ຄະນະຜູ້ແທນສະພາແຫ່ງຊາດລາວ ນຳໂດຍ ທ່ານ ຈັນທະວົງ ແສນອາມາດມົນຕີ ຮອງປະທານກຳມາທິການການຕ່າງປະເທດ ໄດ້ເຂົ້າຮ່ວມກອງປະຊຸມສຸດຍອດ NXT-2026 ທີ່ນະຄອນຫລວງນິວເດລີ, ປະເທດອິນເດຍ ໃນວັນທີ 12-15 ມີນາ 2026 ຜ່ານມາ ພາຍໃຕ້ການເປັນເຈົ້າພາບ ແລະ ການສະໜັບສະໜູນທາງດ້ານງົບປະມານຂອງທ່ານ ກາຣຕິເກຢາ ຊຣາມາ ສະມາຊິກສະພາສູງອິນເດຍ ໂດຍມີບັນດາອະດີດນາຍົກລັດຖະມົນຕີ, ສະມາຊິກລັດຖະສະພາ, ນັກຊ່ຽວຊານ ແລະ ບັນດາອາຈານຂອງມະຫາວິທະຍາໄລຈາກທົ່ວໂລກ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມຄັ້ງນີ້, ທ່ານ ນາເລນດຣາ ໂມດີ ນາຍົກລັດຖະມົນຕີອິນເດຍ ໄດ້ໃຫ້ກຽດເຂົ້າຮ່ວມ ແລະ ກ່າວປາໄສ ໂດຍທ່ານເນັ້ນໜັກເຖິງວິໄສທັດຂອງອິນເດຍກ່ຽວກັບນະວັດຕະກຳ, ການຮ່ວມມືດ້ານເຕັກໂນໂລຊີ, ການເຕີບໂຕທາງດ້ານເສດຖະກິດ, ການຫັນເປັນດີຈິຕອນ, ການຕອບສະໜອງຕໍ່ວິກິດການຕ່າງໆ ແລະ ໂອກາດທີ່ເກີດຂຶ້ນໃໝ່ສຳລັບການຮ່ວມມືສາກົນ. ພ້ອມດຽວກັນ, ກໍຮຽກຮອງໃຫ້ບັນດານັກການເມືອງ, ສື່ມວນຊົນ, ຊາວໜຸ່ມ, ພາກສ່ວນທຸລະກິດ ແລະ ພົນລະເມືອງ ຍົກສູງການຮ່ວມມືກັນເພື່ອການພັດທະນາປະເທດຊາດ.
ຫລັງຈາກນັ້ນ, ບັນດາແຂກທີ່ເຂົ້າຮ່ວມ ແລະ ນັກຊ່ຽວຊານຈາກທົ່ວໂລກ ກໍໄດ້ຜັດປ່ຽນກັນຂຶ້ນກ່າວປາໄສ ແລະ ມີຄຳເຫັນສົນທະນາກ່ຽວກັບວຽກງານສຳຄັນຕ່າງໆ ເຊັ່ນ: ການສິຶກສາ, ອຸດສາຫະກຳ, ຄວາມຍືນຍົງ, ການຄ້າ, ກົດໝາຍ, ການພົວພັນສາກົນ, ດີຈິຕອນ, ປັນຍາປະດິດ, ນະວັດຕະກຳການຮັກສາສຸຂະພາບ, ການເງິນ, ການທະນາຄານ, ການປ້ອງກັນປະເທດ, ຄວາມສະເໝີພາບ, ປັດຊະຍາ ແລະ ອື່ນໆ.
ໂອກາດນີ້, ທ່ານ ຈັນທະວົງ ແສນອາມາດມົນຕີ ໄດ້ຂຶ້ນກ່າວປາໄສພາຍໃຕ້ຫົວຂໍ້ “ການເຊື່ອມໂຍງດີຈິຕອນໃນອາຊຽນ ແລະ ພາກພື້ນອື່ນ” ໂດຍທ່ານຍົກໃຫ້ເຫັນເຖິງການຈັດຕັ້ງປະຕິບັດແຜນແມ່ບົດດີຈິຕອນອາຊຽນ 2020, 2025 ແລະ 2030, ບົດບາດໃນການຊຸກຍູ້ວຽກງານດັ່ງກ່າວຂອງສະມັດຊາລັດຖະສະພາລະຫວ່າງຊາດອາຊຽນ ຫລື ໄອປາ (AIPA), ການຫັນເປັນດີຈິຕອນຂອງ ສປປ ລາວ ແລະ ທິດທາງຂອງວຽກງານດັ່ງກ່າວລະຫວ່າງອາຊຽນກັບພາກພື້ນອື່ນ. ນອກຈາກນັ້ນ, ຍັງໄດ້ຮ່ວມໃນເວທີແລກປ່ຽນສົນທະນາພາຍໃຕ້ຫົວຂໍ້ “ການພົວພັນພາກພື້ນຜ່ານທາງດ້ານວັດທະນະທຳ” ຊຶ່ງທ່ານຍົກໃຫ້ເຫັນເຖິງການດຳເນີນນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືເພື່ອການພັດທະນາ ຂອງ ສປປລາວ, ຕີລາຄາສູງຕໍ່ການພົວພັນຮ່ວມມືລະຫວ່າງ ສປປ ລາວ ກັບ ສາທາລະນະລັດອິນເດຍ, ພ້ອມທັງຍົກໃຫ້ເຫັນເຖິງການຮ່ວມມື ແລະ ຄວາມສາມັກຄີພາຍໃນຄອບຄົວອາຊຽນ ຊຶ່ງການປະກອບຄຳເຫັນຂອງຫົວໜ້າຄະນະຜູ້ແທນລາວ ຕ່າງກໍໄດ້ຮັບຄວາມສົນໃຈ ແລະ ມີການຕອບຮັບທີ່ດີຈາກຜູ້ເຂົ້າຮ່ວມກອງປະຊຸມຢ່າງຫລວງຫລາຍ.
ກອງປະຊຸມຄັ້ງນີ້, ເປັນການສະແດງເຖິງວິໄສທັດຂອງບັນດາຜູ້ນຳ ແລະ ນັກຊ່ຽວຊານທາງດ້ານຕ່າງໆຈາກທົ່ວໂລກ, ພ້ອມທັງເປັນການແລກປ່ຽນປະສົບການ ແລະ ບົດຮຽນເຊິ່ງກັນ ແລະ ກັນ ເພື່ອວາງແນວທາງພື້ນຖານ ແລະ ຂໍ້ລິເລີ່ມສຳລັບໂລກໃນອະນາຄົດ.
ຂໍ້ມູນ-ພາບ: ສພຊ
