ຄະນະໂຄສະນາອົບຮົມ, ພະແນກໂຍທາທິການ ແລະ ຂົນສົ່ງ, ກອງບັນຊາການ ປກສ ນະຄອນຫຼວງວຽງຈັນ ໄດ້ໂຄສະນາເຜີຍແຜ່ການນໍາໃຊ້ລົດເມດ່ວນ BRT ຂອງໂຄງການຂົນສົ່ງແບບຍືນຍົງ ໃນຕົວເມືອງນະຄອນຫຼວງວຽງຈັນ (ນວ) ໃນວັນທີ 17 ມິຖຸນານີ້ ທີ່ມະຫາວິທະຍາໄລແຫ່ງຊາດ.
ເປັນກຽດໃນພິທີ ມີ ທ່ານ ສູນທະລີ ບົວສີສະຫວັດ ຮອງຫົວໜ້າຫ້ອງສັງລວມ ແລະ ພົວພັນຕ່າງປະເທດມະຫາວິທະຍາໄລແຫ່ງຊາດ (ມຊ), ທ່ານ ວຽງຄໍາ ສຸວົງ ຮອງຫົວໜ້າຄະນະໂຄສະນາອົບຮົມ ນວ, ທ່ານ ຄໍາພັນ ວັນທະນາ ຫົວໜ້າໂຄງການຂົນສົ່ງແບບຍືນຍົງໃນຕົວເມືອງ ນວ, ຄູ-ອາຈານ ພ້ອມດ້ວຍນັກສຶກສາປັນຍາຊົນເຂົ້າຮ່ວມຢ່າງພ້ອມພຽງ.
ຈຸດປະສົງ ເພື່ອຮັບຟັງການເຜີຍແຜ່ກ່ຽວກັບ ຄວາມໝາຍສໍາຄັນ ຂອງໂຄງການຂົນສົ່ງແບບຍືນຍົງໃນຕົວເມືອງ ນວ, ການປ່ຽນແປງທິດທາງການສັນຈອນຕາມເສັ້ນທາງ ໃນຕົວເມືອງ 9 ເສັ້ນ ຂອບເຂດໃຈກາງ ນວ, ແລກປ່ຽນປະກອບຄວາມຄິດເຫັນ ພ້ອມທັງ ຖາມ-ຕອບ ກ່ຽວກັບເສັ້ນທາງດັ່ງກ່າວ.
