ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມວຽກງານເຕັກໂນໂລຊີ ແລະ ການສື່ສານທົ່ວປະເທດໃນໄລຍະປີ 2021-2025 ຂຶ້ນໃນວັນທີ 2 ເມສານີ້ ທີ່ຫໍປະຊຸມແຫ່ງຊາດ, ໂດຍການເປັນປະທານຂອງທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ມີບັນດາທ່ານລັດຖະມົນຕີ, ປະທານອົງການ – ທຽບເທົ່າ, ເຈົ້າແຂວງ, ຮອງລັດຖະມົນຕີ, ຮອງເຈົ້າຄອງນະຄອນຫຼວງ, ຮອງປະທານອົງການ-ທຽບເທົ່າ ແລະ ທ່ານຮອງເຈົ້າແຂວງ, ບັນດາທ່ານຫົວໜ້າກົມ-ຮອງຫົວໜ້າກົມ, ຫົວໜ້າພະແນກ – ຮອງຫົວໜ້າພະແນກເຕັກໂນໂລຊີ ແລະ ການສື່ສານແຂວງ – ນະຄອນຫຼວງ ແລະ ພະນັກງານຫຼັກແຫຼ່ງຂອງຂະແໜງເຕັກໂນໂລຊີ ແລະ ການສື່ສານ ເຂົ້າຮ່ວມ.
ໃນພິທີ, ທ່ານ ບໍ່ວຽງຄໍາ ວົງດາລາ ໄດ້ກ່າວວ່າ: ກອງປະຊຸມວຽກງານເຕັກໂນໂລຊີ ແລະ ການສື່ສານໃນຄັ້ງນີ້ຈະໄດ້ລົງເລິກສະຫຼຸບຕີລາຄາການຈັດຕັ້ງປະຕິບັດວຽກງານເຕັກໂນໂລຊີ ແລະ ການສື່ສານໃນ 5 ປີ ຜ່ານມາໂດຍຍົກໃຫ້ເຫັນເຖິງຈຸດດີ, ຜົນງານ ແລະ ຈຸດອ່ອນຂໍ້ຄົງຄ້າງທີ່ພົ້ນເດັ່ນ, ຄົ້ນຄວ້າຫາສາເຫດຕ່າງໆ ແລະ ຖອດຖອນບົດຮຽນ, ບົນພື້ນຖານດັ່ງກ່າວເພື່ອກຳນົດທິດທາງແຜນການໃນ 5 ປີ ຕໍ່ໜ້າ (2026-2030). ສະນັ້ນ, ຂ້າພະເຈົ້າຈຶ່ງຂໍສະເໜີໃຫ້ບັນດາທ່ານຜູ້ແທນກອງປະຊຸມຄັ້ງນີ້ຈົ່ງໄດ້ພ້ອມກັນສຸມສະຕິປັນຍາ, ຄົ້ນຄວ້າປະກອບຄໍາເຫັນຢ່າງເລິກເຊິ່ງ, ກົງໄປກົງມາ ແລະ ສ້າງສັນເພື່ອຈະໄດ້ພ້ອມກັນສືບຕໍ່ສູ້ຊົນຈັດຕັ້ງປະຕິບັດບັນດາຄາດໝາຍຕ່າງໆທີ່ກຳນົດໄວ້ໃນທິດທາງແຜນການ 5 ປີ ຕໍ່ໜ້າ ໃຫ້ໄດ້ຮັບໝາກຜົນຕາມຄາດໝາຍທີ່ວາງໄວ້. ຂ້າພະເຈົ້າມີຄວາມເຊື່ອໝັ້ນວ່າດ້ວຍຄວາມຮັບຜິດຊອບຮ່ວມກັນຂອງພວກເຮົາໝົດທຸກຄົນ, ກອງປະຊຸມຂອງພວກເຮົາໃນຄັ້ງນີ້ຈະໄດ້ຮັບຜົນສໍາເລັດຕາມລະດັບຄາດໝາຍ.
(ຂ່າວ: ແສງຈັນ)
