ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 13 ພຶດສະພາ ຜ່ານມາ ຢູ່ນະຄອນຫຼວງຮ່າໂນ້ຍ, ທ່ານ ເຈິ່ນແທັງເໝິນ ປະທານສະພາແຫ່ງຊາດ ຫວຽດນາມ ໄດ້ເປັນປະທານການເຮັດວຽກກັບຄະນະຊີ້ນຳຂອງສະພາແຫ່ງ ຊາດກ່ຽວກັບການພັດທະນາວິທະຍາສາດ, ເຕັກໂນໂລຊີ, ນະວັດຕະກຳ, ການຫັນເປັນດີຈີຕອນແຫ່ງຊາດ ແລະ ຄະນະຊີ້ນຳການຫັນເປັນດີຈີຕອນຂອງສະພາແຫ່ງຊາດ.
ທ່ານ ເຈິ່ນແທັງເໝິນ ກ່າວຄຳເຫັນໃນວາລະເຮັດວຽກວ່າ: ການຫັນເປັນດີຈີຕອນ ບໍ່ພຽງແຕ່ແມ່ນການລົງທຶນດ້ານຊັອຟແວ, ລະບົບ ຫຼື ພື້ນຖານເຕັກໂນໂລຊີເທົ່ານັ້ນ ຫາກຍັງຕ້ອງສ້າງການປ່ຽນແປງຢ່າງແທ້ຈິງໃນແບບວິທີເຮັດວຽກ, ຄຸນນະພາບການເປັນເສນາທິການ, ປະສິດທິຜົນການເຄື່ອນໄຫວ. ການຫັນເປັນດີຈີຕອນ ບໍ່ແມ່ນຄຳຂວັນເທົ່ານັ້ນ ຫາກຕ້ອງເຮັດຢ່າງແທ້ຈິງ ແລະ ນຳເຂົ້າໃຊ້ຢ່າງມີປະສິດທິຜົນ.
ກ່ຽວກັບການໝູນໃຊ້ປັນຍາປະດິດ (AI) ໃນໄລຍະ 2026 – 2027, ທ່ານປະທານສະພາແຫ່ງຊາດຮຽກຮ້ອງໃຫ້ສ້າງລະບົບນິເວດການຮ່ວມມືຢູ່ພາຍໃນ ແລະ ຕ່າງປະເທດ, ເຊື່ອມຕໍ່ສະພາແຫ່ງຊາດ ກັບບັນດາລັດຖະສະພາໃນໂລກ ແລະ ປະຊາຄົມ AI ຢູ່ ຫວຽດນາມ ແລະ ໃນໄລຍະຈະມາເຖິງ ຕ້ອງເຮັດຫຍັງແດ່, ເຮັດຄືແນວໃດ ເພື່ອຫັນເປັນດີຈີຕອນ, ໝູນໃຊ້ປັນຍາປະດິດ (AI) ຢ່າງແທ້ຈິງ ແລະ ດີກວ່າເກົ່າ. ຖ້າເຮັດສິ່ງດັ່ງກ່າວໄດ້ເປັນຢ່າງດີ ພວກເຮົາຈຶ່ງຈະແກ້ໄຂບັນດາຈຸດອຸດຕັນກ່ຽວກັບລະບອບລະບຽບການໄດ້.
