ກອງປະຊຸມປະຈໍາປີ 2025 ຂອງຄະນະກໍາມະການ ເພື່ອການປົກປ້ອງສັງຄົມ ຂັ້ນສູນກາງ ໄດ້ຈັດຂຶ້ນໃນວັນທີ 25 ພຶດສະພາ ນີ້ ທີ່ກະຊວງແຮງງານ ແລະ ສະຫວັດດີການສັງຄົມ ພາຍໃຕ້ການເປັນປະທານຂອງ ທ່ານ ໂພໄຊ ໄຊຍະສອນ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ປະທານຄະນະກໍາມະການປົກປ້ອງສັງຄົມຂັ້ນສູນກາງ, ມີຮອງລັດຖະມົນຕີ, ຮອງປະທານຄະນະກໍາມະການ, ຄະນະກໍາມະການປົກປ້ອງສັງຄົມຂັ້ນສູນກາງ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ໂພໄຊ ໄຊຍະສອນ ໄດ້ຍົກໃຫ້ເຫັນເຖິງສະພາບການເຄັ່ງຮ້ອນໃນໄລຍະ 1 ປີຜ່ານມາ ທີ່ ສປປ ລາວ ຕ້ອງປະເຊີນກັບສິ່ງທ້າທາຍຫຼາຍດ້ານ ເປັນຕົ້ນບັນຫາເສດຖະກິດ-ການເງິນ, ບັນຫາເງິນເຟີ້, ຄ່າຄອງຊີບທີ່ສູງຂຶ້ນ, ບັນຫາຂາດແຄນສະບຽງອາຫານ, ນໍ້າມັນເຊື້ອໄຟ ແລະ ຜົນກະທົບຈາກໄພພິບັດທາງທໍາມະຊາດ. ບັນຫາເຫຼົ່ານີ້ໄດ້ສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ ແລະ ຜູ້ອອກແຮງງານ ໂດຍສະເພາະແມ່ນກຸ່ມຄົນທີ່ທຸກຍາກ ແລະ ດ້ອຍໂອກາດ. ວຽກງານປົກປ້ອງສັງຄົມ ແມ່ນນະໂຍບາຍທີ່ສໍາຄັນ ແລະ ຈໍາເປັນຂອງລັດຖະບານ ໃນການສະໜັບສະໜູນໃຫ້ປະຊາຊົນຫຼຸດພົ້ນຈາກຄວາມທຸກຍາກ, ປ້ອງກັນບໍ່ໃຫ້ຕົກເຂົ້າສູ່ຄວາມທຸກຍາກຊໍາເຮື້ອ, ຫຼຸດຜ່ອນຄວາມດ້ອຍໂອກາດ ແລະ ສ້າງຄວາມໝັ້ນຄົງທາງດ້ານສັງຄົມ ເພື່ອໃຫ້ທຸກຄົນໄດ້ຮັບການບໍລິການຂັ້ນພື້ນຖານ, ມີລາຍໄດ້, ມີສຸຂະພາບຢ່າງທົ່ວເຖິງ ແລະ ເປັນທໍາ.
ກອງປະຊຸມຄັ້ງນີ້, ຈະໄດ້ຮ່ວມກັນສະຫຼຸບຕີລາຄາຢ່າງເລິກເຊິ່ງກ່ຽວກັບການຈັດຕັ້ງປະຕິບັດຍຸດທະສາດປົກປ້ອງສັງຄົມແຫ່ງຊາດ ໄລຍະ 1 ປີຜ່ານມາ, ຄົ້ນຄວ້າຈຸດດີ, ຈຸດອ່ອນ, ຂໍ້ຄົງຄ້າງ ແລະ ສາເຫດ ເພື່ອຊອກຫາວິທີການ ແລະ ມາດຕະການແກ້ໄຂໃຫ້ມີປະສິດທິພາບ. ພ້ອມກັນນັ້ນ, ຜູ້ເຂົ້າຮ່ວມຈະໄດ້ຮ່ວມກັນພິຈາລະນາ ແລະ ຮັບຮອງເອົາ ຮ່າງບົດສະຫຼຸບການຈັດຕັ້ງປະຕິບັດຍຸດທະສາດການປົກປ້ອງສັງຄົມ ປະຈໍາປີ 2025 ແລະ ທິດທາງແຜນການ ປີ 2026.
ຂໍ້ມູນ-ພາບ: ຂ່າວສານ ຮສສ
