ຂ່າວຕ່າງປະເທດລາຍງານ ໃນວັນທີ 1 ກັນຍາ ຜ່ານມາວ່າ: ທະນາຄານໂລກ (World Bank) ໄດ້ອະນຸມັດເງິນກູ້ ແລະ ເງິນຊ່ວຍເຫຼືອມູນຄ່າທັງໝົດ 105 ລ້ານໂດລາ ເພື່ອສະໜັບສະໜູນໂຄງການພັດທະນາການສຶກສາຢູ່ກຳປູເຈຍ ຊຶ່ງຄາດວ່າຈະຊ່ວຍເຫຼືອເດັກນ້ອຍໄດ້ 1,7 ລ້ານກວ່າຄົນ.
ທະນາຄານໂລກລະບຸວ່າ: ເງິນຈຳນວນດັ່ງກ່າວລວມມີເງິນກູ້ 100 ລ້ານໂດລາ ແລະ ເງິນຊ່ວຍເຫຼືອ 5 ລ້ານໂດລາ, ຈະຖືກນຳໃຊ້ເພື່ອຊຸກຍູ້ທັກສະພື້ນຖານດ້ານການອ່ານອອກຂຽນເປັນ ແລະ ການຄິດໄລ່ ໃນໂຮງຮຽນປະຖົມທົ່ວກຳປູເຈຍ.
ຂ່າວລະບຸວ່າ: ໂຄງການດັ່ງກ່າວຍັງຈະຂະຫຍາຍການເຂົ້າເຖິງການບໍລິການດ້ານການສຶກສາ ແລະ ການດູແລເດັກນ້ອຍ, ປັບປຸງຄຸນນະພາບການສອນ, ຍົກລະດັບພື້ນຖານໂຄງລ່າງຂອງໂຮງຮຽນ ແລະ ເສີມຂະຫຍາຍລະບົບຄຸ້ມຄອງການສຶກສາໃຫ້ເຂັ້ມແຂງຍິ່ງຂຶ້ນອີກດ້ວຍ.
