ຂ່າວຕ່າງປະເທດລາຍງານ ໃນວັນທີ 24 ມີນາ ຜ່ານມາວ່າ: ຄຸນນະພາບອາກາດທົ່ວໂລກຊຸດໂຊມລົງໃນປີ 2025, ຫຼັງຈາກຂໍ້ມູນຈາກເກືອບ 9,500 ເມືອງພົບວ່າມີພຽງແຕ່ 14% ເທົ່ານັ້ນທີ່ຜ່ານມາດຕະຖານຝຸ່ນລະອອງຂະ ໜາດນ້ອຍ (PM2.5) ຂອງອົງການອະນາໄມໂລກ (WHO) ຊຶ່ງຫຼຸດລົງຈາກ 17% ໃນປີກ່ອນ. ໂດຍໄຟໄໝ້ປ່າ ແລະ ມົນລະພິດຈາກອຸດສາຫະກຳ, ພາຫະນະ ແລະ ກະສິກຳ ແມ່ນປັດໄຈຫຼັກທີ່ປະກອບສ່ວນເຮັດໃຫ້ສະພາບອາກາດການຊຸດໂຊມລົງ.
IQAir ບໍລິສັດຊ່ຽວຊານດ້ານເຕັກໂນໂລຊີຄຸນນະພາບອາກາດ ລະບຸໃນບົດລາຍງານວ່າ: ເມືອງທີ່ມີມົນລະພິດຫຼາຍທີ່ສຸດ 25 ເມືອງ ລ້ວນແຕ່ຕັ້ງຢູ່ໃນປະເທດອິນເດຍ, ປາກິສຖານ ແລະ ຈີນ, ໂດຍມີສາເຫດມາຈາກໂຮງງານ, ພາຫະນະ, ພາຍຸຝຸ່ນ ແລະ ການເຜົາພືດຜົນ. ປາກິສຖານ ແລະ ບັງກລາເທດ ມີລະດັບ PM2.5 ສະເລ່ຍສູງທີ່ສຸດ.
ທ່ານ ແຟຣງ ແຮມເມສ ຫົວໜ້າບໍລິຫານ IQAir ກ່າວວ່າ: ມົນລະພິດທາງອາກາດຈະສົ່ງຜົນກະທົບຕໍ່ຄົນຮຸ່ນຫຼັງ ເຮັດໃຫ້ IQ ຕ່ຳລົງ, ຄວາມສາມາດໃນການເຮັດວຽກຫຼຸດລົງ ແລະ ສ້າງພາລະໃຫ້ແກ່ລະບົບການດູແລສຸຂະພາບຈາກຜູ້ທີ່ຕ້ອງການການປິ່ນປົວ ແລະ ຜູ້ທີ່ອອກຈາກກຳລັງແຮງງານ.
ບົດລາຍງານຍັງໄດ້ລະບຸວ່າ: ໃນປີກາຍນີ້, ໄຟໄໝ້ປ່າໃນເອີຣົບ ແລະ ການາດາ ເຮັດໃຫ້ເກີດການປ່ອຍແກ໊ສເຮືອນແກ້ວສູງແບບບໍ່ເຄີຍມີມາກ່ອນ. ທະນາຄານໂລກລາຍງານວ່າ: ມົນລະພິດທາງອາກາດກາງແຈ້ງໄດ້ເຮັດໃຫ້ມີຜູ້ເສຍຊີວິດປະມານ 5.7 ລ້ານຄົນໃນປີ 2020 ແລະ ສ້າງຄວາມເສຍຫາຍທາງເສດຖະກິດ ປະມານ 4.5-6.1 ພັນຕື້ໂດລາຕໍ່ປີ ຫຼືປະມານ 6.5% ຂອງ GDP ທົ່ວໂລກ.
ໃນຂະນະທີ່ບາງປະເທດເຊັ່ນ: ຈີນ ຈະບັງຄັບໃຊ້ມາດຕະຖານຄຸນນະພາບອາກາດທີ່ເຂັ້ມງວດຂຶ້ນກວ່າເກົ່າ, ສະຫະລັດ ອາເມຣິກາ ມີທ່າອ່ຽງທີ່ຈະຜ່ອນຄາຍລະບຽບການພາຍໃຕ້ການຂັບເຄື່ອນຂອງອົງການປົກປ້ອງສິ່ງແວດລ້ອມເພື່ອຫຼຸດຜ່ອນຄ່າໃຊ້ຈ່າຍ ແລະ ເພີ່ມທາງເລືອກໃຫ້ກັບຜູ້ບໍລິໂພກ.
ທ່ານ ກິຕາ ໂກປິນາຣ ອະດີດເຈົ້າໜ້າທີ່ IMF ລະບຸວ່າ: ພາກເໜືອຂອງອິນເດຍໄດ້ປະສົບກັບຄຸນນະພາບອາກາດທີ່ຮ້າຍແຮງທີ່ສຸດໃນຮອບຫຼາຍປີໃນເດືອນພະຈິກ ແລະ ທັນວາ ຜ່ານມາ ຊຶ່ງສົ່ງຜົນກະທົບຕໍ່ເສດຖະກິດຫຼາຍກວ່າພາສີການຄ້າ.
