ວິທະຍຸ-ໂທລະພາບ ສູນກາງຈີນ, ວັນທີ 4 ພຶດສະພານີ້, ຂະບວນລົດໄຟຂາກັບ ອາຊຽນ ທີ່ໄດ້ບັນທຸກແປ້ງມັນຕົ້ນ ໄດ້ເດີນທາງເຖິງທ່າທາງບົກສາກົນ ນະຄອນເຈິ້ງໂຈ່ວ ຢ່າງສະດວກ ແລະ ສຳເລັດການແຈ້ງຜ່ານດ່ານຕາມຮູບແບບ “ແຈ້ງຜ່ານດ່ານເຂົ້າ-ອອກເມືອງຢ່າງວ່ອງໄວຕາມເສັ້ນທາງລົດໄຟ” ຢູ່ສູນເຕົ້າໂຮມຂະບວນລົດໄຟຈີນ-ເອີຣົບ (ເຈິ້ງໂຈ່ວ) ເປັນຄັ້ງທຳອິດ. ຂະບວນລົດໄຟດັ່ງກ່າວ ມີຕູ້ສິນຄ້າ 35 ຕູ້, ມີສິນຄ້າໜັກ ປະມານ 900 ໂຕນ, ເດີນທາງອອກຈາກສະຖານີວຽງຈັນຂອງ ສປປ ລາວ ແລະ ເຂົ້າສູ່ ສປ ຈີນ ໂດຍຜ່ານດ່ານສາກົນບໍ່ເຕ່ນ-ບໍ່ຫານ, ໃຊ້ເວລາພຽງ 5 ມື້ກໍເດີນທາງເຖິງ ນະຄອນເຈິ້ງໂຈ່ວ ເທດສະບານແຂວງເຫີໜານຂອງ ສປ ຈີນ. ຕາມຂ່າວແຈ້ງວ່າ: ຮູບແບບດັ່ງກ່າວໄດ້ເຮັດໃຫ້ເວລາແຈ້ງຜ່ານດ່ານຫລຸດລົງ ປະມານ 24 ຊົ່ວໂມງ, ຕູ້ສິນຄ້າມາດຕະຖານແຕ່ລະຕູ້ສາມາດປະຢັດຕົ້ນທຶນໄດ້ຫລາຍກວ່າ 200 ຢວນ. ການສຳເລັດການທົດລອງຮູບແບບ “ແຈ້ງຜ່ານດ່ານຢ່າງວ່ອງໄວຕາມເສັ້ນທາງລົດໄຟ” ຄັ້ງນີ້ ໄດ້ບັນລຸການປະຕິບັດງານຄົບວົງຈອນແບບ “ນຳເຂົ້າ-ແຈ້ງຜ່ານດ່ານ-ເຂົ້າສາງ-ຄ້າຂາຍ-ຈັດສົ່ງ” ພ້ອມທັງໄດ້ກາຍເປັນບົດຮຽນແຫ່ງຜົນສຳເລັດທີ່ສາມາດເຜີຍແຜ່ໄດ້ໃຫ້ແກ່ການສ້າງສູນປ່ຽນຖ່າຍສິນຄ້າລາຍໃຫຍ່ຕ່າງໆ ແລະ ບັນລຸການແຈ້ງຜ່ານດ່ານຢູ່ທ້ອງຖິ່ນຕ່າງໆ ຢ່າງເປັນປົກກະຕິ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
