ຄະນະບໍລິຫານງານພັກສະພາແຫ່ງຊາດ (ສພຊ) ຈັດກອງປະຊຸມເຜີຍແຜ່ເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ປະກາດກົງຈັກການຈັດຕັ້ງ, ປະກາດພະນັກງານຮັບອຸດໜູນບຳນານ ແລະ ປະກາດແຕ່ງຕັ້ງຕຳແໜ່ງບໍລິຫານພາຍໃນສະພາແຫ່ງຊາດ ໃນວັນທີ 12 ພຶດສະພາ ນີ້ ໂດຍການເປັນປະທານຂອງ ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ເລຂາຄະນະບໍລິຫານງານພັກ ປະທານສະພາແຫ່ງຊາດ, ມີຄະນະບໍລິຫານງານພັກ, ຄະນະພັກຮາກຖານ, ຄະນະໜ່ວຍພັກຮາກຖານ, ຄະນະໜ່ວຍພັກ, ສະມາຊິກພັກ ແລະ ພະນັກງານ-ລັດຖະກອນພາຍໃນ ສພຊ ເຂົ້າຮ່ວມ.
ກອງປະຊຸມໄດ້ຜ່ານຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ສະບັບບເລກທີ 02/ຄລສພ, ລົງວັນທີ 30 ມັງກອນ 2026; ເຜີຍແຜ່ໂຄງການການເມືອງ ສະບັບທີ 3 ຂອງພັກ; ເຜີຍແຜ່ບົດລາຍງານການເມືອງ, ແຜນພັດທະນາເສດກິດ-ສັງຄົມແຫ່ງຊາດ 5 ປີ ຄັ້ງທີ X; ເຜີຍແຜ່ກົດລະບຽບພັກ ສະໄໝທີ XII.
ຈາກນັ້ນ, ກອງປະຊຸມໄດ້ຮັບຟັງການຜ່ານມະຕິຕົກລົງໃຫ້ພະນັກງານການນຳຂັ້ນສູງ ແລະ ຂັ້ນກົມ ຮັບອຸດໜູນບຳນານ; ມະຕິຮັບຮອງກົງຈັກຂອງສະພາແຫ່ງຊາດ ຊຶ່ງປະກອບມີ 20 ກົມ, 57 ພະແນກ; ມະຕິແຕ່ງຕັ້ງ, ຍົກຍ້າຍ ພະນັກງານຂັ້ນກົມ ພ້ອມທັງຈັດພິທີມອບ-ຮັບມະຕິຕົກລົງໃຫ້ພະນັກງານຮັບອຸດໜູນບຳນານ ແລະ ມະຕິແຕ່ງຕັ້ງ, ຍົກຍ້າຍພະນັກງານຂັ້ນກົມ.
ໂອກາດນີ້, ສະຫາຍ ໄຊສົມພອນ ພົມວິຫານ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜູ້ທີ່ໄດ້ຮັບນະໂຍບາຍອອກພັກການ-ຮັບອຸດໜູນບຳນານໃນຄັ້ງນີ້ ຈໍານວນ 30 ທ່ານ ທີ່ລ້ວນແຕ່ມີຜົນງານພົ້ນເດັ່ນຫຼາຍດ້ານ ແລະ ອຸທິດສະຕິປັນຍາ, ຄວາມຮູ້-ຄວາມສາມາດ, ມີຄວາມເປັນແບບຢ່າງ, ມີນໍ້າໃຈເສຍສະລະ ແລະ ຄວາມຮັບຜິດຊອບສູງຕໍ່ໜ້າທີ່ການເມືອງ, ປະກອບສ່ວນຢ່າງຕັ້ງໜ້າເຂົ້າໃນວຽກງານຂອງສະພາແຫ່ງຊາດ ກໍຄື ການເຮັດຫຼ້ອນໜ້າທີ່ອັນມີກຽດຂອງຕົນ ຕະຫຼອດໄລຍະຜ່ານມາ. ສໍາລັບຫົວໜ້າກົມ, ຮອງຫົວໜ້າກົມ ທີ່ມີການສັບປ່ຽນຢູ່ພາຍໃນສະພາແຫ່ງຊາດນັ້ນ ກໍຈະເປັນໂອກາດໄດ້ທົດສອບພຶດຕິກໍາຕົວຈິງຢ່າງຮອບດ້ານ ໃຫ້ມີຄວາມຊໍານານໃນຫຼາຍວຽກງານ, ເປັນການສ້າງຖັນແຖວພະນັກງານໃຫ້ສົມຄູ່ກັບໜ້າທີ່ການເມືອງທີ່ໄດ້ຮັບມອບໝາຍ ເພື່ອເຮັດໃຫ້ການຈັດຕັ້ງມີສະຖຽນລະພາບ, ມີການເຄື່ອນໄຫວຢ່າງຕັ້ງໜ້າ ແລະ ມີປະສິດທິພາບສູງຂຶ້ນກວ່າເກົ່າ. ປັດຈຸບັນ, ບັນຫາທີ່ຮີບດ່ວນແມ່ນແຕ່ລະກໍາມາທິການ ແລະ ຫ້ອງວ່າການສະພາແຫ່ງຊາດ ຈະຕ້ອງເອົາໃຈໃສ່ປັບປຸງກົນໄກການເຮັດວຽກ ກໍຄືປັບປຸງການຈັດຕັ້ງ ແລະ ການເຄື່ອນໄຫວຂອງຕົນໃຫ້ມີຄວາມຄ່ອງຕົວ, ແທດເໝາະກັບໜ້າທີ່ການເມືອງທີ່ຖືກມອບໝາຍ ດ້ວຍການປັບປຸງບຸກຄະລາກອນໃຫ້ໄປຕາມວິຊາການທີ່ຮຽນມາ ເພື່ອຍົກສູງປະສິດທິຜົນຂອງວຽກງານ; ຈະໄດ້ອອກນິຕິກຳວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະປະຈໍາສະພາແຫ່ງຊາດ, ລະບຽບການດໍາເນີນກອງປະຊຸມສະພາແຫ່ງຊາດ, ກອງປະຊຸມຄະນະປະຈໍາສະພາແຫ່ງຊາດ ແລະ ອື່ນໆ. ພ້ອມກັນນັ້ນ, ໃຫ້ເອົາໃຈໃສ່ຈັດຕັ້ງຜັນຂະຫຍາຍທິດທາງແຜນການ 5 ປີ (2026-2030) ຂອງສະພາແຫ່ງຊາດ ຊຸດທີ X ທີ່ໄດ້ກໍານົດເອົາ 9 ທິດທາງລວມ, 7 ແຜນວຽກ, 5 ແຜນງານ ແລະ 25 ໂຄງການ ແລະ ສູ້ຊົນສ້າງ ແລະ ປັບປຸງກົດໝາຍ ໃຫ້ໄດ້ທັງໝົດ 91 ສະບັບ (ສ້າງໃໝ່ 19 ສະບັບ ແລະ ປັບປຸງ 72 ສະບັບ) ທີ່ກອງປະຊຸມຄັ້ງປະຖົມມະລືກໄດ້ຮັບຮອງເອົາ.
