ວັນທີ 22 ເມສານີ້ ທີ່ ຄະນະໂຄສະນາອົບຮົມສູນກາງພັກ (ຄອສພ), ທ່ານ ຄໍາພັນ ເຜີຍຍະວົງ ກຳມະການກົມການເມືອງສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ໃຫ້ກຽດຕ້ອນ ຮັບການເຂົ້າຢ້ຽມຂໍ່ານັບຂອງ ທ່ານນາງ ຟາງ ຫົງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ພ້ອມຄະນະ, ໂດຍມີຫົວໜ້າກົມ-ຮອງກົມ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ການເຂົ້າຢ້ຽມຂໍ່ານັບໃນຄັ້ງນີ້, ເພື່ອສະແດງຄວາມຍິນດີ, ຊົມເຊີຍ ທ່ານ ຄໍາພັນ ເຜີຍຍະວົງ ທີ່ໄດ້ຮັບຕໍາແໜ່ງໃໝ່ເມື່ອບໍ່ດົນຜ່ານມານີ້. ພ້ອມນັ້ນ, ປີນີ້ ກໍເປັນປີທີ່ສໍາຄັນຂອງສອງປະເທດລາວ-ຈີນ ຊຶ່ງເປັນປີສ້າງຕັ້ງສາຍພົວພັນການທູດລາວ-ຈີນ ຄົບຮອບ 65 ປີ ແລະ ເພື່ອຮັດແໜ້ນສາຍພົວພັນຮ່ວມມືໃນຕໍ່ໜ້າ.
ໂອກາດນີ້, ທ່ານ ຄໍາພັນ ເຜີຍຍະວົງ ໄດ້ກ່າວສະແດງການຕ້ອນຮັບຢ່າງອົບອຸ່ນ ແລະ ສະ ແດງຄວາມຂອບໃຈນໍາ ທ່ານ ນາງ ຟາງ ຫົງ ທີ່ໄດ້ມາອວຍພອນໃນຄັ້ງນີ້, ໃນໄລຍະຜ່ານມາລາວ-ຈີນ ກໍຄື ຄອສພ ໄດ້ມີການພົວພັນຮ່ວມມືອັນດີງາມໃນວຽກງານຕ່າງໆຕະຫຼອດຜ່ານມາ. ໃນຫວ່າງບໍ່ດົນມານີ້ກໍຈັດກິດຈະກຳສາຍຮູບເງົາລາວ-ຈີນຢູ່ນະຄອນຫຼວງວຽງຈັນຂຶ້ນ ເພື່ອສະເຫຼີມສະຫຼອງປີສ້າງ ຕັ້ງສາຍພົວພັນການທູດລາວ-ຈີນ ຄົບຮອບ 65 ປີ ຊຶ່ງເຫັນວ່າມີບັນຍາກາດທີ່ດີ, ຄອສພ ຍັງໄດ້ແຈ້ງການກະກຽມ ຈັດກິດຈະກຳຮ່ວມກັບພາກສ່ວນກ່ຽວຂ້ອງຕື່ມອີກກ່ຽວກັບການຈັດກິດຈະກໍາຕ່າງໆ ເພື່ອສະເຫຼີມສະຫຼອງວັນດັ່ງກ່າວ ໃນວັນທີ 24 ເມສາ 2026 ນີ້ ໃຫ້ທ່ານທູດ ສປ ຈີນ ປະຈໍາລາວ ໄດ້ຮັບຊາບ. ພ້ອມນັ້ນ, ຈະໃຫ້ສື່ມວນຊົນພາກສ່ວນຕ່າງໆ ສືບຕໍ່ໂຄສະນາວຽກງານດັ່ງກ່າວໃຫ້ກວ້າງຂວາງ, ເລິກເຊິ່ງຕື່ມອີກ, ພ້ອມຈະມີການຈັດສໍາມະນາໃນຫົວຂໍ້ສໍາຄັນຕ່າງໆ. ທ່ານ ຄໍາພັນ ເຜີຍຍະວົງ ຍັງໄດ້ສະແດງຄວາມຂອບໃຈນໍາທ່ານທູດ, ພ້ອມຄະນະ ທີ່ຍາມໃດກໍໃຫ້ການຊ່ວຍເຫຼືອ ຄອສພ ຕະຫຼອດໄລຍະຜ່ານມາ ແລະ ຍິນດີໃຫ້ການພົວພັນຮ່ວມມືໃນວຽກງານຕ່າງໆໃນຕໍ່ໜ້າໂດຍສະເພາະວຽກງານໂຄສະນາ, ສື່ມວນຊົນໃຫ້ນັບມື້ສະໜິດແໜ້ນຂຶ້ນເປັນກ້າວໆ.
ທ່ານ ນາງ ຟາງ ຫົງ ໄດ້ກ່າວສະແດງຄວາມຂອບໃຈນໍາ ທ່ານ ຄໍາພັນ ເຜີຍຍະວົງ ພ້ອມຄະນະ ໃຫ້ກຽດຕ້ອນຮັບຢ່າງອົບອຸ່ນ ພ້ອມຍິນດີສືບຕໍ່ໃຫ້ການພົວພັນຮ່ວມມືໃນວຽກງານຕ່າງໆໃນຕໍ່ໜ້າໃຫ້ແໜ້ນແຟ້ນຂຶ້ນເລື້ອຍໆ.
