ວິທະຍຸສາກົນ ແຫ່ງ ສປ ຈີນ, ກອງປະຊຸມເວທີປຶກສາຫາລືອາຊີໂປອາວ ປະຈຳປີ2025 ໄດ້ໄຂຂຶ້ນໃນວັນທີ 25 ມີນານີ້ ຢູ່ເມືອງໂປອາວ ແຂວງໄຫຫລຳຈີນ. ໃນກອງປະຊຸມປະຈຳປີ ທີ່ຈະດຳເນີນ ເປັນເວລາ4ວັນ, ແຂກຖືກເຊີນ ທີ່ມາຈາກ ທັງພາຍໃນ ປະເທດຈີນ ແລະ 60 ກວ່າປະເທດ ແລະ ເຂດແຄວ້ນ ເກືອບ 2.000 ຄົນ ຈະລົງເລິກ ຄົ້ນຄວ້າ ປຶກສາຫາລື ພາຍໃຕ້ ຫົວຂໍ້ຫລັກວ່າ “ຮ່ວມກັນສ້າງ ອະນາຄົດ ຂອງອາຊີ ໃນສະພາບການ ປ່ຽນແປງ ຂອງໂລກ”.ກອງປະຊຸມ ເວທີປຶກສາຫາລື ອາຊີ ໂປອາວ ປະຈຳປີ2025 ໄດ້ຈັດພິທີ ຖະແຫລງຂ່າວ ຄັ້ງທຳອິດ. ຈາກນັ້ນ ທ່ານ ຈ່າງຈວິ່ນ, ເລຂາ ທິການໃຫຍ່ ເວທີປຶກສາ ຫາລື ອາຊີ ໂປອາວ ໄດ້ແຈ້ງສະພາບການ ກ່ຽວກັບ ກອງປະຊຸມຄັ້ງນີ້ ພ້ອມທັງ ກ່າວຢືນຢັນວ່າ: ກອງປະຊຸມ ປະຈຳປີ ຄັ້ງນີ້ ຈະສາມາດ ສົ່ງສັນຍານ ອັນຈະແຈ້ງຕໍ່ ປະຊາຄົມໂລກ ກ່ຽວກັບ ການຮັກສາ ຄວາມໝັ້ນໃຈ, ສາມັກຄີ ຮ່ວມມືກັນ, ຜ່ານຜ່າ ຄວາມຫຍຸ້ງຍາກ ແລະ ສ້າງອະນາຄົດ.ໃນພິທີ ຖະແຫລງຂ່າວ ຍັງໄດ້ເຜີຍແຜ່ ບົດລາຍງານ ສຳຄັນ 2 ສະບັບຄື: ບົດລາຍງານປະຈຳປີ2025 ກ່ຽວກັບ ວິໄສທັດ ເສດຖະກິດ ອາຊີ ແລະ ຂະບວນການ ເຊື່ອມໂຍງ ເຂົ້າເປັນ ອັນໜຶ່ງ ອັນດຽວກັນ ແລະ ບົດລາຍງານ ປະຈຳປີ2025 ກ່ຽວກັບອາຊີ ຊຸກຍູ້ ການພັດທະນາ ຕາມທິດສີຂຽວ ເພື່ອຮັບມືກັບ ການປ່ຽນແປງ ຂອງດິນຟ້າອາກາດ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
