຼື ຕອນເຊົ້າຂອງວັນທີ 26 ມິຖຸນາ ຕາມເວລາໃນປະເທດເຮົາ ເປັນການແຂ່ງຂັນນັດສຸດທ້າຍຂອງກຸ່ມ E ເຊິ່ງມີແຂ່ງຂັນ 2 ຄູ່ພ້ອມກັນ, ຄູ່ທີໜຶ່ງ ເປັນການພົບກັນ ລະຫວ່າງ ກົດດີວົວ ພົບກັບ ກູຣາຊາວ.
ເລີ່ມເກມໄດ້ພຽງ 7 ນາທີ, ກົດດີວົວ ກໍມາໄດ້ປະຕູຂຶ້ນນຳ 1-0 ຈາກການຍິງຂອງ ນີໂກລາສ ເປເປ້, ຫຼັງຈາກນັ້ນ ກູຣາຊາວ ກໍເປີດເກມບຸກແລກ ຫວັງທວງປະຕູຕີສະເໝີ, ແຕ່ກັບເປັນກົດດີວົວທີ່ມີໂອກາດຫຼາຍຄັ້ງ ແຕ່ກໍບໍ່ສາມາດຍິງປະຕູເພີ່ມໄດ້ ເຮັດໃຫ້ຈົບເຄິ່ງເວລາທຳອິດ ກົດດີວົວນຳ 1-0.
ເຂົ້າສູ່ເຄິ່ງເວລາທີ 2, ໃນນາທີທີ 64 ເປັນ ເປເປ້ ຄົນເດີມຍິງປະຕູທີ 2 ຂອງຕົນເອງ ແລະ ເປັນປະຕູປິດທ້າຍ ເຮັດໃຫ້ຈົບເກມ ກົດດີວົວເອົາຊະນະ ກູຣາຊາວໄປ 2-0 ປະຕູ ເກັບ 3 ຄະແນນ ມີເພີ່ມເປັນ 6 ຄະແນນເທົ່າກັບເຢຍລະມັນ ແຕ່ປະຕູໄດ້-ເສຍເປັນຮອງ ຈຶ່ງເປັນອັນດັບ 2 ຂອງກຸ່ມ E.
ໄຊຊະນະນັດນີ້ ເຮັດໃຫ້ ກົດດີວົວ ກາຍເປັນທີມຊາດຈາກທະວີບອາຟຣິກາທີມທີ 3 ທີ່ຜ່ານເຂົ້າຮອບ 32 ສຸດທ້າຍ ໃນການແຂ່ງຂັນບານໂລກ 2026 ຕໍ່ຈາກອາຟຣິກາໃຕ້ ແລະ ມາຣົກ (ໂມຣັອກໂກ).
ອີກຄູ່ໜຶ່ງຂອງກຸ່ມ E ທີ່ລົງສະໜາມພ້ອມກັນ ເປັນການພົບກັນລະຫວ່າງເຢຍລະມັນ ພົບກັບ ເອກວາດໍ (Ecuador), ຜົນການແຂ່ງຂັນ ປາກົດວ່າ ເອກວາດໍ ພິກແຊງເອົາຊະນະເຢຍລະມັນ 2-1 ປະຕູ, ເຖິງວ່ານັດນີ້ ເອກວາດໍ ຈະສາມາດເອົາຊະນະເຢຍລະມັນໄດ້ ແຕ່ກໍເປັນອັນດັບ 3 ຂອງກຸ່ມ E ມີ 4 ຄະແນນ, ຕ້ອງລຸ້ນເຂົ້າຮອບໃນຖານະທີມອັນດັບ 3 ທີ່ດີທີ່ສຸດ.
