ຕະຫຼອດໄລຍະຜ່ານມາ, ທ່ານ ສີຈິ້ນຜິງ ປະທານປະເທດຈີນ ໄດ້ເອົາໃຈໃສ່ຕໍ່ສຸຂະພາບ ແລະ ການເຕີບໃຫຍ່ຂອງເດັກນ້ອຍເຍົາວະຊົນມາໂດຍຕະຫຼອດ ເພິ່ນໄດ້ປູກຈິດສຳນຶກຕ່າງໆ ທີ່ປຽບເໝືອນເມັດພັນນ້ອຍໆແຕກໜໍ່ຈໍ່ແໜງຢູ່ໃນຈິດໃຈຂອງເດັກນ້ອຍທັງຫຼາຍ.
ຈິດສຳນຶກ “ຄ່ານິຍົມແກນກາງສັງຄົມນິຍົມ” ກ່ອນວັນເດັກນ້ອຍສາກົນ ທີ 1 ມິຖຸນາ 2014 ຈະໝູນວຽນມາເຖິງ, ທ່ານ ສີຈິ້ນຜິງ ໃນຖານະເປັນ “ເພື່ອນມິດໃຫຍ່” ໄດ້ເຂົ້າຮ່ວມເປັນສັກຂີພິຍານຂອງພິທີເຂົ້າເປັນສະມາຊິກກອງເຍົາວະຊົນບຸກເບີກຈີນ ຂອງນັກຮຽນຊັ້ນໜຶ່ງໂຮງຮຽນປະຖົມຊົນເຜົ່າ ເມືອງໄຫຕ້ຽນນະຄອນຫຼວງປັກກິ່ງ, ເພິ່ນໄດ້ຜູກແພແດງເຍົາວະຊົນໃຫ້ທ້າວ ຫວາງຢ້ຽນຈຸ່ນ ນັກຮຽນຊັ້ນໜຶ່ງຫ້ອງ8.
ພາຍຫຼັງພິທີເຂົ້າເປັນສະມາຊິກເຍົາວະຊົນບຸກເບີກສຳເລັດລົງແລ້ວ, ທ່ານ ສີຈິ້ນຜິງ ໄດ້ເລົ່າສະພາບການເຂົ້າເປັນສະມາຊິກເຍົາວະຊົນຂອງຕົນ ຕອນເຍົາໄວສູ່ຫຼານນ້ອຍນັກຮຽນທັງຫຼາຍຟັງວ່າ: “ຈື່ໄດ້ວ່າຕອນເຂົ້າເປັນສະມາຊິກເຍົາວະຊົນຫົວໃຈເຕັ້ນໄວໆ ຮູ້ສຶກຕື່ນເຕັ້ນຫຼາຍ. ບໍ່ຮູ້ວ່າ ພວກຫຼານມີຄວາມຮູ້ສຶກແບບນີ້ຫຼືບໍ່?”, “ເພາະຫຍັງຈຶ່ງເປັນແບບນີ້? ເພາະວ່າ ມັນເປັນກຽດຕິຍົດຢ່າງໜຶ່ງ.”
ໃນການສົນທະນາກັບນັກຮຽນ ແລະ ຄູອາຈານທັງຫຼາຍໃນມື້ນັ້ນ, ທ່ານ ສີຈິ້ນຜິງ ໄດ້ສະເໜີຄຳຊີ້ນຳວ່າ: ທຸກຝ່າຍຕ້ອງສຸມຄວາມພະຍາຍາມຮ່ວມກັນເພື່ອເຮັດໃຫ້ “ເມັດພັນ” ຄ່ານິຍົມແກນກາງສັງຄົມນິຍົມ ແຕກໜໍ່ຈໍ່ແໜງຢູ່ໃນຈິດໃຈຂອງເດັກນ້ອຍເຍົາວະຊົນ ແລະອົບຮົມບົ່ມສ້າງຂຶ້ນຢ່າງແທ້ຈິງ.
ຄ່ານິຍົມແກນກາງສັງຄົມນິຍົມມີຄື: ຮັ່ງມີເຂັ້ມແຂງ, ປະຊາທິປະໄຕ, ຄວາມສີວິໄລ, ຄວາມກົມກຽວ, ຄວາມເສລີ, ຄວາມສະເໝີພາບ, ຄວາມຍຸຕິທຳ, ການປົກຄອງດ້ວຍກົດໝາຍ, ຄວາມຮັກຊາດ, ຄວາມທຸ້ມເທຕໍ່ໜ້າທີ່ການງານ, ຄວາມຊື່ສັດ ແລະ ມິດຕະພາບ.
ເດັກນ້ອຍເຍົາວະຊົນຄືອະນາຄົດຂອງປະເທດຊາດ, ມີພຽງແຕ່ປູກຈິດສຳນຶກຄ່ານິຍົມແກນກາງສັງຄົມນິຍົມໃຫ້ເດັກນ້ອຍເຍົາວະຊົນເທົ່ານັ້ນ ຈຶ່ງຈະສາມາດແຕກດອກອອກຜົນທີ່ດີໄດ້ໃນອະນາຄົດ.
ຈິດສຳນຶກ “ຮັກຊາດຈີນເຮົາ” ກ່ອນວັນເດັກນ້ອຍສາກົນ ວັນທີ 1 ມິຖຸນາ 2019 ຈະໝູນວຽນມາເຖິງ, ນັກຮຽນປະຖົມຂອງໂຮງຮຽນຢີ່ງສາຍທີ່ສັງກັດໂຮງຮຽນມັດທະຍົມຫາວຈ່ຽງມາກາວ ໄດ້ຂຽນຈົດໝາຍ ເຖິງທ່ານ ສີຈິ້ນຜິງ ເຊິ່ງເນື້ອໃນຈົດໝາຍໄດ້ເລົ່າເຖິງຄວາມເຂົ້າໃຈຂອງເຂົາເຈົ້າທີ່ມີຕໍ່ຄວາມໝາຍຂອງ “ປະເທດຊາດມາຕຸພູມ” ພ້ອມທັງໄດ້ສະແດງຄວາມໝາຍໝັ້ນວ່າ ພາຍຫຼັງໃຫຍ່ຂຶ້ນແລ້ວຈະສ້າງສາປະເທດຊາດກໍຄືມາກາວໃຫ້ດີງາມກວ່າເກົ່າ.
ວັນທີ 31 ພຶດສະພາ 2019, ທ່ານ ສີຈິ້ນຜິງ ໄດ້ຕອບຄືນຈົດໝາຍຂອງຫຼານນ້ອຍນັກຮຽນທັງຫຼາຍ ເຊິ່ງເນື້ອໃນບາງຕອນຂຽນວ່າ: “ປະເທດຊາດເປັນທີ່ເພິ່ງອີງອັນເຂັ້ມແຂງຂອງມາກາວ, ພວກຫຼານຮູ້ເຫດຜົນນີ້ຕັ້ງແຕ່ຍັງນ້ອຍ, ຂ້າພະເຈົ້າຮູ້ສຶກປະທັບໃຈຫຼາຍ.”
ຫຼັງຈາກນັ້ນບໍ່ເທົ່າໃດເດືອນ, ທ່ານ ສີຈິ້ນຜິງ ໄດ້ເດີນທາງໄປຢ້ຽມຢາມຫຼານນ້ອຍນັກຮຽນທັງຫຼາຍຂອງໂຮງຮຽນຢິ່ງສາຍ ທີ່ສັງກັດໂຮງຮຽນມັດທະຍົມຫາວຈ່ຽງມາກາວ,ເພິ່ນໄດ້ເວົ້າກັບບັນດາຫຼານນ້ອຍນັກຮຽນຢ່າງສະໜິດສະໜົມວ່າ: “ພຶດຕິກຳສາມຂວບບອກນິໄສໄດ້ຮອດເຖົ້າ, ພວກເຮົາອົບຮົມບົ່ມສອນລັດທິຮັກຊາດກໍແມ່ນເລີ່ມຈາກເຍົາໄວເຊັ່ນດຽວກັນ” ເພິ່ນຫວັງໃຫ້ຫຼານນ້ອຍ ນັກຮຽນມາກາວທັງຫຼາຍໄດ້ໄປຢາມເຂດໃນປະເທດຊາດເລື້ອຍໆ ເພື່ອທ່ຽວຊົມດິນແດນມາຕຸພູມອັນສວຍສົດງົດງາມ. ຮຽນປະຫວັດສາດໃຫ້ດີ, ຮຽນປະຫວັດສາດຈີນໃຫ້ດີ. ດຸໝັ່ນຮ່ຳຮຽນໃຫ້ມີຄວາມກ້າວໜ້າທຸກມື້!
ທ່ານ ສີຈິ້ນຜິງ ໄດ້ປະຕິບັດຕົວຈິງໃນການປູກຈິດສຳນຶກ “ຮັກຊາດຈີນເຮົາ” ໃຫ້ເດັກນ້ອຍທຸກຄົນຢ່າງເລິກເຊິ່ງ.
ຈິດສຳນຶກ “ຄວາມສິວິໄລດ້ານນິເວດ” ນັບແຕ່ປີ 2013 ເປັນຕົ້ນມາ, ທ່ານ ສີຈິ້ນຜິງ ໄດ້ເຂົ້າຮ່ວມກິດຈະກຳປູກຕົ້ນໄມ້ຕາມພັນທະຂອງນະຄອນຫຼວງປັກກິ່ງເປັນເວລາ 13 ປີລຽນຕິດ. ເພິ່ນໄດ້ຮ່ວມກັບເດັກນ້ອຍເຍົາວະຊົນປູກຕົ້ນໄມ້ ພ້ອມທັງໂອ້ລົມສົນທະນາກັບເຂົ້າເຈົ້າຢ່າງສະໜິດສະໜົມ.
ປີ 2023, ຕອນເຂົ້າຮ່ວມກິດຈະກຳປູກຕົ້ນໄມ້ຢູ່ສວນສາທາລະນະໃຈກາງຕົ່ງປ້າ ເມືອງສາວຢາງ ນະຄອນຫຼວງປັກກິ່ງ, ທ່ານ ສີຈິ້ນຜິງ ໄດ້ປູກຕົ້ນໄມ້ທັງສອນວິທີການປູກຕົ້ນໄມ້ໃຫ້ຫຼານນ້ອຍນັກຮຽນທັງຫຼາຍ, ພ້ອມທັງລົມເລື່ອງການຮຽນ ແລະການໃຊ້ຊີວິດກັບເຂົາເຈົ້າ, ສອບຖາມເຂົາເຈົ້າວ່າມີຄວາມຮູ້ກ່ຽວກັບພຶກສາຊາດຫຼາຍໜ້ອຍສ່ຳໃດ? ດຽວນີ້ວຽກບ້ານຫຼາຍບໍ່? ແລະອື່ນໆ.
ພາຍຫຼັງປູກຕົ້ນໄມ້ແລ້ວໆ, ທ່ານ ສີຈິ້ນຜິງ ໄດ້ເວົ້າກັບຫຼານນ້ອຍນັກຮຽນທັງຫຼາຍວ່າ: “ຖ້າພວກຫຼານກາຍເປັນພໍ່ແມ່ແລ້ວ ກໍຄວນຊຸກຍູ້ໃຫ້ລູກຫຼານປູກຕົ້ນໄມ້ຕໍ່ໄປ, ເຮັດສືບກັນໄປຈາກຮຸ່ນສູ່ຮຸ່ນ, ປະເທດຈີນທີ່ສວຍງາມກໍແມ່ນສ້າງສາຂຶ້ນມາແບບນີ້ແຫຼະ.”
ທ່ານ ສີຈິ້ນຜິງ ກັບເດັກນ້ອຍທັງຫຼາຍຮ່ວມກັນປູກຕົ້ນໄມ້ໂດຍໄດ້ປູກແນວຄິດ “ພູຂຽວນ້ຳໃສກໍແມ່ນພູເງິນພູຄຳ” ເຂົ້າໃນຈິດໃຈເດັກນ້ອຍທຸກຄົນ.
ຕາມທ່ານ ສີຈິ້ນຜິງ ເຫັນວ່າ: ຄວາມໝາຍສຳຄັນອັນໜຶ່ງຂອງກິດຈະກຳປູກຕົ້ນໄມ້ຕາມພັນທະ ແມ່ນຕ້ອງຊຸກຍູ້ການປູກຈິດສຳນຶກຄວາມສິວິໄລດ້ານນິເວດໃຫ້ແກ່ທົ່ວສັງຄົມໂດຍສະເພາະແມ່ນຊາວໜຸ່ມເຍົາວະຊົນ.
ການປູກຈິດສຳນຶກຕ່າງໆໃຫ້ເດັກນ້ອຍເຍົາວະຊົນ ກໍປຽບເໝືອນການຫວ່ານເມັດພັນນ້ອຍໆເພື່ອປູກຄວາມຫວັງແລະສ້າງອະນາຄົດທີ່ດີງາມ.
