ຕາມຂ່າວຈາກ CGTN, ກອງປະຊຸມ ເວທີປຶກສາຫາລື ອະລິຍະທຳໂລກ ນີຊ່ານ ຄັ້ງທີ 11 ໄດ້ໄຂຂຶ້ນ ຢູ່ພູນີຊ່ານ ເມືອງຊວີ່ຟູ້ ແຂວງຊ່ານຕົ່ງຈີນ. ພາຍໃຕ້ ຫົວຂໍ້ຫລັກວ່າ: “ຕ່າງມີຈຸດດີເດັ່ນ ສະເພາະ ຂອງໃຜລາວ ແລະ ຮ່ວມກັນຈະເລີນ: ການພົວພັນ ລະຫວ່າງ ອະລິຍະທຳ ກັບຄວາມທັນສະໄໝຂອງໂລກ.” ໂດຍຈັດໃຫ້ມີ 6 ຫົວຂໍ້ຍ່ອຍເຊັ່ນ: ແຫລ່ງກຳເນີດຂອງອະລິຍະທຳ ກັບການພັດທະນາ ໃນອະນາຄົດ, ຄວາມໝາຍ ລັກສະນະທົ່ວໂລກ ກັບຄຸນຄ່າ ໃນຍຸກປັດຈຸບັນ ຂອງວັດທະນະທຳ ປັດຊະຍາ ຂົງຈື້ ເປັນຕົ້ນ ເພື່ອດຳເນີນການແລກປ່ຽນ ແລະ ສົນທະນາກັນ ດ້ານອະລິຍະທຳ ແລະ ຮ່ວມກັນຄົ້ນຄວ້າ ປຶກສາຫາລື ເພື່ອຊອກວິທີ ເຮັດໃຫ້ ອະລິຍະທຳຕ່າງໆ ຢູ່ຮ່ວມກັນ ຢ່າງກົມກຽວ. ກອງປະຊຸມຄັ້ງນີ້ ດຳເນີນເປັນເວລາ 2 ວັນຄື ລະຫວ່າງ ວັນທີ 9-10 ກໍລະກົດນີ້, ໃນໄລຍະດັ່ງກ່າວ ຈະຈັດກິດຈະກຳ 20 ກວ່າຄັ້ງເຊິ່ງລວມເຖິງ ການປາຖະກະຖາ, ການສົນທະນາລະດັບສູງ, ການສົນທະນາເປັນກຸ່ມ, ເວທີປຶກສາຫາລື ຄູ່ຂະໜານ ແລະ ອື່ນໆ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
