ງານແຂ່ງຂັນພາຍໃຕ້ ຫົວຂໍ້: Lao Cyber Security Hacking Challenge ຈັດຂຶ້ນໃນວັນທີ 2 ເມສາ 2025 ທີ່ຫໍປະຊຸມແຫ່ງຊາດ ເປັນະທານຂອງທ່ານ ຄໍາຫຼ້າ ສູນນາລັດ ຫົວໜ້າຫົມປອດໄພໄຊເບີ ກະຊວງເຕັກໂນໂລຊີ ແລະ ການສື່ສານ ມີຄະນະກໍາມະການ ແລະ ບັນດາທີມນັກແຂ່ງຂັນ ເຂົ້າຮ່ວມ.
ທ່ານ ຄໍາຫຼ້າ ສູນນາລັດ ໄດ້ກ່າວວ່າ: ກະຊວງ ເຕັກໂນໂລຊີ ແລະ ການສື່ສານ ພາຍໃຕ້ການຊີ້ນໍາ ນໍາພາຂອງຄະນະລະດັບຊາດ ໃນການຫັນເປັນດິຈິຕອນ ຂອງ ສປປ ລາວ ໄດ້ຈັດງານສັບປະດາດິຈິຕອນ (Lao Digital Week 2025) ເພື່ອເປັນການຄໍານັບຮັບຕ້ອນ ວັນປະຫວັດສາດ ຂອງປະເທດເຮົາ ວັນຄົບຮອບວັນສ້າງຕັ້ງພັກ 70 ປີ ວັນສະຖາປະນາຂອງ ສປປ ລາວ ຄົບຮອບ 50 ປີ ແລະ ວັນເກີດຂອງປະທານ ໄກສອນ ພົມວິຫານ ຄົບຮອບ 105 ປີ.
ໃນການຈັດງານການແຂ່ງຂັນຄັ້ງນີ້ ເປັນການເປີດກວ້າງໃນຂອບເຂດທົ່ວປະເທດໃຫ້ສາມາດເຂົ້າຮ່ວມ ເຊິ່ງມີທີມເຂົ້າຮ່ວມແຂ່ງຂັນໃນຄັ້ງນີ້ຈໍານວນ 11 ທີມ ຈຸດປະສົງແມ່ນເພື່ອສົ່ງເສີມ ແລະ ພັດທະນາບຸກຄະລະກອນໄວໜຸ່ມ ນັກຮຽນນັກສຶກສາຜູ້ທີ່ສົນໃຈເຂົ້າຮ່ວມແຂ່ງຂັນດ້ານທັກສະທາງດ້ານຄວາມປອດໄພໄຊເບີ ພ້ອມນັ້ນກໍ່ຍັງເປັນການສ້າງຄວາມຮ່ວມມື ລະຫວ່າງ ກະຊວງ ເຕັກໂນໂລຊີ ແລະ ການສື່ສານ ກໍ່ຄື ກົມຄວາມປອດໄພໄຊເບີ ແລະ ບໍລິສັດໄຊເບີຣັດ ລວມທັງເປັນການສົ່ງເສີມການສ້າງ ແລະ ແລກປ່ຽນຄວາມຮູ້ໃຫ້ຜູ້ເຂົ້າຮ່ວມທັງໝົດ ໄດ້ເຂົ້າໃຈກ່ຽວກັບ ການປົກປ້ອງ ການຄົ້ນຫາຂໍ້ມູນ ແລະ ການຕອບໂຕ້ກັບໄພຄຸກຄາມທາງໄຊເບີ ແລະ ໃຫ້ເຫັນເຖິງຄວາມສໍາຄັນໃນວຽກງານການຮັກສາຄວາມປອດໄພໄຊເບີ ໃຫ້ຫຼາຍຂຶ້ນ.
