ວັນທີ 1 ມິຖຸນາ ຂອງທຸກໆປີແມ່ນວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ. ວັນ ເດັກນ້ອຍສາກົນ ແມ່ນເຫດການໜຶ່ງທີ່ມີຄວາມໝາຍ-ສໍາຄັນຕໍ່ເດັກ ເພື່ອແນໃສ່ຊຸກຍູ້ສົ່ງເສີມ, ພັດທະ ນາ ແລະ ປົກປ້ອງເດັກໃນທົ່ວໂລກ ຍ້ອນເຫັນໄດ້ຄວາມສໍາຄັນຂອງເດັກ ທີ່ເປັນອະນາຄົດຂອງຊາດ, ເປັນເມັດພືດ, ເປັນໜໍ່ແໜງທຶນຮອນແຫ່ງຊີວິດໃນມື້ນີ້ ເພືຶ່ອກາຍເປັນອານາຄົດອັນແຈ່ມໃສຂອງປະ ເທດຊາດໃນມືື້ໜ້າ. ດັ່ງນັ້ນ, ພັກ-ລັດຖະບານ ກໍຄືບັນດາປະຊາຊາດໃນທົ່ວໂລກ ຍາມໃດກໍເຫັນໄດ້ຄວາມສໍາຄັນຕໍ່ວັນດັ່ງກ່າວ. ສະນັ້ນ, ຈຶ່ງໄດ້ສະເຫຼີມສະຫຼອງວັນເດັກສາກົນຕາມເງືຶ່ອນໄຂ ແລະ ສະ ພາບຕົວຈິງຂອງປະເທດຕົນໃນທຸກໆ ປີ.
ວັນເດັກນ້ອຍສາກົນ ມີປະຫວັດກຳເນີດເກີດຂຶ້ນຈາກຂະບວນການຕໍ່ສູ້ກູ້ຊາດ ຕ້ານການກົດຂີ່ຂູດຮີດອັນປ່າເຖື່ອນຂອງພວກຈັກກະພັດນາຍທຶນ, ເພື່ອທວງເອົາສິດແຫ່ງການດຳລົງຊີວິດອັນເປັນທຳ ແລະ ຄວາມອີ່ມໜໍາສຳລານມາສູ່ລູກ-ຫຼານ ຊຶ່ງເປັນອະນາຄົດຂອງຊາດ. ເມື່ອຫວນຄືນຫຼັງ ໃນວັນທີ 20 ພະຈິກ ປີ 1989 ກອງປະຊຸມສະມັດຊາໃຫຍ່ສະຫະປະຊາຊາດ ໄດ້ຮັບຮອງເອົາສົນທິສັນຍາວ່າດ້ວຍສິດທິເດັກ ແລະ ລັດຖະບານ ສປປ ລາວ ໄດ້ກາຍເປັນພາຄີຂອງສົນທິສັນຍາດັ່ງກ່າວ.
ສໍາລັບພັກ-ລັດຖະບານລາວ ໄດ້ຖືເອົາວັນທີ 1 ມິຖຸນາ ຂອງທຸກໆປີ ເປັນວັນສະເຫຼີມສະຫຼອງວັນເດັກສາກົນ ແລະ ວັນປູກຕົ້ນໄມ້ແຫ່ງຊາດ ເພື່ອເຮັດໃຫ້ເດັກນ້ອຍອະນຸຊົນ, ເຍົາວະຊົນໄດ້ມີໂອ ກາດສະແດງຄວາມສາມາດຂອງຕົນ, ເຂົ້າຮ່ວມກິດຈະກຳຢ່າງເບີກບານມ່ວນຊື່ນ, ພັກຜ່ອນຕາມສິດທິຂອງເຂົາເຈົ້າ ພາຍໃຕ້ການເອົາໃຈໃສ່ເບິ່ງແຍງຂອງພໍ່ແມ່, ຄູ, ຊຸມຊົນ, ອົງການຈັດຕັ້ງມະຫາຊົນ, ອຳນາດການປົກຄອງພ້ອມດ້ວຍບັນດາພະແນກການທີ່ກ່ຽວຂ້ອງ ເປັນຕົ້ນດ້ານໂພຊະນາການ ແລະ ການຮັກສາສຸຂະພາບຂອງເດັກ, ການສຶກສາອົບຮົມເດັກໃຫ້ກາຍເປັນຄົນດີ, ມີຄຸນນະພາບ, ຮູ້ຄິດ ແລະ ແກ້ໄຂບັນຫາ ເພື່ອເຮັດໃຫ້ສົມກັບເປັນລູກ-ຫຼານທີ່ປະເສີດຂອງປະຊາຊົນ ເປັນພົນລະເມືອງດີຂອງຊາດ. ເດັກທຸກຄົນມີສິດໃນການຢູ່ລອດ, ມີສິດເກີດ, ມີສິດໄດ້ຮັບການຮັກສາສຸຂະພາບ, ສັກຢາປ້ອງກັນພະຍາດຕ່າງໆ, ມີສິດໄດ້ຮັບການພັດທະນາ, ເດັກທຸກໆຄົນຈະຕ້ອງໄດ້ຮັບສານອາຫານທີ່ດີ, ຕ້ອງໄດ້ກິນນົມແມ່ຢ່າງຖືກຕ້ອງ, ຕ້ອງມີນ້ຳສະອາດໃຊ້. ສິ່ງສຳຄັນມີສິດໄດ້ຮັບການເບິ່ງແຍງດູແລແຕ່ມື້ເກີດເປັນຢ່າງດີໃນ 3 ປີຫຼັງການເກີດ ແລະ ສືບຕໍ່ການສຶກສາເປັນຢ່າງດີເພື່ອເຂົ້າຮຽນຕໍ່ໃນຊັ້ນປະຖົມ, ເດັກທຸກຄົນມີສິດໄດ້ຮັບການປົກປ້ອງຈາກການທຳຮ້າຍຮ່າງກາຍໃນທຸກກໍລະນີ, ເດັກທຸກຄົນມີສ່ວນຮ່ວມໃນການສະແດງຄວາມຄິດເຫັນ, ການສະແດງງອອກເຖິງຄວາມຮູ້-ຄວາມສາມາດຜ່ານສື່ສິ່ງພິມຕ່າງໆ ເພື່ອເປັນການຢັ້ງຢືນໃຫ້ເຫັນວ່າການປະຕິບັດສິດທິເດັກເປັນວຽກຂອງໝົດທຸກຄົນບໍ່ວ່າຈະເປັນພາກລັດ, ຊຸມຊົນ, ສັງຄົມ, ພໍ່-ແມ່ ລວມທັງຕົວເດັກເອງ. ສະນັ້ນ, ຈຶ່ງຮຽກຮ້ອງໃຫ້ທຸກໆຄົນ ລວມເຖິງການຈັດຕັ້ງມີຈຸດຢືນຕໍ່ການປະຕິບັດສິດທິຂອງເດັກຢ່າງຈະແຈ້ງ ແລະ ຖືກຕ້ອງ ເພື່ອເຮັດໃຫ້ສິດທິຂອງເດັກນັບມື້ນັບດີຂຶ້ນ. ສະນັ້ນ, ວັນທີ່ເຮົາສະແດງຄວາມຮັກ-ຄວາມເຂົ້າໃຈຕໍ່ເດັກ ຈະບໍ່ແມ່ນວັນທີ 1 ມິຖຸນາ ພຽງວັນດຽວຂໍໃຫ້ສະແດງຄວາມຮູ້ສຶກດັ່ງກ່າວອອກມາຢ່າງສະໝໍ່າສະເໝີ, ຈົ່ງພ້ອມ ພຽງກັນມອບສິ່ງທີ່ດີໆທີ່ສຸດໃຫ້ລູກ-ຫຼານ ໂດຍຖືເອົາວັນທີ 1 ມິຖຸນາ ເປັນສັນຍະລັກ ໃຫ້ແກ່ຄວາມຮູ້ສຶກທີ່ດີງາມດັ່ງກ່າວ ເພາະວ່າການລົງທຶນສ້າງຄົນຮຸ່ນໃໝ່ແມ່ນສ້າງອະນາຄົດທີ່ສະຫວ່າງສະໄຫວໃຫ້ແກ່ຊາວໂລກ ແລະ ການປະຕິບັດໜ້າທີ່ວຽກງານສຳລັບເດັກແມ່ນກຽດອັນສູງສົ່ງ ແລະ ຄວາມພູມໃຈຂອງທຸກໆຄົນ.
ເນື່ອງໃນໂອກາດວັນເດັກນ້ອຍສາກົນໃກ້ຈະມາເຖິງນີ້, ຜູ້ຂຽນຂໍອວຍພອນໄຊອັນປະເສີດໃຫ້ ເດັກນ້ອຍທຸກຄົນ ຈົ່ງມີຄວາມເບີກບານມ່ວນຊື່ນ, ສຸຂະພາບແຂງແຮງ, ເປັນເດັກດີຂອງພໍ່-ແມ່, ຄູ-ອາຈານ, ສັງຄົມ ແລະ ດຸໝັ່ນຮໍ່າຮຽນ ໃຫ້ກາຍເປັນຜູ້ສືບທອດຂອງປະເທດຊາດໃນອະນາຄົດ.
