ວິທະຍຸ-ໂທລະພາບ ສູນກາງຈີນ, ແຫລ່ງຂ່າວຈາກກະຊວງປ້ອງກັນຄວາມສະຫງົບຈີນ ແຈ້ງໃຫ້ຮູ້ ໃນວັນທີ 17 ພຶດສະພານີ້ວ່າ: ເຈົ້າໜ້າທີ່ຕໍາຫລວດຈາກ ສປ ຈີນ, ສ.ອາເມ ຣິກາ ແລະ ສະຫະລັດອາຣັບເອມີເຣດ ໄດ້ຮ່ວມມືກັນປະຕິບັດກົດໝາຍສາກົນເປັນເທື່ອທໍາອິດ ໂດຍໄດ້ຮ່ວມກັນປາບປາມອາຊະຍາກຳລອກລວງທາງໂທລະຄົມຢູ່ນະຄອນດູໄບ ຂອງສະຫະລັດ ອາຣັບ ເອມີເຣດ ເຊິ່ງສາມາດມ້າງກຸ່ມຫລອກລວງ ທາງໂທລະຄົມໄດ້ 9 ຈຸດ ແລະ ຈັບກຸມຜູ້ຕ້ອງຫາໄດ້ 276 ຄົນ. ເຈົ້າໜ້າທີ່ກະຊວງປ້ອງກັນ ຄວາມສະຫງົບຈີນ ໃຫ້ຮູ້ວ່າ: ການເຄື່ອນໄຫວປາບປາມອາຊະຍາກຳຮ່ວມຄັ້ງນີ້ ເປັນຜົນສໍາເລັດສໍາຄັນ ຂອງເຈົ້າໜ້າທີ່ຕໍາຫລວດຈີນ ໃນການດໍາເນີນການຮ່ວມມື ດ້ານການປະຕິບັດກົດໝາຍສາກົນ. ເຈົ້າໜ້າທີ່ຕໍາຫລວດຈີນ ຈະລົງເລິກການຮ່ວມມື ທີ່ຕິດແທດຕົວຈິງກັບປະເທດຕ່າງໆ ຫລາຍຂຶ້ນກວ່າເກົ່າ ໂດຍຈະດໍາເນີນການເຄື່ອນໄຫວປາບປາມຮ່ວມ, ເດັດດ່ຽວປາບປາມ ກຸ່ມຫລອກລວງ ທາງໂທລະຄົມ ແລະ ຈັບກຸມຜູ້ຕ້ອງຫາທີ່ກ່ຽວຂ້ອງ ກັບອາຊະຍາກຳຫລອກລວງ ທາງໂທລະຄົມ ຢ່າງສຸດຄວາມສາມາດ ເພື່ອປົກປັກຮັກສາສິດ ແລະ ຜົນປະໂຫຍດອັນຊອບທຳ ຕາມກົດໝາຍຂອງປະຊາຊົນ ໃນທຸກປະເທດຢ່າງແທ້ຈິງ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
