ໃນວັນທີ 2 ເມສາ ຜ່ານມາ ກອງທັບປະຊາຊົນລາວ ນໍາພາໂດຍທ່ານ ພັນເອກ ປາດຖະໜາ ບຸດຕິຈັກ ຮອງຫົວໜ້າຫ້ອງການກົມໃຫຍ່ເສນາທິການກອງທັບ, ຄະນະກຳມະການຄຸ້ມຄອງໄພພິບັດກະຊວງປ້ອງກັນປະເທດ, ຫົວໜ້າກອງເສນາ, ຜູ້ປະສານງານຄະນະກຳມະການຄຸ້ມຄອງໄພພິບັດຂັ້ນສູນກາງ ພ້ອມດ້ວຍຄະນະ ໄດ້ນໍາພາກໍາລັງສືບຕໍ່ຊ່ວຍເຫຼືອ ແລະ ໃຫ້ການປິ່ນປົວປະຊາຊົນມຽນມາ ຜູ້ທີ່ໄດ້ຮັບບາດເຈັບຈາກເຫດການແຜ່ນດິນໄຫວທີ່ນອນປິ່ນປົວຢູ່ໂຮງໝໍພາກສະໜາມ ເມືອງເຈົາແຊ ແຂວງມອນດາເລ.
ພາຍຫຼັງລົງກວດກາ ແລະ ເກັບກຳຂໍ້ມູນຕົວຈິງ ກັບອົງການປົກຄອງເມືອງເຈົາແຊຄະນະຊີ້ນໍາພາກສະໜາມກອງທັບປະຊາຊົນລາວ ກໍໄດ້ວາງແຜນຮ່ວມກັບອົງການປົກຄອງເມືອງ ແລະ ຈັດແບ່ງກຳລັງອອກເປັນ 2 ໜ່ວຍງານຄື: ໜ່ວຍງານກອບກູ້, ຊອກຄົ້ນ ແລະ ໜ່ວຍແພດສຸກເສີນ. ໃນນີ້, ໜ່ວຍງານກອບກູ້, ຊອກຄົ້ນແມ່ນໄດ້ນໍາໃຊ້ກໍາລັງຊ່າງແສງຈໍານວນ 13 ສະຫາຍນໍາໃຊ້ວັດຖຸ-ອຸປະກອນທີ່ນໍາມາຮ່ວມກັບໜ່ວຍກູ້ໄພຂອງ ສສ ມຽນມາເຂົ້າກອບກູ້, ແກ້ໄຂຊາກສະລັກຫັກພັງຢູ່ຫຼັງຄາຫ້ອງການປົກຄອງເມືອງເພື່ອກອບກູ້ເອົາວັດຖຸ-ອຸປະກອນທີ່ຍັງຕົກຄ້າງຢູ່ພາຍໃນອາຄານຫຼັງດັ່ງກ່າວ; ໜ່ວຍແພດສຸກເສີນແມ່ນນໍາໃຊ້ກໍາລັງເສນາຮັກຈໍານວນ 11 ສະຫາຍນໍາໃຊ້ອຸປະກອນການແພດ, ຢາປົວພະຍາດທີ່ນຳມາຮ່ວມກັບແພດໝໍຂອງເມືອງເຂົ້າປິ່ນປົວຜູ້ບາດເຈັບທີ່ນອນປິ່ນປົວຢູ່ໂຮງໝໍພາກສະໜາມ. ຜ່ານການຈັດຕັ້ງປະຕິບັດໜ້າທີ່ວຽກງານຮ່ວມກັນໃນການກອບກູ້ ແລະ ປິ່ນປົວຜູ້ບາດເຈັບຂອງກໍາລັງກອງ ທັບປະຊາຊົນລາວກັບພາກສ່ວນທີ່ກ່ຽວຂ້ອງຂອງເມືອງເຈົາແຊໃນໄລຍະ 1 ວັນ ເຫັນວ່າໄດ້ຮັບໝາກຜົນດີ ແລະ ມີຄວາມປອດໄພ 100%.
ພ້ອມນັ້ນ, ທ່ານ ພັນເອກ ປາດຖະໜາ ບຸດຕິຈັກ ພ້ອມຄະນະຍັງໄດ້ນໍາເອົາເຄື່ອງອຸປະໂພກ-ບໍລິໂພກຈໍານວນໜຶ່ງໄປມອບໃຫ້ປະຊາຊົນທີ່ນອນປິ່ນປົວຢູ່ໂຮງໝໍຕື່ມອີກ ເພື່ອຊ່ວຍເຫຼືອບັນເທົາທຸກໃຫ້ຜູ້ທີ່ໄດ້ຮັບຜົນກະທົບຈາກເຫດການດັ່ງກ່າວໃຫ້ໄດ້ຫຼາຍທີ່ສຸດເທົ່າທີ່ຈະເຮັດໄດ້.
