ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 30 ມີນາ ຜ່ານມາ, ອົງການອະນາໄມໂລກ (WHO) ຕີລາຄາວ່າ ເຫດການແຜ່ນດິນໄຫວຢູ່ ມຽນມາ ແມ່ນສະພາວະສຸກເສີນຢູ່ລະດັບສູງສຸດ, ພ້ອມກັນນັ້ນ, ຮຽກຮ້ອງການອຸປະຖຳໂດຍດ່ວນ ຈຳນວນເງິນ 8 ລ້ານໂດລາ ເພື່ອຊ່ວຍເຫຼືອປະຊາຊົນ ແລະ ສະກັດກັ້ນພະຍາດແຜ່ລະບາດຢູ່ ມຽນມາ ໃນເວລາ 30 ວັນ ທີ່ຈະມາເຖິງ.
ຂ່າວລະບຸວ່າ: WHO ແຈ້ງໃຫ້ຊາບວ່າ ເຄື່ອງອຸປະກອນສຸກເສີນ ເພື່ອປິ່ນປົວຜູ້ເຈັບໜັກ, ພ້ອມກັບຕູບງວດທຳອິດໄດ້ສົ່ງເຖິງໂຮງໝໍຢູ່ນະຄອນຫຼວງເນປີດໍ ຈຳນວນ 1,000 ຕຽງ. ບັນດາເຄື່ອງອຸປະກອນທີ່ຄ້າຍຄືກັນກໍພວມຂົນສົ່ງໄປໂຮງໝໍຫຼາຍຂະແໜງ ໃນມານດາເລ (Mandalay) ທາງທິດເໜືອ.
ໃນວັນດຽວກັນ, ສະພາກາແດງ ແລະ ຊີກວົງເດືອນແດງສາກົນ (IFRC) ໄດ້ຮຽກຮ້ອງດ່ວນເພື່ອແນໃສ່ລະດົມເງິນຈຳນວນ 115 ລ້ານກວ່າໂດລາ ຊ່ວຍເຫຼືອ 100.000 ຄົນ (20.000 ຄອບຄົວ) ມຽນມາ ຜ່ານບັນດາມາດຕະການກູ້ໄພກູ້ຊີບ ແລະ ຊ່ວຍເຫຼືອການຟື້ນຟູໂດຍໄວພາຍໃນເວລາ 24 ເດືອນຈະມາເຖິງ.
ມາຮອດປັດຈຸບັນ, ເຫດແຜ່ນດິນໄຫວທີ່ມີຄວາມແຮງ 7,7 ຣິກເຕີ ເກີດຂຶ້ນໃນວັນທີ 28 ມີນາ ຜ່ານມາ ຢູ່ ມຽນມາ, ໄດ້ເຮັດໃຫ້ມີຜູ້ເສຍຊີວິດ 1.700 ຄົນ, ປະມານ 3.400 ຄົນ ໄດ້ຮັບບາດເຈັບ ແລະ ມີຜູ້ຫາຍສາບສູນປະມານ 300 ຄົນ.
