ການແຂ່ງຂັນເຕະບານໂລກ 2026 ນັດທີ 2 ຂອງກຸ່ມ B ໃນຕອນເຊົ້າວັນທີ 19 ມິຖຸນາ 2026 ຕາມເວລາໃນ ສປປ ລາວ ທີ່ສະໜາມ ບີຊີ ເພຼດ ແວນຄູເວີ ປະເທດການາດາ ເປັນການພົບກັນລະຫວ່າງ ທີມຊາດການາດາ ແລະ ທີມຊາດກາຕາ. ນັດນີ້, ແຟນບານ (ກອງເຊຍ) ເຈົ້າຖິ່ນເຂົ້າມາຊົມເກມຢ່າງໜາແໜ້ນ ເພື່ອຫວັງເຫັນໄຊຊະນະຄັ້ງທຳອິດໃນປະຫວັດສາດຂອງທີມຊາດໃນການແຂ່ງຂັນເຕະບານໂລກຮອບສຸດທ້າຍ.
ເລີ່ມເກມ ການາດາ ກໍເປີດເກມບຸກໃສ່ກາຕາຢ່າງໜັກ ແລະ ກໍມາໄດ້ປະຕູຂຶ້ນນຳ 1-0 ໃນນາທີທີ 16 ຈາກການຍິງຂອງ ໄຄ ລາຣິນ; ຈາກນັ້ນໃນນາທີທີ 29 ການາດາກໍມາໄດ້ປະຕູໜີຫ່າງເປັນ 2-0 ຈາກການຍິງຂອງ ໂຢນາທານ ເດວິດ ກອງໜ້າຈາກສະໂມສອນ ຢູເວນຕຸດ. ນາທີທີ 33 ຖືວ່າເປັນຈຸດປ່ຽນຄັ້ງໃຫຍ່ຂອງເກມ ເມື່ອຜູ້ຕັດສິນໃຫ້ໃບແດງກອງຫຼັງທີມກາຕາ ໄລ່ອອກຈາກສະໜາມ ເຮັດໃຫ້ກາຕາເຫຼືອ 10 ຄົນ ແລະ ຕາມຫຼັງ 2 ປະຕູ. ນາທີທີ 45+3 ກ່ອນຈົບເຄິ່ງເວລາທຳອິດ, ການາດາ ອາໄສຕົວຜູ້ຫຼິ້ນທີ່ເໜືອກວ່າເປີດເກມບຸກຢ່າງຕໍ່ເນື່ອງ ແລະ ເປັນ ໂຢນາທານ ເດວິດ ທີ່ຍິງປະຕູທີສອງຂອງຕົນເອງໃນນັດນີ້ ພາທີມນຳຫ່າງເປັນ 3-0 ເຮັດໃຫ້ຈົບເຄິ່ງເວລາລາທຳອິດ ການາດາ ນຳ ກາຕາຢູ່ 3-0.
ເລີ່ມເຄິ່ງເວລາຫຼັງ ກາຕາ ຍິ່ງຕົກຢູ່ໃນສະຖານະການໜັກຂຶ້ນກວ່າເກົ່າ ເມື່ອຜູ້ຫຼິ້ນຂອງກາຕາ ໄດ້ໃບແດງ ເປັນຄົນທີ 2 ຖືກໄລ່ອອກຈາກສະໜາມ ເຮັດໃຫ້ກາຕາ ເຫຼືອຜູ້ຫຼິ້ນພຽງ 9 ຄົນເທົ່ານັ້ນ. ໃນນາທີທີ 64 ນາທານ ຊາລິບາ ຕົວສຳຮອງທີ່ຫາກໍ່ລົງສະໜາມມາ ກໍມາຍິງປະຕູທີສີ່ໃຫ້ການາດາ; ນາທີທີ 75 ສະກໍໄຫຼເປັນ 5-0 ຈາກຈັງຫວະທີ່ກອງຫຼັງຂອງກາຕາ ສະກັດບານພາດເຂົ້າປະຕູຕົນເອງ; ໃນໄລຍະທົດເວລາບາດເຈັບ ນາທີທີ 90+2 ແຟນບານເຈົ້າພາບໄດ້ເຮກັນລັ່ນສະໜາມອີກຄັ້ງ ເມື່ອ ໂຢນາທານ ເດວິດ ຍິງປະຕູທີ 3 ຂອງຕົນເອງໃນນັດນີ້. ຈົບເກມ ການາດາ ໄລ່ຖະຫຼົ່ມ ກາຕາ ໄປແບບຂາດລອຍເຖິງ 6-0. ຈາກໄຊຊະນະ 6-0 ໃນນັດນີ້ ບໍ່ພຽງແຕ່ເປັນໄຊຊະນະຄັ້ງທຳອິດຂອງ ການາດາ ໃນບານໂລກ ຮອບສຸດທ້າຍເທົ່ານັ້ນ ແຕ່ຍັງພາໃຫ້ພວກເຂົາມີ 4 ຄະແນນ ເທົ່າກັບ ສະວິດເຊີແລນ ແຕ່ຂຶ້ນເປັນທີມນຳຂອງກຸ່ມ B ຍ້ອນມີຜົນຕ່າງປະຕູໄດ້-ເສຍທີ່ດີກວ່າ ເຮັດໃຫ້ໂອກາດເຂົ້າຮອບ 32 ທີມສຸດທ້າຍສົດໃສຂຶ້ນທັນທີ. ສ່ວນ ກາຕາ ລົງສະໜາມ 2 ນັດມີພຽງ 1 ຄະແນນເທົ່ານັ້ນ.
