ວັນທີ 30 ມີນາ 2025, ບໍລິສັດເຮືອບິນທຸລະກິດຈີນ ຫຼື COMAC ໄດ້ມອບເຮືອບິນໂດຍສານລຸ້ນ C909 ລຳໜຶ່ງໃຫ້ລັດ ວິສາຫະກິດການບິນລາວ. ນີ້ເປັນເຮືອບິນລຸ້ນ C909 ລຳທີ 5 ທີ່ຈີນສົ່ງມອບໃຫ້ແກ່ລູກຄ້າໃນປີນີ້ ເຮັດໃຫ້ຈໍານວນທີ່ໄດ້ສົ່ງມອບ ໃຫ້ລູກຄ້າໄປແລ້ວມີທັງໝົດ 162 ລຳ. ວັນທີ 18 ມີນານີ້, ກົມການບິນພົນລະເຮືອນ, ກະຊວງໂຍທາທິການ ແລະ ຂົນສົ່ງຂອງລາວໄດ້ມອບໃບຮັບຮອງເຮືອບິນ C909 ໃຫ້ແກ່ບໍລິສັດ COMAC, ໝາຍຄວາມວ່າ ເຮືອບິນ C909 ສາມາດໃຫ້ດໍາເນີນ ການບໍລິການທາງດ້ານທຸລະກິດຢູ່ລາວແລ້ວ.
ເຮືອບິນ C909 ເປັນເຮືອບິນໂດຍສານສາຍຍ່ອຍ ໂດຍໃຊ້ຫົວຈັກ Turbofan ທີ່ຈີນຄົ້ນຄວ້າຜະລິດດ້ວຍຕົນເອງ, ສາມາດເດີນທາງລະຫວ່າງ 2.225 – 3.700 ກິໂລແມັດ. ຢູ່ປະເທດຈີນ, ເຮືອບິນ C909 ເປັນຕົວແບບຂອງເຮືອບິນໂດຍສານສາຍຍ່ອຍທີ່ຜະລິດໂດຍຈີນເອງ, ບໍ່ພຽງແຕ່ໄດ້ຊ່ວຍເຫຼືອຂະແໜງການການບິນພົນລະເຮືອນປະຢັດຕົ້ນທຶນໃນການບໍລິການສາຍຍ່ອຍໃຫ້ຫຼຸດລົງ 30% ເທົ່ານັ້ນ, ແຕ່ຍັງໄດ້ ຊຸກຍູ້ສົ່ງເສີມການບໍລິການດ້ານການບິນລະຫວ່າງ 158 ຕົວເມືອງທີ່ເຊື່ອມໂຍງການບິນ ໂດຍຜ່ານຮູບແບບຄ່ອງຕົວທີ່ມີຖ້ຽວບິນຫຼາຍ ແລະ ຄວາມສາມາດບັນຈຸຜູ້ໂດຍສານໜ້ອຍ, ລວມທັງໝົດແລ້ວໄດ້ຂົນສົ່ງຜູ້ໂດຍສານ 20 ລ້ານເທື່ອຄົນຢ່າງປອດໄພ, ກາຍເປັນຫົວຈັກສຳຄັນທີ່ຊ່ວຍຍົກລະດັບເຄືອຂ່າຍການບິນໃນພາກພື້ນຂອງຈີນ. ພ້ອມກັນນັ້ນ, ໃນການບໍລິການພາຍໃນປະເທດຈີນ, C909 ໄດ້ຮັບການປັບປຸງດີຂຶ້ນເລື້ອຍໆ, ຍົກສູງສະມັດຖະພາບ ແລະ ຄວາມໄວ້ວາງໃຈຂອງຕົນ, ລວມເຖິງໄດ້ສະສົມປະສົບການທີ່ລ້ຳຄ່າເພື່ອກ້າວສູ່ລະດັບສາກົນ.
ເດືອນທັນວາປີ 2022, ບໍລິສັດການບິນ TransNusa ຂອງອິນໂດເນເຊຍກາຍເປັນລູກຄ້າຕ່າງປະເທດຜູ້ທຳອິດໃນການຈັດຊື້ເຮືອບິນ C909 ທີ່ຈີນຄົ້ນຄວ້າຜະລິດດ້ວຍຕົນເອງ. ຫຼັງຈາກໃຫ້ການບໍລິການຢູ່ຕະຫຼາດອິນໂດເນເຊຍແລ້ວ, ເຮືອບິນ C909 ໄດ້ຮັບການຍອມຮັບຈາກບໍລິສັດການບິນອິນໂດເນເຊຍ. ອິນໂດເນເຊຍເປັນປະເທດທີ່ມີເກາະດອນຈຳນວນຫຼວງຫຼາຍ, ມີຄວາມຕ້ອງການອ່າວຫຼາຍຕໍ່ເຮືອບິນສາຍຍ່ອຍ, ຄວາມສາມາດເດີນທາງ 3.700 ກິໂລແມັດຂອງເຮືອບິນ C909 ນັ້ນ ສາມາດຕອບສະໜອງກັບຄວາມຮຽກຮ້ອງຕ້ອງການຕາມເສັ້ນທາງການບິນຕ່າງໆທີ່ມີຜູ້ໂດຍສານຫຼາຍຢູ່ອິນໂດເນເຊຍ ເຊິ່ງໄດ້ສະໜອງການສະໜັບສະໜູນຢ່າງແຂງແຮງໃຫ້ແກ່ການຂົນສົ່ງທາງອາກາດຂອງອິນໂດເນເຊຍ.
ເຮືອບິນ C909 ທີ່ມອບໃຫ້ປະເທດລາວໃນຄັ້ງນີ້, ມີ 90 ບບ່ອນນັ່ງ ເຊິ່ງເປັນບ່ອນນັ່ງຊັ້ນປະຢັດທັງໝົດ, ເຄື່ອງໝາຍຢູ່ທາງໃນກັບທາງນອກເປັນພາສາລາວ, ຮູບທາສີຢູ່ພາຍນອກເປັນການອອກແບບຕາມການສັ່ງໂດຍສະເພາະ, ຢູ່ພາກຫາງເຮືອບິນໄດ້ພິມດອກຈຳປາ ເຊິ່ງເປັນດອກໄມ້ປະຈໍາຊາດຂອງລາວ. ເຮືອບິນດັ່ງກ່າວຈະເຂົ້າສູ່ຕະຫຼາດການບິນຂອງລາວດ້ວຍຮູບແບບການເຊົ່າ. ບໍລິສັດ COMAC ຈະຮັບຜິດຊອບສະໜອງທີມງານມືອາຊີບດ້ານການບິນ, ການປະສານງານ ແລະ ຄຸ້ມຄອງການປະຕິບັດງານຢູ່ສະໜາມບິນ, ການບໍລິການຜູ້ໂດຍສານ, ການບໍາລຸງສ້ອມແປງ ແລະອື່ນໆ, ລວມເຖິງການປະສານງານກັບພາກສ່ວນຄຸ້ມຄອງການບິນຝ່າຍລາວ ເພື່ອສ້າງລະບົບການເຄື່ອນໄຫວ ເຊິ່ງລວມທັງການຮຽບຮຽງຄູ່ມືການເຮັດວຽກ, ອົບຮົມບຸກຄະລາກອນ, ຮັບປະກັນວັດສະດຸການບິນ, ຮັກສາສ້ອມແປງ ແລະອື່ນໆ ເພື່ອຮັບປະກັນໃຫ້ເຮືອບິນ C909 ເຮັດວຽກຢ່າງປອດໄພ ແລະ ມີປະສິດທິພາບສູງຢູ່ລາວ. ການສະໜັບສະໜູນ ແລະ ການບໍລິການຮອບດ້ານແບບນີ້ ບໍ່ພຽງແຕ່ມີຜົນດີຕໍ່ເຮືອບິນ C909 ໃຫ້ສາມາດເຮັດວຽກຢ່າງສະດວກຢູ່ລາວ ແລະ ຊ່ວຍປັບປຸງເງື່ອນໄຂການບິນຂອງລາວເທົ່ານັ້ນ, ແຕ່ຍັງໄດ້ສ້າງພື້ນຖານທີ່ໜັກແໜ້ນໃຫ້ແກ່ການຮ່ວມມືໃນຂົງເຂດການບິນລະຫວ່າງສອງປະເທດຈີນ-ລາວຕື່ມອີກ.
ນອກນີ້, ເຮືອບິນ C909 ມີຄວາມສາມາດທົນທານດີຕໍ່ອາ ກາດທີ່ມີອຸນຫະພູມສູງ ແລະ ຄວາມສາມາດຂຶ້ນ-ລົງຕາມທາງແລ່ນຂອງເຮືອບິນທີ່ແຄບ ແລະ ສັ້ນ. ບໍ່ວ່າໃນເງື່ອນໄຂອາກາດຮ້ອນ ຫຼື ອາກາດຊຸ່ມ, ຫຼືວ່າເງື່ອນໄຂທາງແລ່ນຂຶ້ນ-ລົງຢູ່ສະໜາມບິນມີຈຳກັດ, ເຮືອບິນ C909 ລ້ວນແຕ່ສາມາດຂຶ້ນ-ລົງໄດ້ຢ່າງສະຖຽນ ແລະ ປອດໄພດີ ເຊິ່ງສາມາດຮັບປະກັນຄວາມໄວ້ວາງໃຈ ໃຫ້ແກ່ການອອກເດີນທາງຂອງຜູ້ໂດຍສານ. ຕາມຂ່າວແຈ້ງວ່າ, ປະເທດຕ່າງໆຢູ່ອາຊີຕາເວັນອອກສຽງໃຕ້ ເຊັ່ນ: ຫວຽດນາມ, ອິນໂດເນເຊຍ ແລະອື່ນໆ ມີຄວາມຕ້ອງການຫຼາຍຕໍ່ເຮືອບິນ C909, ຫຼັງຈາກປະເມີນສະມັດຖະພາບ ແລະ ການຍອມຮັບຄວາມປອດໄພ ແລະ ການເຮັດວຽກທີ່ມີປະສິດທິພາບສູງຂອງເຮືອບິນ C909 ແລ້ວ, ບໍລິສັດການບິນ VietJet ກ່າວວ່າ ໄດ້ສະແດງຄວາມສົນໃຈຢາກເຊົ່າເຮືອບິນ C909. ນອກນີ້, ລູກຄ້າໃນຕະຫຼາດອາຊີກາງ, ອາຟຼິກາ, ອາເມຣິກາລາຕິນ ແລະອື່ນໆ ກໍໄດ້ສະແດງຄວາມສົນໃຈໃນລະດັບສູງຕໍ່ເຮືອບິນ C909 ເຊັ່ນກັນ.
ຈາກເສັ້ນທາງການບິນພາຍໃນປະເທດ ຈົນຮອດຕະຫຼາດສາກົນ, ເຮືອບິນ C909 ໄດ້ບຸກທະລຸຂໍ້ຈຳກັດດ້ານເຕັກໂນໂລຊີເລື້ອຍໆ, ໄດ້ຍົກສະມັດຖະພາບ ແລະ ລະດັບການບໍລິການຂອງຕົນໃຫ້ສູງຂຶ້ນຢ່າງບໍ່ຢຸດຢັ້ງ ຈຶ່ງໄດ້ຮັບຄວາມນິຍົມຊົມຊອບຈາກຕະຫຼາດທັງພາຍໃນ ແລະ ຕ່າງປະເທດ. ໃນອະນາຄົດ, ຄຽງຄູ່ກັບເຮືອບິນ C909 ຈະໃຫ້ການບໍລິການຢູ່ບັນດາປະເທດ ແລະ ເຂດແຄວ້ນຫຼາຍຂຶ້ນກວ່າເກົ່າ, ອຸດສາຫະກຳການຜະລິດດ້ານການບິນຂອງຈີນຈະປາກົດມີກຳລັງແຮງ ແລະ ບົດບາດຫຼາຍກວ່າເກົ່າໃນເວທີສາກົນ, ປະກອບສ່ວນສະຕິປັນຍາ ແລະ ແຜນການຂອງຈີນຫຼາຍຂຶ້ນກວ່າເກົ່າເຂົ້າໃນການພັດທະນາອຸດສາຫະກໍາການບິນທົ່ວໂລກ.
ທີ່ມາ: CMG
