ໃນວັນທີ 23 ກໍລະກົດ 2025 ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ ພ້ອມ ດ້ວຍຄະນະ ແລະ ພາກ ສ່ວນກ່ຽວຂ້ອງ ໄດ້ລົງເຄື່ອນໄຫວຊຸກຍູ້ ຕິດຕາມ ແລະ ກວດ ກາສະພາບຄອງລະບາຍນໍ້າ (ຄອງນໍ້າວຽງຈັນ) ຢູ່ເມືອງ ໄຊເສດຖາ ນະຄອນຫຼວງວຽງຈັນ.
ການລົງເຄື່ອນໄຫວຄັ້ງນີ້ ມີທັງໝົດ 5 ຈຸດຄື : ຈຸດທີ 1 ລົງກວດກາຄອງນໍ້າ ຂ້າງສູນການຄ້າອາຊຽນມໍ ຈຸດທີ 2 ແມ່ນຈຸດຂົວບ້ານ ຫົວຂົວ ຈຸດທີ 3 ຂົວບ້ານ ໄຮ່ຄໍາ ຈຸດທີ 4 ຂົວເສັ້ນ ທາງ 450 ປີ ແລະ ຈຸດທີ 5 ແມ່ນຂົວບ້ານ ຈອມສີ.
ຜ່ານການລົງຕິດຕາມ ແລະ ກວດ ກາຕົວຈິງເຫັນວ່າ ບາງຈຸດມີກອງຂີ້ດິນກີດຂວາງການໄຫຼຂອງນໍ້າ ແລະ ຫຼາຍຈຸດມີຜັກຕົບ ແລະ ຂີ້ເຫຍື້ອເປັນຈໍານວນຫຼາຍ ໂອກາດນີ້ ທ່ານ ຮອງເຈົ້າຄອງ ນະຄອນຫຼວງວຽງຈັນ ໄດ້ມີຄໍາເຫັນຊີ້ນໍາ ໂດຍມອບໃຫ້ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ສົມທົບກັບ ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ແລະ ອົງ ການປົກຄອງເມືອງ ໄຊເສດຖາ ໃຫ້ ຮີບຮ້ອນຂຶ້ນແຜນອະນາໄມລວງຄອງ ໂດຍສະເພາະ ໃຫ້ນໍາເອົາຜັກຕົບ ແລະ ສິ່ງກີດຂວາງອອກຈາກໜ້ານໍ້າໂດຍໄວ ພ້ອມນີ້ ກໍໃຫ້ປຸກລະດົມການມີສ່ວນ ຮ່ວມຂອງພາກທຸລະກິດ ຫ້າງຮ້ານ ບໍລິສັດ ແລະ ປະຊາຊົນທີ່ຢູ່ລຽບຕາມຄອງລະບາຍນໍ້າດັ່ງກ່າວ ໃຫ້ມີສ່ວນຮ່ວມໃນການເຮັດອະນາໄມເພື່ອເຮັດໃຫ້ນໍ້າສາມາດໄຫຼສະດວກດີຂຶ້ນທັງເປັນການປ້ອງກັນບໍ່ໃຫ້ນໍ້າຖ້ວມຂັງໃນລະດູຝົນ.
