ຕະຫລອດໄລຍະ 64 ປີຜ່ານມາ ກຳລັງປ້ອງກັນຄວາມສະຫງົບປະຊາຊົນລາວ ໄດ້ເຕີບໃຫຍ່ຂະຫຍາຍຕົວ ແລະ ໄດ້ມີຜົນງານອັນໃຫຍ່ຫລວງໃນການປ້ອງກັນຄວາມສະຫງົບພາຍໃນຊາດ, ສາມາດປະຕິບັດໜ້າທີ່ຮັບໃຊ້ຊາດ ແລະ ປະຊາຊົນພາຍໃຕ້ການຊີ້ນຳຢ່າງຮອບດ້ານຂອງພັກ ເພື່ອສືບຕໍ່ເສີມຂະຫຍາຍມູນເຊື້ອດັ່ງກ່າວ ຕ້ອງສືບຕໍ່ຈັດຕັ້ງປະຕິບັດແນວທາງປ້ອງກັນຊາດ ປ້ອງກັນຄວາມສະຫງົບທ່ົວປວງຊົນ ຕິດພັນກັບການພັດທະນາເສດຖະກິດ-ວັດທະນະທໍາ – ສັງຄົມ, ໂດຍສະເພາະແມ່ນການຈັດຕັ້ງປະຕິບັດມະຕິ ເລກທີ 103 ຂອງກົມການເມືອງສູນກາງພັກ ວ່າດ້ວຍການເພີ່ມທະວີວຽກງານປ້ອງກັນຄວາມສະຫງົບ ໃນສະພາບການໃໝ່ໃຫ້ມີປະສິດທິຜົນສູງ, ສຶກສາອົບຮົມ, ປຸກລະດົມທົ່ວປວງຊົນ ພ້ອມກັນເປັນເຈົ້າການເຮັດວຽກງານປ້ອງກັນຊາດ- ປ້ອງກັນຄວາມສະຫງົບ ຮັບປະກັນເຮັດໃຫ້ປະເທດຊາດມີຄວາມສະຫງົບ, ໝັ້ນຄົງ ແລະ ເປັນລະບຽບຮຽບຮ້ອຍຢ່າງໜັກແໜ້ນ.
ຄຽງຄູ່ກັບການຕັ້ງໜ້າປັບປຸງ ກໍ່ສ້າງກໍາລັງປ້ອງກັນຄວາມສະຫງົບຢ່າງຮອບດ້ານ ໂດຍຖືເອົາການປັບປຸງກໍ່ສ້າງກໍາລັງທາງດ້ານຄຸນທາດການເມືອງເປັນກົກ ຖືເອົາການປັບປຸງກໍ່ສ້າງກຳລັງທາງດ້ານຄວາມຮູ້, ຄວາມສາມາດດ້ານວິຊາການ, ວິຊາສະເພາະເປັນສໍາ ຄັນ, ການປັບປຸງກໍ່ສ້າງພະນັກງານນໍາພາ, ບັນຊາເປັນອັນຕັດສິນ, ເພື່ອເສີມຂະຫຍາຍທາດແທ້ ແລະ ມູນເຊ້ືອອັນດີງາມຂອງກຳລັງປ້ອງກັນຄວາມສະຫງົບ, ຕັ້ງໜ້າເຮັດສໍາເລັດໜ້າທີ່ການເມືອງຂອງຕົນໃຫ້ເປັນຢ່າງດີ. ສືບຕ່ໍຫັນລົງກໍ່ສ້າງຮາກຖານການເມືອງ, ປະຕິບັດ 4 ເນື້ອໃນ 4 ຄາດໝາຍກ່ຽວກັບວຽກງານກໍ່ສ້າງຮາກຖານໃຫ້ໄດ້ຮັບຜົນດີ. ສະກັດກ້ັນບັນດາໜ່ໍແໜງກໍ່ຄວາມບໍ່ສະຫງົບໃຫ້ໄດ້ຢ່າງເດັດຂາດ ແລະ ເອົາໃຈໃສ່ແກ້ໄຂບັນດາປະກົດການຫຍໍ້ທໍ້ຢູ່ໃນສັງຄົມໃຫ້ມີຄວາມສະຫງົບຢ່າງໜັກແໜ້ນເຂັ້ມແຂງ. ສືບຕໍ່ປະຕິບັດແນວທາງການຕ່າງປະເທດຂອງພັກເຮົາ, ເພີ່ມທະວີການຮ່ວມມືໂດຍກົງຮອບດ້ານກັບບັນດາປະເທດ ເພື່ອນມິດຍຸດທະສາດ ແລະ ຕັ້ງໜ້າເຂ້ົາຮ່ວມການເຄ່ືອນໄຫວຂອງອົງການຕຳຫລວດອາຊຽນ, ອົງການຕຳຫລວດສາກົນ ແລະ ອົງການຕຳຫລວດປະເທດອື່ນໆ ບົນພື້ນຖານຕ່າງຝ່າຍຕ່າງມີຜົນປະໂຫຍດ.
