ຂ່າວສານຊີອາໄອລາຍງານໃນວັນທີ 18 ມີນາ ຜ່ານມາວ່າ: ປີນີ້ແມ່ນປີເລີ່ມຕົ້ນປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 15, ຈີນຈະສືບຕໍ່ປະຕິບັດນະໂຍບາຍການເງິນທີ່ຕັ້ງໜ້າກວ່າເກົ່າ. ຕົ້ນຕໍຈະສຸມໃສ່ສະໜັບສະໜູນການສ້າງຕະຫຼາດພາຍໃນປະເທດທີ່ເຂັ້ມແຂງ; ສະໜັບສະໜູນການເລັ່ງການບົ່ມເພາະ ແລະ ການຂະຫຍາຍຕົວຂອງຕົວຂັບເຄື່ອນການເຕີບໂຕ, ປະຕິບັດການເຄື່ອນໄຫວການພັດທະນາທີ່ມີຄຸນນະພາບສູງຂອງຕ່ອງໂສ້ການຜະລິດທີ່ສຳຄັນຂອງອຸດສາຫະກຳການຜະລິດຕາມລຳດັບ, ຈັດຕັ້ງປະຕິບັດຕົວເມືອງທົດລອງຊຸດທີ 3 ສໍາລັບການຫັນເປັນເຕັກໂນໂລຊີແບບໃໝ່ໃນອຸດສາຫະກຳການຜະລິດ, ສືບຕໍ່ປະຕິບັດນະໂຍບາຍໃຫ້ລາງວັນ ແລະ ໃຫ້ການອຸດໜູນດ້ານການເງິນຕໍ່ວິສາຫະກິດຂະໜາດກາງ ແລະ ນ້ອຍທີ່ມີຄວາມຊ່ຽວຊານ, ມີຄຸນນະພາບສູງ ແລະ ມີຫົວຄິດປະດິດສ້າງ.
ຂະນະດຽວກັນ, ປີນີ້ຈີນຈະເລັ່ງໃສ່ການເພີ່ມການລົງທຶນ, ປັບປຸງໂຄງສ້າງການໃຊ້ຈ່າຍດ້ານວິທະຍາສາດເຕັກໂນໂລຊີໃຫ້ດີຂຶ້ນ, ເລັ່ງລັດການເພິ່ງພາຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໃນການພັດທະນາວິທະຍາສາດເຕັກໂນໂລຊີລະດັບສູງ; ເພີ່ມຄວາມພະຍາຍາມເພື່ອຮັບປະກັນ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ; ຊຸກຍູ້ການຫັນເປັນຕົວເມືອງແບບໃໝ່ ແລະ ການພັດທະນາທ້ອງຖິ່ນທີ່ມີການປະສານງານກັນ; ເລັ່ງລັດຊຸກຍູ້ການຫັນເປັນສີຂຽວຢ່າງຮອບດ້ານ ແລະ ເພີ່ມທະວີການຄຸ້ມຄອງດ້ານການເງິນສາທາລະນະຢ່າງມີວິທະຍາສາດ ແລະ ອື່ນໆ.
