ວັນທີ 17 ກຸມພາ 2025, ຫ້ອງຕໍາຫຼວດ ປກສ ແຂວງ ບໍ່ແກ້ວ ໄດ້ຮັບຂ່າວຈາກພົນລະເມືອງດີວ່າ ຈະມີການຂົນສົ່ງຢາເສບຕິດມາແຕ່ທາງ ເມືອງເມິງ ຜ່ານບ້ານລອງພະບາດ ແລະ ຈະເຂົ້າມາທາງ ບ້ານນໍ້າຍອນ ເມືອງຫ້ວຍຊາຍ ແຂວງ ບໍ່ແກ້ວ, ເມື່ອໄດ້ຮັບແຫຼ່ງຂ່າວທາງຫອ້ງຕໍາຫຼວດ ຈຶ່ງໄດ້ມອບໃຫ້ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ສົມທົບກັບເຈົ້າໜ້າທີຕຳຫຼວດຈະລາຈອນແຂວງນຳກຳລັງໄປສົມທົບກັບ ປກສ ກຸ່ມບ້ານນໍ້າຍອນ ເພື່ອຕັ້ງຈຸດກວດກາຕາມແຫຼ່ງຂ່າວ.
ໃນເວລາປະມານ 17 ໂມງ 00 ນາທີ ໄດ້ວາງກໍາລັງເພືອສະກັດ ພໍມາຮອດເວລາປະມານ 20 ໂມງ ໄດ້ເຫັນລົດກະບະລິໂວ ຈຳນວນ 03 ຄັນ ແລ່ນສວນມາ ແລະ ມີລົດຈັກ ຈຳນວນ 01 ຄັນ ມາກ່ອນ ເມືອເຫັນເຈົ້າໜ້າທີ່ເປົ້າໝາຍທັງ 03 ຄັນ ໄດ້ຕ່າວກັບຄືນໄປທາງ ເມືອງເມິງ ດັ່ງນັ້ນເຈົ້າໜ້າທີ່ໄດ້ໄລ່ຕິດຕາມເນືອງຈາກສະພາບເສັ້ນທາງມີຄວາມມືດແລະເປັນເສັ້ນທາງກັນດານເຮັດໃຫ້ຕິດຕາມບໍ່ທັນຈຶງໄດ້ປະສານໃຫ້ແຕ່ລະຈຸດສະກັດເສັ້ນທາງລົບໜີ ແລະ ໄດ້ຄົ້ນຫາພາກສວນດັ່ງກ່າວ.
ຈົນຮອດເວລາປະມານ 23ໂມງ 20 ນາທີ ຈຶ່ງໄດ້ພົບເຫັນລົດເປົ້າໝາຍ ຈຳນວນ 01 ຄັນ ຈອດຊຸກເຊື່ອງໄວ້ຢູ່ໃນທາງນ້ອຍແຍກແຕ່ບໍ່ເຫັນຄົນຢູ່ໃນລົດ ຜ່ານການກວດກາຈຶ່ງໄດ້ເຫັນວັດຖູທີຕອ້ງສົ່ງໃສ່ຢູ່ກະບະລົດ ແລະ ຢູ່ໃນລົດອີກຈຳນວນໜຶ່ງ.
ຈາກນັ້ນ ຈຶ່ງໄດ້ນໍາລົດຄັນດັ່ງກ່າວມາກວດກາຕົວຈິງຢູ່ ກອງບັນຊາການ ປກສ ແຂວງບໍ່ແກ້ວ ໂດຍສົມທົບກັບອົງການໄອຍະການ ຮ່ວມກັນກວດສອບໄດ້ພົບເຫັນຢາເສບຕິດ ປະເພດຢາໄອສ ຈຳນວນ 770 ຫໍ່ ນໍ້າໜັກ 770 ກິໂລກຼາມ.ປະຈຸບັນທາງເຈົ້າໜ້າທີ່ ປກສ ແຂວງບໍ່ແກ້ວ ພວມດຳເນີນ ການສຶບສວນ-ສອບສວນຊອກຫາເພຶ່ອນໍາເອົາຕົວພວກກ່ຽວມາດຳເນີນຄະດີຕາມລະບຽບກົດໝາຍ.
ທີ່ມາ: ປກສ ແຂວງບໍ່ແກ້ວ
