ພິທີເປີດການນໍາໃຊ້ ໂຄງການເຊື່ອມຕໍ່ສາຍສົ່ງໄຟຟ້າແຮງສູງ 500 ກິໂລໂວນ ລາວ-ຈີນ ຢ່າງເປັນທາງການ ໂດຍການໃຫ້ກຽດເຂົ້າຮ່ວມເປີດຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ, ມີລັດຖະມົນຕີ ຫົວໜ້າຫ້ອງການສໍານັກງານນາຍົກ, ລັດຖະມົນຕີກະຊວງອຸດສາຫະກຳ ແລະ ການຄ້າ, ລັດຖະມົນຕີກະຊວງກະສິກຳ ແລະ ສິ່ງແວດລ້ອມ, ເລຂາພັກແຂວງຫຼວງນໍ້າທາ, ກໍາມະການປະຈໍາສະພາແຫ່ງຊາດ ປະທານກຳມາທິການເສດຖະກິດ-ການເງິນ, ເອກອັກຄະລັດສະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ, ປະທານສະພາບໍລິຫານ ບໍລິສັດ ຕາຂ່າຍໄຟຟ້າພາກໃຕ້ຈີນ, ປະທານສະພາບໍລິຫານ ບໍລິສັດ ສາຍສົ່ງໄຟຟ້າແຫ່ງຊາດລາວ, ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ບໍລິສັດຄູ່ຮ່ວມພັດທະນາໂຄງການ ແລະ ແຂກຖືກເຊີນເຂົ້າຮ່ວມ ພິທີໄດ້ຈັດຂຶ້ນໃນວັນທີ 20 ເມສາ ນີ້ ທີ່ ໂຮງແຮມແລນມາກ ນະຄອນຫຼວງວຽງຈັນ.
ໂຄງການເຊື່ອມຕໍ່ສາຍສົ່ງໄຟຟ້າແຮງສູງ 500 ກິໂລໂວນ ລາວ-ຈີນ ຖືເປັນຜົນສຳເລັດອັນສໍາຄັນໃນການເຊື່ອມຕໍ່ດ້ານພະລັງງານໄຟຟ້າ ລະຫວ່າງ ສປປ ລາວ ແລະ ສປ ຈີນ ແລະ ຈະເປັນການເຊື່ອມຈອດດ້ານພະລັງງານໄຟຟ້າ ສປ ຈີນ ກັບ ປະເທດອາຊຽນ ເພື່ອສ້າງຄວາມໝັ້ນຄົງດ້ານພະລັງງານ ເວົ້າລວມ ໂດຍສະເພາະສ້າງຄວາມໝັ້ນຄົງດ້ານພະລັງງານໃຫ້ກັບ ສປປ ລາວ ໃນປັດຈຸບັນ ກໍຄືອະນາຄົດ ແລະ ເປັນໂຄງສ້າງພື້ນຖານດ້ານພະລັງງານທີ່ທັນສະໄໝ ເຮັດໃຫ້ ສປປ ລາວ ເປັນສູນກາງການເຊື່ອມຕໍ່ດ້ານພະລັງງານຂອງພາກພື້ນ ແລະ ເພີ່ມຄວາມສະຖຽນລະພາບໃຫ້ແກ່ລະບົບໄຟຟ້າແຫ່ງຊາດ ຊຶ່ງຈະເພີ່ມຄວາມສາມາດໃນການສົ່ງອອກ-ນໍາເຂົ້າດ້ານພະລັງງານສູ່ຕະຫຼາດສາກົນ ທັງເປັນການຮັດແໜ້ນສາຍພົວພັນການທູດ ແລະ ການຮ່ວມມື ລາວ-ຈີນ ທີ່ແໜ້ນແຟ້ນຢູ່ແລ້ວໃຫ້ແໜ້ນແຟ້ນຍິ່ງຂຶ້ນ ທັງເປັນທ່າແຮງສໍາຄັນໃຫ້ກັບລາວໃນການດຶງດູດການລົງທຶນຈາກຕ່າງປະເທດ ຍົກສູງດ້ານເສດຖະກິດ-ການຄ້າ ການລົງທຶນ ແລະ ຍົກລະດັບຊີວິດການເປັນຢູ່ຂອງ ປະຊາຊົນບັນດາເຜົ່າໃນຂອບເຂດທົ່ວປະເທດໃຫ້ດີຂຶ້ນ ຕາມນະໂຍບາຍຂອງພັກ-ລັດຖະບານກໍານົດໄວ້.
ໂຄງການສາຍສົ່ງໄຟຟ້າແຮງສູງ 500 ກິໂລໂວນ ລາວ-ຈີນ ປະກອບມີ: ການກໍ່ສ້າງສະຖານີໄຟຟ້າ 500 ກິໂລໂວນ ນາໝໍ້ ແຂວງອຸດົມໄຊ ສປປ ລາວ ຫາ ສິບສອງພັນນາ ແຂວງຢູນນານ ສປ ຈີນ ແລະ ຍັງມີສາຍສົ່ງ 230 ກິໂລໂວນ ອີກ 2 ວົງຈອນ ເພື່ອເຊື່ອມຕໍ່ເຂົ້າກັບຕາຂ່າຍໄຟຟ້າຫຼັກໃນພາກເໜືອຂອງລາວ. ນອກຈາກນັ້ນຍັງມີພິທີ ມອບ-ຮັບ ໂຄງການປັບປຸງລະບົບ SCADA ຊຶ່ງເປັນໂຄງການຊ່ວຍເຫຼືອຈາກ ບໍລິສັດຕາຂ່າຍໄຟຟ້າ ພາກໃຕ້ຈີນ ໂດຍການປັບປຸງໃນຄັ້ງນີ້ຈະຊ່ວຍໃຫ້ລະບົບໄຟຟ້າມີຄວາມທັນສະໄໝ ສາມາດຕອບສະໜອງພະລັງງານໄຟຟ້າທັນຕໍ່ເຫດການ ສາມາດແກ້ໄຂບັນຫາໄດ້ວ່ອງໄວ ແລະ ເຮັດໃຫ້ລະບົບໄຟຟ້າມີຄວາມສະຖຽນຂຶ້ນຕື່ມ.
