ກອງປະຊຸມພົບປະສອງຝ່າຍຢ່າງເປັນທາງການ ລະຫວ່າງ ຄະນະນໍາການທະຫານຂັ້ນສູງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສັງຄົມນິຍົມຫວຽດນາມ ໄດ້ຈັດຂຶ້ນຢ່າງສົມກຽດ ແລະ ອົບອຸ່ນ ໃນວັນທີ 22 ເມສາ 2026 ນີ້, ໂດຍມີຈຸດປະສົງເພື່ອສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະຫຸ້ນສ່ວນຍຸດທະສາດ ລະຫວ່າງ ສອງຊາດ, ສອງພັກ, ສອງກອງທັບ ລາວ-ຫວຽດນາມ. ຝ່າຍລາວ ນຳໂດຍ ສະຫາຍ ພົນໂທ ສາຍໃຈ ກົມມະສິດ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ ປະຊາຊົນລາວ ພ້ອມຄະນະ ແລະ ຝ່າຍຫວຽດນາມ ນໍາໂດຍ ສະຫາຍ ພົນເອກ ຫງວຽນ ເຕິນ ເກືອງ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ ພ້ອມຄະນະ.
ໃນການພົບປະ, ທັງສອງຝ່າຍໄດ້ຕີລາຄາສູງຕໍ່ໝາກຜົນແຫ່ງການພົວພັນຮ່ວມມື ລະຫວ່າງ ສອງກອງທັບ ໃນໄລຍະຜ່ານມາ ເຊິ່ງໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ມີປະສິດທິຜົນສູງ ເປັນຕົ້ນແມ່ນ: ການແລກປ່ຽນຄະນະຜູ້ແທນຂັ້ນຕ່າງໆ ຢ່າງເປັນປົກກະຕິ, ການຮ່ວມມືດ້ານວຽກງານພັກ-ວຽກງານການເມືອງ, ການກໍ່ສ້າງຊັບພະຍາກອນມະນຸດ ແລະ ການເຝິກອົບຮົມວິຊາສະເພາະ, ການປະສານສົມທົບໃນການຮັກສາຄວາມສະຫງົບ ຕາມບໍລິເວນຊາຍແດນ ລາວ-ຫວຽດນາມ ໃຫ້ມີຄວາມສະຖຽນລະພາບ ແລະ ເປັນຊາຍແດນແຫ່ງມິດຕະພາບ, ສັນຕິພາບ ແລະ ການພັດທະນາ.
ພ້ອມດຽວກັນນັ້ນ, ສອງຝ່າຍໄດ້ເຫັນດີເປັນເອກະພາບຈະສືບຕໍ່ເພີ່ມທະວີການຮ່ວມມືໃນຫຼາຍດ້ານ ເພື່ອຮັດແໜ້ນຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ສອງກອງທັບ ໃຫ້ໝັ້ນຄົງທະນົງແກ່ນຕະຫຼອດໄປ, ສືບຕໍ່ຊ່ວຍເຫຼືອເຊິ່ງກັນ ແລະ ກັນ ໃນການບຳລຸງ-ກໍ່ສ້າງນາຍທະຫານ ແລະ ຊ່ຽວຊານວິຊາການ, ຈັດຕັ້ງປະຕິບັດອະນຸສັນຍາ: ສືບຕໍ່ຜັນຂະຫຍາຍແຜນການຮ່ວມມືປະຈຳປີ ທີ່ສອງກະຊວງປ້ອງກັນປະເທດໄດ້ລົງນາມຮ່ວມກັນໃຫ້ປາກົດຜົນເປັນຈິງ.
ການພົບປະໃນຄັ້ງນີ້ ໄດ້ດຳເນີນໄປດ້ວຍບັນຍາກາດແຫ່ງຄວາມສະໜິດສະໜົມ, ບົນຈິດໃຈແຫ່ງຄວາມເຂົ້າອົກເຂົ້າໃຈ ແລະ ໄວ້ເນື້ອເຊື່ອໃຈເຊິ່ງກັນ ແລະ ກັນ, ປະກອບສ່ວນອັນສຳຄັນເຂົ້າໃນການຮັດແໜ້ນສາຍພົວພັນມິດຕະພາບອັນຍິ່ງໃຫຍ່ ລະຫວ່າງ ລາວ-ຫວຽດນາມ ໃຫ້ແຕກດອກອອກຜົນຍິ່ງໆ ຂຶ້ນ.
