ເນື່ອງໃນໂອກາດທີ່ ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນຈະເດີນທາງໄປຢ້ຽມຢາມຫວຽດນາມ, ມາເລເຊຍ ແລະ ກຳປູເຈຍທາງລັດຖະກິດ, ໂທລະພາບສາກົນຈີນ ຫຼື CGTN ຮ່ວມກັບສະມາຄົມການສຶກສາຈີນ ແລະ ມະຫາວິທະຍາໄລລາມານຂອງມາເລເຊຍ ໄດ້ຮ່ວມກັນເປັນເຈົ້າພາບຈັດງານເສວະນາ “ພະລັງແຫ່ງແນວຄິດ-ຈີນກັບອາຊຽນ” ຢູ່ນະຄອນຫຼວງກົວລາລຳເປີຂອງມາເລເຊຍໃນວັນທີ 11 ເມສານີ້ ໂດຍໄດ້ເຊື້ອເຊີນແຂກຜູ້ມີກຽດ 4 ທ່ານ ເຊັ່ນ: ທ່ານອັອງຕີເກດ ປະທານສະມາຄົມສົ່ງເສີມ “ໜຶ່ງແລວໜຶ່ງເສັ້ນທາງ” ໃນພາກພື້ນອາຊີປາຊີຟິກ, ອະດີດລັດຖະມົນຕີກະຊວງຄົມມະນາຄົມມາເລເຊຍ ແລະ ທ່ານອື່ນໆເຂົ້າຮ່ວມ ແລະ ກ່າວປາຖະກະຖາ ກ່ຽວກັບແນວຄວາມຄິດທີ່ຮັກແພງກັນ, ຈິງໃຈຕໍ່ກັນ, ອະນຸເຄາະຕໍ່ກັນ ແລະ ໂອບອ້ອມອາລີ ທີ່ທ່ານສີຈິ້ນຜິງເປັນຜູ້ສະເໜີ ແລະ ລົງເລິກຊຸກຍູ້ການສ້າງ “ປະຊາຄົມຮ່ວມຊາຕາກຳຈີນ-ອາຊຽນ” ພ້ອມທັງໄດ້ເສວະນາກັນຢ່າງຄຶກຄັກ.
ແຂກຜູ້ມີກຽດເຕັມໄປດ້ວຍຄວາມຄາດຫວັງຕໍ່ການເດີນທາງຢ້ຽມຢາມປະເທດອາຊີຕາເວັນອອກສຽງໃຕ້ຂອງທ່ານສີຈິ້ນຜິງໃນຄັ້ງນີ້ ແລະ ມີຄວາມເຫັນເປັນເອກະພາບກັນວ່າ ການຢ້ຽມຢາມຄັ້ງນີ້ຈະຊຸກຍູ້ການຮ່ວມມືດ້ານເສດຖະກິດການຄ້າ ແລະ ການແລກປ່ຽນດ້ານວັດທະນະທຳລະຫວ່າງຈີນກັບບັນດາປະເທດສະມາຊິກອາຊຽນ, ຊຸກຍູ້ການຮ່ວມມືຕື່ມອີກໃນດ້ານເຕັກນິກສີຂຽວ ແລະ ການກໍ່ສ້າງທາງລົດໄຟລະຫວ່າງຈີນ ແລະ ອາຊຽນ ແລະ ກໍຈະຊ່ວຍຊຸກຍູ້ໃຫ້ປະເທດ “ເຂດໂລກໃຕ້” ສາມັກຄີຢ່າງແໜ້ນແຟ້ນກວ່າເກົ່າ.
