ຖືເປັນອີກໜຶ່ງຄວາມພາກພູມໃຈຂອງວົງການການສຶກສາລາວ ເມື່ອທີມຕົວແທນຈາກພາກວິຊາວິທະຍາສາດຄອມພິວເຕີ ຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ ສາມາດຄວ້າ “ລາງວັນທີ 3” ຈາກການແຂ່ງຂັນ Huawei ICT Competition APAC 2026 ທີ່ນະຄອນຫຼວງຈາກາຕ້າ ປະເທດອິນໂດເນເຊຍ.
ເວທີນີ້ເປັນການແຂ່ງຂັນລະດັບອາຊີ-ປາຊີຟິກ ທີ່ຮວບຮວມນັກສຶກສາດ້ານ ICT ຈາກຫຼາຍປະເທດ ໂດຍທີມຈາກ ມຊ ເປັນ “ທີມດຽວຈາກ ສປປ ລາວ” ທີ່ໄດ້ເປັນຕົວແທນປະເທດເຂົ້າຮ່ວມ ສະທ້ອນໃຫ້ເຫັນເຖິງສັກກະຍະພາບ ແລະ ຄຸນນະພາບການສຶກສາ ICT ຂອງລາວທີ່ກ້າວສູ່ລະດັບສາກົນ ມີອາຈານທີ່ປຶກສາ: ປອ ຄຳຫຼ້າ ນົນອາລິນສະຫວັດ ສະມາຊິກທີມ: ທ້າວ ມັກມີພົນ ໄຊຊະນະ ທ້າວ ເພັດນິນ ພົງຍາລັກ ແລະ ທ້າວ ສີຣິສັກ ສີປະສົງ.
ຄວາມສຳເລັດໃນຄັ້ງນີ້ ບໍ່ພຽງແຕ່ນຳຄວາມພາກພູມໃຈມາສູ່ສະຖາບັນ ແລະ ປະເທດຊາດ ແຕ່ຍັງເປັນໂອກາດໃຫ້ນັກສຶກສາລາວໄດ້ແລກປ່ຽນຄວາມຮູ້ ແລະ ປະສົບການກັບນານາຊາດ ເພື່ອນຳມາພັດທະນາຕົນເອງ ແລະ ປະເທດຊາດໃນອະນາຄົດ.
ຂໍຮ່ວມສະແດງຄວາມຍິນດີ ແລະ ສົ່ງແຮງໃຈໃຫ້ທີມ “Computer Science NUOL” ທີ່ໄດ້ນຳຊື່ສຽງຂອງລາວສູ່ເວທີສາກົນ.
ຂ່າວ: ສສກ
