ວັນທີ 23 ເມສານີ້ ທີ່ໂຮງແຮມສຸພັກຕຣາ ນະຄອນ ຫຼວງພະບາງ ແຂວງຫຼວງພະບາງ ໄດ້ມີການລົງນາມໃນບົດບັນທຶກຄວາມເຂົ້າໃຈ (MOU) ເພື່ອເປີດ “ໂຄງການສ້າງຄວາມເຂັ້ມແຂງ ໃຫ້ແກ່ຊຸມຊົນ-ຊົນເຜົ່າ ເພື່ອການປັບໂຕ ເຂົ້າກັບການປ່ຽນແປງດິນຟ້າອາກາດແບບ ມີສ່ວນຮ່ວມໃນຂົງເຂດລຸ່ມແມ່ນ້ຳຂອງ (MAP)”, ໂດຍເປັນປະທານຮ່ວມຂອງ ທ່ານ ຈິນດາວົງ ໂພສີຄຳ ຮອງປະທານຄະນະກຳມະການປົກຄອງແຂວງຫຼວງພະບາງ, ທ່ານ ນາງ ແກ້ວປາລິນາ ວົງໂພສີ ຜູ້ຕາງໜ້າຮັກສາການແທນ ອົງການແຄຣ໌ ນານາຊາດ ປະຈຳ ສປປ ລາວ, ມີຕາງໜ້າຜູ້ໃຫ້ທືນ ແລະ ພາກສ່ວນກ່ຽວຂ້ອງທັງສອງແຂວງ ເຂົ້າຮ່ວມ.
ໂຄງການນີ້, ມີກຳນົດດຳເນີນງານນັບແຕ່ປັດຈຸບັນ ຈົນເຖິງ ວັນທີ 31 ພຶດສະພາ 2029, ໂດຍຕອບສະໜອງບັນດາບຸລິມະສິດຮ່ວມກັນ ໃນດ້ານຄວາມທົນທານຕໍ່ສະພາບອາກາດ, ຄວາມສະເໝີພາບຍິງ-ຊາຍ ແລະ ການມີສ່ວນຮ່ວມ, ຊຶ່ງຈະໄດ້ເນັ້ນສ້າງຄວາມເຂັ້ມແຂງໃຫ້ແມ່ຍິງບັນດາເຜົ່າ, ຊາວໜຸ່ມ ແລະ ຄົນພິການ ໃນ 10 ບ້ານຂອງເມືອງຈອມເພັດ ແຂວງຫຼວງພະບາງ ແລະ 10 ບ້ານຂອງເມືອງໃໝ່ ແຂວງຜົ້ງສາລີ ໃຫ້ເປັນຜູ້ນໍາພາໃນການປັບຕົວຕໍ່ສະພາບອາກາດ, ໂດຍມີກິດຈະກຳຫຼັກຄື: ເພີ່ມການຮັບຮອງເອົາຍຸດທະສາດ ແລະ ເຕັກນິກການຜະລິດກະສິກຳ ຮັບມືກັບການປ່ຽນແປງສະພາບອາກາດ (Climate-Smart Agriculture) ທີ່ໄດ້ຮັບການພິສູດແລ້ວມາໃຊ້ ເພື່ອຊ່ວຍເສີມສ້າງຄວາມສາມາດໃນການຟື້ນຕົວຂອງການດໍາລົງຊີວິດໃນຊຸມຊົນ, ປັບປຸງຕາໜ່າງຄວາມປອດໄພ ໃຫ້ແກ່ຊຸມຊົນເພື່ອຮັບມືກັບການສູນເສຍ ແລະ ຄວາມເສຍຫາຍ (Lost & Damage) ຈາກການປ່ຽນແປງສະພາບອາກາດ, ເພີ່ມການມີສ່ວນຮ່ວມຂອງແມ່ຍິງ, ຊາວໜຸ່ມ ແລະ ຄົນພິການຊົນເຜົ່າ ໃນຂະບວນການຕັດສິນໃຈທີ່ກ່ຽວຂ້ອງກັບ ສະພາບອາກາດຂັ້ນແຂວງ, ຂັ້ນສູນກາງ ແລະ ພາກພື້ນ. ຊຶ່ງຈະນຳໃຊ້ງົບປະມານທັງໝົດ 2,468,108 ໂດລາອົດສະຕຣາລີ. ໃນນັ້ນ, ແຂວງຫຼວງພະບາງ 1,234,251 ໂດລາອົດສະຕຣາລີ ແລະ ແຂວງຜົ້ງສາລີ 1,233,857 ໂດລາອົດສະຕຣາລີ, ໂດຍໄດ້ຮັບການສະໜອງທຶນຈາກ ລັດຖະບານອົດສະຕຣາລີ ໂດຍຜ່ານຄູ່ຮ່ວມງານແມ່ນ້ຳຂອງ-ອົດສະຕຣາລີ ແລະ ຈັດຕັ້ງປະຕິບັດໂດຍອົງການແຄຣ໌ ນາໆຊາດ ປະຈຳ ສປປ ລາວ ແລະ ບັນດາຄູ່ຮ່ວມງານໃນຂັ້ນທ້ອງຖິ່ນ, ເຊື່ອມໂຍງກຸ່ມອອມຊັບ ເຂົ້າກັບ ກະສິກຳແບບຕະຫຼາດ ເພື່ອສ້າງຄວາມເປັນເອກະລາດທາງດ້ານການເງິນ ແລະ ຕົວແບບການພັດທະນາທີ່ຍືນຍົງໃນທົ່ວພາກພື້ນແມ່ນໍ້າຂອງ.
ທ່ານ ຈິນດາວົງ ໂພສີຄຳ ໄດ້ມີຄຳເຫັນວ່າ: ການເຊັນບົດບັນທຶກຄວາມເຂົ້າໃຈ (MOU) ຄັ້ງນີ້, ເປັນຂີດໝາຍສຳຄັນໃນການຮ່ວມມືຈັດຕັ້ງປະຕິບັດໂຄງການ ສ້າງຄວາມເຂັ້ມແຂງໃຫ້ຊຸມຊົນບັນດາເຜົ່າ ເພື່ອປັບຕົວເຂົ້າກັບການປ່ຽນແປງດິນຟ້າອາກາດ ຢູ່ແຂວງຜົ້ງສາລີ ແລະ ຫຼວງພະບາງ, ແນໃສ່ຍົກລະດັບຊີວິດການເປັນຢູ່ຂອງປະຊາຊົນ ເຂດຫ່າງໄກສອກຫຼີກ ໂດຍສົ່ງເສີມກະສິກຳຍືນຍົງ ແລະ ການມີສ່ວນຮ່ວມຂອງຊຸມຊົນ ເພື່ອແກ້ໄຂຄວາມທຸກຍາກ. ພ້ອມນີ້, ທ່ານໄດ້ກ່າວຂອບໃຈ ລັດຖະບານອົດສະຕຣາລີ ແລະ ອົງການແຄຣ໌ ນານາຊາດ ທີ່ໃຫ້ການຊ່ວຍເຫຼືອດ້ານງົບປະມານ ແລະ ເຕັກນິກ ເພື່ອພັດທະນາ ສປປ ລາວ ໃຫ້ຍືນຍົງ.
ຮ່ວມລົງນາມບົດບັນທຶກຄັ້ງນີ້, ມີທ່ານ ນາງ ແກ້ວປາລິນາ ວົງໂພສີ, ທ່ານ ສົມແວວເພັດ ດວງປະສິດ ຫົວໜ້າພະແນກກະສິກຳ ແລະ ສີ່ງແວດລ້ອມ ແຂວງຫຼວງພະບາງ ແລະ ທ່ານ ທອງ ອາລີ ຫົວໜ້າພະແນກກະສິກຳ ແລະ ສີ່ງແວດລ້ອມ ແຂວງຜົ້ງສາລີ.
