ເມື່ອບໍ່ດົນມານີ້, ທີ່ສຳນັກງານສູນກາງແນວລາວສ້າງຊາດ, ທ່ານ ກິແກ້ວ ໄຂຄຳພິທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້າຢ້ຽມພົບປະຂອງ ທ່ານ ນາງ ເມແກນ ຈອນສ໌ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ອົດສະຕຣາລີ ປະຈໍາ ສປປ ລາວ ໂດຍ ທ່ານ ປະທານ ສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທ່ານທູດ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງການທູດ ຢູ່ ສປປ ລາວ ຊຶ່ງເປັນການປະກອບສ່ວນສຳຄັນເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ລາວ-ອົດສະຕຣາລີ ທີ່ມີມາຢ່າງຍາວນານ.
ໂອກາດນີ້, ສອງຝ່າຍໄດ້ຕີລາຄາສູງຕໍ່ໝາກຜົນຂອງການຮ່ວມມືໃນໄລຍະຜ່ານມາ ໂດຍສະເພາະ ການສະໜັບສະໜູນທຶນການສຶກສາ ແລະ ການພັດທະນາຊັບພະຍາກອນມະນຸດ, ການຄ້າ, ການລົງທຶນ ແລະ ການຊ່ວຍເຫລືອລ້າເພື່ອການພັດທະນາ (ODA) ແລະ ການຊ່ວຍເຫລືອໃນຂະແໜງສາທາລະນະສຸກ; ໄດ້ປຶກສາຫາລືກ່ຽວກັບການຮ່ວມມືຂອງອົດສະຕຣາລີກັບອົງການຈັດຕັ້ງມະຫາຊົນ, ລວມທັງໂຄງການສະໜັບສະໜູນພໍ່ແມ່ຜູ້ປົກ ຄອງໂດຍຜ່ານສະຫະພັນແມ່ຍິງລາວ ແລະ ແນວລາວສ້າງຊາດ ຊຶ່ງໄດ້ເຂົ້າເຖິງປະຊາຊົນບ້ານຕ່າງໆ; ສອງຝ່າຍຍັງປຶກສາຫາລືກ່ຽວກັບການຮ່ວມມືໃນຂະແໜງສາທາລະນະສຸກ ແລະ ການສຶກສາ, ລວມທັງການສະໜັບສະໜູນດ້ານໂພຊະນາການ, ການສັກຢາປ້ອງກັນພະຍາດ, ການສອນພາສາໃຫ້ເດັກນ້ອຍຢູ່ເຂດຊົນນະບົດ ແລະ ອື່ນໆ.
ໃນໂອກາດນີ້ ທ່ານເອອັກຄະລັດຖະທຸດອົດສະຕຣາລີ ໄດ້ກ່າວສະແດງຄວາມ ຊົມເຊີຍຕໍ່ທ່ານ ປະທານ ສູນກາງແນວລາວສ້າງຊາດ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນປະທານສູນກາງແນວລາວສ້າງຊາດ ແລະ ຂອບໃຈຢ່າງຈິງໃຈຕໍ່ການຕ້ອນຮັບອັນອົບອຸ່ນ ແລະ ຢືນຢັນວ່າ ຈະສືບຕໍ່ຊຸກຍູ້ການພົວພັນຮ່ວມມືໃຫ້ມີທ່າຂະຫຍາຍຕົວຂຶ້ນເລື້ອຍໆ, ພ້ອມທັງຈະສືບຕໍ່ສະໜັບສະໜູນ ສປປ ລາວ ໃນຂອບການຮ່ວມມືອາຊຽນ ແລະ ການພັດທະນາເສດຖະກິດ-ສັງຄົມ ໃນຊຸມປີຕໍ່ໜ້າ.
