ທ່ານ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ຕ້ອນຮັບການເຂົ້າຢ້ຽມພົບປະຂອງ ທ່ານ ບີນລາ ດຸຣານີ ຕາງໜ້າອົງການກອງທຶນເດັກສະຫະປະຊາຊາດ UNICEF ປະຈໍາ ສປປ ລາວ ພ້ອມດ້ວຍຄະນະ ຢູ່ທີ່ສູນກາງແນວລາວສ້າງຊາດ ໃນວັນທີ 17 ມີນານີ້.
ທ່ານ ບີນລາ ດຸຣານີ ຕາງໜ້າອົງການ UNICEF ໄດ້ສະແດງຮູ້ສຶກເປັນກຽດຢ່າງສູງທີ່ໄດ້ເຂົ້າພົບປະທ່ານປະທານສູນກາງແນວລາວສ້າງຊາດ ໃນໂອກາດທີ່ໄດ້ຮັບໜ້າທີ່ໃໝ່ພ້ອມທັງແຈ້ງຈຸດປະສົງ ແລະ ສະພາບການເຄື່ອນໄຫວວຽກງານຂອງອົງການ UNICEF ໄລຍະຜ່ານມາ ຢູ່ ສປປ ລາວ ໂດຍສະເພາະແມ່ນການຮ່ວມມືກັບແນວລາວສ້າງຊາດ ໃນການຜັນຂະຫຍາຍບຸລິມະສິດແຫ່ງຊາດສົ່ງເສີມສຸຂະພາບທີ່ດີ ໂດຍສະເພາະແມ່ຍິງ-ເດັກນ້ອຍ ແລະ ໄວໜຸ່ມໃນເຂດເປົ້າໝາຍຫ່າງໄກສອກຫຼີກ ແລະ ຊົນເຜົ່າ ຕາມແຜນງານຂອງ UNICEF ຊຶ່ງຜ່ານມາກໍໄດ້ຮັບການຮ່ວມມື ແລະ ສະໜັບສະໜູນຈາກສູນກາງແນວລາວສ້າງຊາດ ຕາມພາລະບົດບາດ ຊຶ່ງຈະເປັນສ່ວນໜຶ່ງໃນການປະກອບສ່ວນເຂົ້າໃນການພັດທະນາທີ່ຍືນຍົງ
ໂອກາດນີ້, ທ່ານປະທານສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ຜົນງານອັນໃຫຍ່ຫຼວງ ຂອງອົງການ UNICEF ໃນຖານະທີ່ເປັນຄູ່ຮ່ວມງານທີ່ຍາວນານຂອງລັດຖະບານ ແລະ ປະຊາຊົນລາວ, ເວົ້າລວມເວົ້າສະເພາະໄດ້ຮ່ວມມືກັບສູນກາງແນວລາວສ້າງຊາດຕະຫຼອດໄລຍະຜ່ານມາ ປີນີ້ ຄົບຮອບ 52 ປີ ຂອງການພົວພັນຮ່ວມມືລະຫວ່າງ ສປປ ລາວ ກັບ UNICEF ແລະ ຫວັງວ່າຈະສືບຕໍ່ຮ່ວມມືຢ່າງໃກ້ຊິດກັບສູນກາງແນວລາວສ້າງຊາດ ພາຍໃຕ້ການນຳພາຂອງພັກ-ລັດ, ເພື່ອສະໜັບສະໜູນບຸລິມະສິດຮ່ວມກັນສຳລັບການສົ່ງເສີມສຸຂະພາບ, ເດັກນ້ອຍ ແລະ ໄວໜຸ່ມລາວ ລວມທັງການບໍລິການທີ່ມີຄຸນນະພາບ: ການສຶກສາ, ສາທາ, ການປົກປ້ອງ ແລະ ສະຫວັດດີການສັງຄົມ ເພື່ອຄວາມຍືດຍຸ່ນທີ່ດີຂຶ້ນໃນການປະເຊີນກັບສະພາບອາກາດ ແລະ ຄວາມສ່ຽງອື່ນໆທີ່ເກີດຂຶ້ນ; ທ່ານໄດ້ຍົກໃຫ້ເຫັນກ່ຽວກັບພາລະບົດບາດ ແລະ ໜ້າທີ່ຫຼັກ ຂອງແນວລາວສ້າງຊາດຕື່ມອີກ.
