ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ປັດຈຸບັນກາເຟ ໄດ້ຮັບຄວາມນິຍົມຈາກສັງຄົມເປັນຈຳນວນຫລາຍ. ພ້ອມນີ້, ການປູກກາເຟເປັນສິນຄ້າຍັງສາມາດສ້າງວຽກເຮັດງານທໍາ ແລະ ສ້າງລາຍຮັບທີ່ໝັ້ນຄົງໃຫ້ປະຊາຊົນ ເຮັດໃຫ້ປະຊາຊົນຫລຸດພົ້ນອອກຈາກຄວາມທຸກຍາກເທື່ອລະກ້າວ. ດັ່ງຄອບຄົວຂອງທ່ານ ຄໍາຈັກ ກອນບຸດເຕີ ຢູ່ບ້ານກໍາກອກ ເມືອງທ່າແຕງ ແຂວງເຊກອງ.
ທ່ານ ຄໍາຈັກ ກອນບຸດເຕີ ໄດ້ລາຍງານ ໃນກອງປະຊຸມໃຫຍ່ຜູ້ແທນອົງຄະນະພັກ ແຂວງເຊກອງ ຄັ້ງທີ XI ໃນວັນທີ 28 ສິງຫາ 2025 ຜ່ານມາວ່າ: ພາຍໃນຄອບຄົວຕົນເອງ ມີຈໍານວນພົນ 6 ຄົນ ຍິງ 3 ຄົນ ໃນນີ້, ມີແຮງງານຕົ້ນຕໍ 4 ຄົນ ແລະ ແຮງງານສໍາຮອງ 2 ຄົນ. ກ່ອນປີ 2015 ແມ່ນຢຶດຖືການເຮັດນາປູກເຂົ້າເປັນອາຊີບຕົ້ນຕໍ ແລະ ລ້ຽງສັດເປັນສຳຮອງ ແຕ່ກໍຍັງບໍ່ທັນຕອບສະໜອງໄດ້ກັບຄວາມຮຽກຮ້ອງຕ້ອງການ, ສະພາບຄອບຄົວມີຄວາມຂາດເຂີນ. ຍ້ອນມີແນວທາງນະໂຍບາຍຂອງພັກ-ລັດໃນການຊຸກຍູ້ສົ່ງເສີມການຜະລິດກະສິກຳ ແລະ ອຸດສາຫະກຳເປັນສິນຄ້າ ບ່ອນທີ່ມີທ່າແຮງບົ່ມຊ້ອນ ໂດຍສະເພາະ ຄອບຄົວຂອງຕົນ ມີເນື້ອທີ່ດິນ, ແຮງງານ ບວກກັບທຶນຮອນສະສົມຈໍານວນໜຶ່ງ ແລະ ໄດ້ກູ້ຢືມເງິນຈາກທະນາຄານນະໂຍບາຍຈຳນວນ 30 ລ້ານກີບ ແລະ ໄດ້ຕັດສິນໃຈຫັນປ່ຽນອາຊີບຈາກການເຮັດນາປູກເຂົ້າມາລົງທຶນປູກກາເຟກາງໃນເນື້ອທີ່ 0,8 ເຮັກຕາ ຊຶ່ງໄດ້ລົງທຶນໃນເບື້ອງຕົ້ນປະມານ 16 ລ້ານກີບ (ຊື້ແນວພັນ, ບຸກເບີກ, ຝຸ່ນ, ອຸປະກອນ ແລະ ອື່ນໆ); ການປູກກາເຟໃນໄລຍະທຳອິດ ແມ່ນພົບຄວາມຫຍຸ້ງຍາກຫລາຍຢ່າງ ຍ້ອນທຶນຈຳກັດ, ປະສົບການ ແລະ ເຕັກນິກການປູກບໍ່ທັນຫລາຍ, ຜົນຜະລິດກາເຟໄດ້ໜ້ອຍບໍ່ສົມຄູ່ກັບການລົງທຶນ. ຕໍ່ມາ, ຄະນະພັກ-ອົງການປົກຄອງເມືອງ ກໍຄືຫ້ອງການກະສິກຳ ແລະ ປ່າໄມ້ເມືອງໄດ້ລົງຕິດຕາມໃຫ້ຄຳແນະນໍາດ້ານເຕັກນິກການປູກ, ການບົວລະບັດຮັກສາ ແລະ ການເກັບກ່ຽວ. ພ້ອມກັນນັ້ນ, ຕົນເອງກໍຍັງໄດ້ໄປຊອກຮູ້ຮໍ່າຮຽນ, ແລກປ່ຽນບົດຮຽນນໍາຜູ້ມີປະສົບການ ກໍຄື ຜູ້ປະກອບການ ແລະ ບໍລິສັດຕ່າງໆ ເພື່ອນໍາມາໝູນໃຊ້ ຊຶ່ງພາຍຫລັງມີບົດຮຽນ, ມີເຕັກນິກການປູກ ແລະ ການບົວລະບັດຮັກສາ ເຮັດໃຫ້ຜົນຜະລິດກາເຟເພີ່ມຂຶ້ນໃນແຕ່ລະປີ. ໃນປີ 2018 ຄອບຄົວຂອງຕົນ ມີລາຍຮັບຈາກການຂາຍກາເຟປະມານ 180 ລ້ານກີບ, ໃນປີ 2019 ຈຶ່ງໄດ້ຊື້ດິນເພີ່ມອີກ 1,4 ເຮັກຕາ ລວມເປັນ 2,2 ເຮັກຕາ, ລົງທຶນຕື່ມອີກ 65 ລ້ານກີບ (ສ່ວນແຮງງານແມ່ນນໍາໃຊ້ແຮງງານໃນຄອບຄົວ) ແລະ ໃນປີ 2022 ເກັບກູ້ຜົນຜະລິດກາເຟກາງ (ໝາກແດງ) ໄດ້ 57,2 ໂຕນ (ສະມັດຕະພາບສະເລ່ຍ 26 ໂຕນ/ເຮັກຕາ), ມີລາຍຮັບຈາກການຂາຍຜົນຜະລິດກາເຟປະມານ 1,02 ຕື້ກວ່າກີບ, ສະເລ່ຍລາຍຮັບໃສ່ຈໍານວນພົນໃນຄອບຄົວໄດ້ປະມານ 171,6 ລ້ານກີບ/ຄົນ/ປີ ແລະ ໃນປີ 2023 ໄດ້ກູ້ຢືມເງິນຈາກທະນາຄານນະໂຍບາຍຕື່ມອີກ 300 ລ້ານກີບ ສົມທົບທຶນທີ່ມີຊື້ດິນເພີ່ມອີກ 6 ເຮັກຕາ ປັດຈຸບັນມີເນື້ອທີ່ປູກກາເຟລວມທັງໝົດ 8,2 ເຮັກຕາ, ຄາດຄະເນຜົນຜະລິດກາເຟ (ໝາກແດງ) ໃນທ້າຍປີ 2025 ປະມານ 213,2 ໂຕນ ແລະ ຄາດຄະເນລາຍຮັບຈາກການຂາຍຜົນຜະລິດກາເຟປະມານ 3,8 ຕື້ກີບ, ໂດຍລວມແລ້ວ ການປູກກາເຟເປັນສິນຄ້າເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນເປັນກ້າວໆ. ປັດຈຸບັນມີເຮືອນຢູ່ຖາວອນ 1 ຫລັງ, ມີຮ້ານຂາຍເຄື່ອງ 1 ຮ້ານ, ລົດໃຫຍ່ 2 ຄັນ, ມີເງິນເກັບຈໍານວນໜຶ່ງ ແລະ ມີທຶນຮອນໃນການສົ່ງເສີມລູກເຂົ້າໂຮງຮຽນ. ນອກຈາກນີ້, ຕົນເອງຍັງໄດ້ນໍາເອົາບົດຮຽນ ແລະ ເຕັກນິກການປູກກາເຟ ທີ່ໄດ້ຮຽນຮູ້ໄປເຜີຍແຜ່, ແນະນໍາ, ຊຸກຍູ້ປຸກລະດົມປະຊາຊົນພາຍໃນບ້ານຜູ້ທີ່ມີເງື່ອນໄຂ ແລະ ທ່າແຮງຫັນມາປູກກາເຟ ເພື່ອສ້າງລາຍຮັບໃຫ້ຄອບຄົວເພີ່ມຂຶ້ນ.
ທ່ານ ຄໍາຈັກ ກອນບຸດເຕີ ໃຫ້ຮູ້ຕື່ມວ່າ: ຜົນສໍາເລັດທີ່ກ່າວມານັ້ນ, ແມ່ນຍ້ອນມີແນວທາງນະໂຍບາຍອັນຖືກຕ້ອງ ຂອງພັກ-ລັດ ບວກກັບຄວາມອົດທົນ, ດຸໝັ່ນພາກພຽນ, ຊອກຮູ້ຮໍ່າຮຽນ, ກ້າຄິດ ແລະ ເຮັດໃນສິ່ງທີ່ຖືກຕ້ອງຕາມລະບຽບກົດໝາຍຂອງບ້ານເມືອງ ກໍຈະເຮັດໃຫ້ຄອບຄົວປະສົບຜົນສໍາເລັດ, ມີຢູ່ມີກິນ ແລະ ຫລຸດພົ້ນອອກຈາກຄວາມທຸກຍາກເປັນກ້າວໆມາ.
ຂ່າວ: ສັນຍາ
