ວັນທີ 22 ມີນາ 2025 ລັດຖະບານ ເເຫ່ງ ສປປ ລາວ ແລະ ອົງການຢູນິເຊັບ, ໂດຍການສະໜັບສະໜູນຈາກລັດຖະບານອົດສະຕຣາລີ, ໄດ້ສະເຫຼີມສະຫຼອງວັນນ້ຳໂລກ ໂດຍການສະໜອງລະບົບນ້ຳສະອາດທີ່ສ້າງສຳເລັດໃໝ່ໃນຊຸມຊົນຫ່າງໄກສອກຫຼີກຂອງ ແຂວງຫົວພັນ ແລະ ແຂວງຜົ້ງສາລີ.
ໃນໄລຍະ 2 ປີຜ່ານມາ, ແຜນງານນ້ຳສະອາດ, ສຸຂາພິບານ ແລະ ອະນາໄມທີ່ທົນທານຕໍ່ການປ່ຽນແປງດິນຟ້າອາກາດໂດຍການສະໜັບສະໜູນຈາກລັດຖະບານອົດສະຕຣາລີ ໄດ້ຊ່ວຍກໍ່ສ້າງລະບົບນໍ້າລິນ 28 ແຫ່ງ, ສະໜອງສິ່ງອໍານວຍຄວາມສະດວກໃຫ້ ໂຮງຮຽນ 29 ແຫ່ງ ແລະ ສຸກສາລາ 6 ແຫ່ງ. ການຊ່ວຍເຫຼືອ ໄດ້ສະໜອງນ້ຳທີ່ປອດໄພໃຫ້ແກ່ປະຊາຊົນຫຼາຍກວ່າ 12,000 ຄົນ ໂດຍການຮ່ວມມືກັບ ສູນນໍ້າສະອາດ ແລະ ອະນາໄມສິ່ງແວດລ້ອມ, ກະຊວງສາທາລະນະສຸກ.
“ລະບົບນໍ້າສະອາດໃໝ່ເຫຼົ່ານີ້ຈະຊ່ວຍສ້າງຄວາມເຂັ້ມແຂງໃຫ້ແກ່ວຽກສາທາລະນະສຸກ, ໂດຍສະເພາະແມ່ນ ສຸຂະພາບຂອງເດັກນ້ອຍໃນພື້ນທີ່ຫ່າງໄກສອກຫຼີກ,” ທ່ານ ແສງເພັດ ແກ້ວມະນີ, ຜູ້ອຳນວຍການສູນນ້ຳສະອາດ ແລະ ອະນາໄມສິ່ງແວດລ້ອມ. “ວຽກງງານເຫຼົ່ານີ້ເປັນບາດກ້າວທີ່ສຳຄັນໃນການບັນລຸເປົ້າໝາຍແຫ່ງຊາດຂອງພວກເຮົາໃນການໃຫ້ ປະຊາຊົນ ທຸກຄົນໄດ້ເຂົ້າເຖິງນ້ຳສະອາດ ແລະ ສຸຂາພິບານ.”
“ການເພີ່ມການເຂົ້າເຖິງນໍ້າທີ່ສະອາດ ແລະ ປອດໄພ ເປັນສິ່ງສໍາຄັນສໍາລັບປັບປຸງສຸຂະພາບ ແລະ ການຢູ່ດີກິນດີຂອງແຕ່ລະຄົນ. ການຊ່ວຍເຫຼືອຂອງພວກເຮົາແມ່ນສຸມໃສ່ ຊ່ວຍເຫຼືອຊຸມຊົນເຂດຫ່າງໄກຊອກຫຼີກ ໃຫ້ເຂົ້າເຖິງລະບົບນໍ້າທີ່ທົນທານຕໍ່ການປ່ຽນແປງດິນຟ້າອາກາດ ເຊິ່ງເນັ້ນໃຫ້ເຫັນຄວາມມຸ້ງໝັ້ນຂອງພວກເຮົາ ໃນການສົ່ງເສີມສ້າງຄວາມເຂັ້ມແຂງຕໍ່ບັນຫາການປ່ຽນແປງດິນຟ້າອາກາດ, ສົ່ງເສີມການຂະຫຍາຍຕົວທີ່ມີຄວາມເທົ່າທຽມກັນ ແລະ ການພັດທະນາທີ່ຍືນຍົງໃນປະເທດລາວ” ກ່າວໂດຍ ທ່ານ ນາງ ເມແກນ ໂຈນສ, ທູດອົດສະຕຣາລີ ປະຈໍາ ສປປ ລາວ.
ລະບົບນ້ຳສະອາດໃໝ່ເຫຼົ່ານີ້ ຖືກອອກແບບມາ ໃຫ້ທົນທານກັບການປ່ຽນແປງດິນຟ້າອາກາດ ແມ່ນສາມາດທົນທານ ຕໍ່ການປ່ຽນແປງໃນລະດູການຕ່າງໆ, ໃນຂະນະທີ່ສ້າງຄວາມເຂັ້ມແຂງ ໃຫ້ແກ່ຊຸມຊົນ ທ້ອງຖິ່ນໃນການບໍາລຸງຮັກສາ ແລະ ຄຸ້ມຄອງລະບົບນ້ຳສະອາດ ແລະ ສຸຂາພິບານຂອງຕົນ.
ອົງການຢູນິເຊັບ ຍັງໄດ້ເນັ້ນໜັກເຖິງຄວາມສຳຄັນຂອງການຜັນຂະຫຍາຍການເຂົ້າເຖິງນ້ຳສະອາດ. “ການຮັບປະກັນວ່າ ບໍ່ມີເດັກນ້ອຍຄົນໃດຖືກປ່ອຍປະໄວ້ຂ້າງຫຼັງແມ່ນບຸລິມະສິດທີ່ສຳຄັນທີ່ສຸດຂອງອົງການພວກເຮົາ,” ກ່າວໂດຍ ທ່ານ ບິລານ ອູຣັງ ເຊບ ດູຣານີ, ຜູ້ຕາງໜ້າ ອົງການຢູນິເຊັບປະຈຳ ສປປ ລາວ. “ຜ່ານການຮ່ວມມືນີ້, ພວກເຮົາຈະສາມາດນຳເອົາວິທີການເເກ້ໄຂບັນຫາຕ່າງໆເເບບຍືນຍົງ ແລະ ສະໜອງການບໍລິການທີ່ສຳຄັນ ໃຫ້ເເກ່ຊຸມຊົນໃນເຂດຫ່າງໄກສອກຫຼີກທີ່ສຸດ.”
ໂດຍການສະໜັບສະໜູນຈາກລັດຖະບານອົດສະຕາລີ, ວຽກງານດັ່ງກ່າວ ກໍາລັງຖືກຜັນຂະຫຍາຍໄປຍັງອີກ 2 ແຂວງ ພາກເໜືອຄື ແຂວງອຸດົມໄຊ ແລະ ແຂວງຫຼວງນ້ຳທາ. ຢູ່ແຂວງຫຼວງນໍ້າທາ ໂດຍການຮ່ວມມືກັບ ນ້ຳປະປາ ແລະ World Waternet, ອົງການຢູນິເຊັບ ຈະສະໜັບສະໜູນ ການກໍ່ສ້າງລະບົບບຳບັດນ້ຳຂະໜາດນ້ອຍທີ່ທົນທານຕໍ່ການປ່ຽນແປງດິນຟ້າອາກາດ ເພື່ອສະໜອງນ້ຳດື່ມທີ່ສະອາດໃຫ້ແກ່ປະຊາຊົນເກຶອບ 2,000 ຄົນ.
ການຮັບປະກັນດ້ານນໍ້າທີ່ພຽງພໍ ແມ່ນພື້ນຖານທີ່ສຳຄັນຕໍ່ສຸຂະພາບ ແລະ ຄວາມທົນທານຕໍ່ການປ່ຽນແປງດິນຟ້າອາກາດ ຂອງເດັກນ້ອຍ ແລະ ຄອບຄົວ. ແຕ່ປະຊາຊົນຫນຶ່ງລ້ານຄົນໃນ ສປປ ລາວ, ສ່ວນໃຫຍ່ໃນຄອບຄົວ ທີ່ທຸກຍາກທີ່ສຸດ ຍັງບໍ່ສາມາດເຂົ້າເຖິງການບໍລິການນ້ຳຂັ້ນພື້ນຖານ, ເຊີ່ງພວກເຂົາເຈົ້າຍັງໄດ້ຮັບຜົນກະທົບຕື່ມຈາກ ການປ່ຽນແປງດິນຟ້າອາກາດ.
ວັນນ້ຳໂລກ ເເມ່ນສະເຫຼີມສະຫຼອງທົ່ວໂລກທຸກໆ ວັນທີ 22 ມີນາ ເເລະ ເນັ້ນໜັກເຖິງຄວາມສຳພັນລະຫວ່າງການຮັບປະກັນດ້ານນໍ້າ ແລະ ການພັດທະນາແບບຍືນຍົງ. ອົງການຢູນິເຊັບ ແລະ ຄູ່ຮ່ວມພັດທະນາກຳລັງ ໃຫ້ການຊ່ວຍເຫຼືອ ສະໜອງນ້ຳສະອາດໃຫ້ຜູ້ທີ່ຕ້ອງການຫຼາຍທີ່ສຸດ – ສະໜັບສະໜູນເປົ້າໝາຍຂອງ ສປປ ລາວ ໃນການ ສະໜອງນ້ຳສະອາດຢ່າງຍືນຍົງໃຫ້ແກ່ທຸກຄົນ.
