ວິທະຍຸກະຈາຍສຽງຫວຽດນາມ, ຕາມຕົວເລກສະຖິຕິໃນເບື້ອງຕົ້ນຫລ້າສຸດ ຂອງກົມພາສີ (ກະຊວງການເງິນ ຫວຽດນາມ), ຍອດມູນຄ່າສົ່ງອອກ-ນຳເຂົ້າສິນຄ້າຂອງ ສສ ຫວຽດນາມ ໃນໄຕມາດທີ 1 ເດືອນ ກໍລະກົດ 2025 (ແຕ່ວັນທີ 1–15 ກໍລະກົດ), ບັນລຸກວ່າ 38,21 ຕື້ໂດລາສະຫະລັດ. ໝາກຜົນດັ່ງກ່າວ ໄດ້ຍົກຍອດມູນຄ່າສົ່ງອອກ-ນຳເຂົ້າຂອງ ສສ ຫວຽດນາມ ນັບແຕ່ຕົ້ນປີ ຮອດວັນທີ 15 ກໍລະກົດ ບັນລຸ 470,63 ຕື້ ໂດລາສະຫະລັດ, ເພີ່ມຂຶ້ນ 16,2% ເມື່ອທຽບໃສ່ ໄລຍະດຽວກັນຂອງປີ 2024. ໃນນັ້ນ, ຍອດມູນຄ່າສົ່ງ ອອກຂອງວິສາຫະກິດ ມີເງິນລົງທຶນຈາກຕ່າງປະເທດ (FDI) ບັນລຸກວ່າ 329 ຕື້ ໂດລາສະຫະລັດ.ກ່ຽວກັບການສົ່ງອອກ, ໄລ່ຮອດວັນທີ 15 ກໍລະກົດ, ຍອດມູນຄ່າສົ່ງອອກຂອງ ສສ ຫວຽດນາມ ບັນລຸກວ່າ 239 ຕື້ໂດລາສະຫະລັດ, ເພີ່ມຂຶ້ນ 14,7% ເມື່ອທຽບໃສ່ໄລຍະດຽວກັນຂອງປີ 2024. ກົງກັນຂ້າມ, ມູນຄ່ານຳເຂົ້າສິນຄ້າ ໃນທົ່ວປະເທດໄລ່ຮອດວັນທີ 15 ກໍລະກົດ ບັນລຸ 231,4 ຕື້ ໂດລາສະຫະລັດ, ເພີ່ມຂຶ້ນ 17,7% ເມື່ອທຽບໃສ່ ໄລຍະດຽວກັນຂອງປີ 2024. ມີບາງໝວດສິນຄ້າ ໄດ້ເພີ່ມຂຶ້ນ, ຄື: ຄອມພິວເຕີ, ຜະລິດຕະພັນ ເອເລັກໂຕຣນິກ, ເຄື່ອງຈັກ, ອຸປະກອນ ແລະ ເຄື່ອງອາໄຫລ່ ເປັນຕົ້ນ ສະນັ້ນ, ນັບແຕ່ຕົ້ນປີມາຮອດ ວັນທີ 15 ກໍລະກົດ, ສ່ວນເກີນດຸ່ນການຄ້າສິນຄ້າແມ່ນ 7,74 ຕື້ ໂດລາສະຫະລັດ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
