ວິທະຍຸ-ໂທລະພາບສູນກາງຈີນ, ວັນທີ 1 ພະຈິກນີ້, ທ່ານ ສີ ຈິ້ນຜິງ ປະທານປະເທດຈີນ ໄດ້ສົ່ງສານຊົມເຊີຍເຖິງ ທ່ານ ອັບດຸນ ຟາຕາ ອັນ ຊິສ ປະທານາທິບໍດີເອຢິບ ເນື່ອງໃນໂອກາດເປີດນຳໃຊ້ຫໍພິພິທະພັນເອຢິບ. ເນື້ອໃນສານຊົມເຊີຍຂອງ ທ່ານ ສີ ຈິ້ນຜິງ ລະບຸວ່າ ສປ ຈີນ ແລະ ເອຢິບ ມີການພົວພັນມິດຕະພາບຮ່ວມກັນມາແຕ່ດົນນານແລ້ວ. ຊຸມປີມໍ່ໆ ມານີ້ສາຍພົວພັນຄູ່ຮ່ວມຍຸດທະສາດຮອບດ້ານ ລະຫວ່າງ ສປ ຈີນ-ເອຢິບ ໄດ້ຮັບການພັດທະນາເປັນຢ່າງດີ, ການແລກປ່ຽນດ້ານວັດທະນະທຳ ລະຫວ່າງ ສອງປະເທດມີຈຸດເດັ່ນທີ່ຫລາກຫລາຍ. ການຈັດ “ງານວາງສະແດງອະລິຍະທຳເອຢິບບູຮານ” ຢູ່ຫໍພິພິທະພັນຊຽງໄຮ້ ໄດ້ຮັບຜົນສຳເລັດຢ່າງຈົບງາມ, ໜ່ວຍງານສຳຫລວດບູຮານຄະດີຮ່ວມຂອງ ສປ ຈີນ ແລະ ເອຢິບ ພວມຮ່ວມກັນຄົ້ນຫາອະລິຍະທຳເອຢິບບູຮານທີ່ໜ້າອັດສະຈັນຢູ່ທາດປີຣາມິດຊາກຄາຣາ. ໂດຍທັງສອງອະລິຍະທຳບູຮານກ້າວໄປສູ່ເປົ້າໝາຍດຽວກັນ, ປະຊາຊົນສອງຊາດ ມີຄວາມເຂົ້າໃຈ ແລະ ຄວາມສະໜິດສະໜົມກັນນັບມື້ນັບເພີ່ມຂຶ້ນ. ປັດຈຸບັນ, ສະພາບການປ່ຽນແປງທີ່ບໍ່ເຄີຍມີມາກ່ອນໃນຮອບຮ້ອຍປີຂອງໂລກພວມຜັນແປໄວຂຶ້ນ, ສປຈີນ ແລະ ເອຢິບ ທີ່ເປັນ 2 ອະລິຍະທຳບູຮານຄວນສືບຕໍ່ລົງເລິກການແລກປ່ຽນດ້ານອະລິຍະທຳ, ເພີ່ມແຮງຂັບເຄື່ອນໃໝ່ເຂົ້າໃນການພັດທະນາ ຂອງສາຍພົວພັນຄູ່ຮ່ວມຍຸດທະສາດຮອບດ້ານ ລະຫວ່າງ ສປ ຈີນ-ເອຢິບ ຢ່າງບໍ່ຢຸດຢັ້ງ, ເຕົ້າໂຮມກຳລັງແຮງ ຂອງອະລິຍະທຳເພື່ອສ້າງປະຊາຄົມຮ່ວມຊາຕາກຳຂອງມວນມະນຸດ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
