ວັນທີ 30 ມັງກອນ 2025 ນີ້ ກະຊວງສາທາລະນະສຸກ ໄດ້ເປີດຂະບວນການທົດລອງ ນຳໃຊ້ລະບົບສົ່ງຂໍ້ຄວາມແຈ້ງເຕືອນຜູ້ປົກຄອງ ໃຫ້ພາລູກຫລານ ທີ່ອາຍຸໄດ້ 1 ປີເຕັມ ມາຮັບວັກຊີນກັນພະຍາດ ເຊິ່ງຂະບວນການດັ່ງກ່າວ, ຈະດຳເນີນເປັນໄລຍະເວລາ 1 ປີ ໂດຍໄດ້ຮັບການສະໜັບສະໜູນຈາກອົງການອະນາໄມໂລກ, ລັດຖະບານອົດສະຕຣາລີ ແລະ ອົງການກາວີ ພັນທະມິດວັກຊີນ ເຊິ່ງມີເປົ້າໝາຍໃນການເພີ່ມອັດຕາການສັກວັກຊີນປ້ອງກັນພະຍາດໝາກແດງໃຫຍ່-ໝາກແດງນ້ອຍ ແລະ ໂປລີໂອ ໂດຍການສົ່ງຂໍ້ຄວາມເຕືອນຜູ້ປົກຄອງຜ່ານທາງໂທລະສັບມືຖື ຂອງເຂົາເຈົ້າໂດຍກົງ.
ຂະບວນການ ດັ່ງກ່າວ, ແມ່ນນຳພາໂດຍໂຄງການສັກຢາກັນພະຍາດແຫ່ງຊາດ ຮ່ວມກັບ ສູນສະຖິຕິ ແລະ ຂ່າວສານສາທາລະນະສຸກ, ກະຊວງສາທາລະນະສຸກ ເຊິ່ງການສົ່ງຂໍ້ຄວາມແຈ້ງເຕືອນດັ່ງກ່າວ, ແມ່ນອີງໃສ່ຂໍ້ມູນຈາກລະບົບບັນທຶກການຮັບວັກຊີນກັນພະຍາດລາຍບຸກຄົນ (EIR) ເຊິ່ງເປັນຖານຂໍ້ມູນ ກ່ຽວກັບວຽກງານການຮັບວັກຊີນທົ່ວປະເທດ ທີ່ໄດ້ລິເລີ່ມສ້າງຂຶ້ນ ໃນໄລຍະການແຜ່ລະບາດຂອງພະຍາດໂຄວິດ-19 ທີ່ຜ່ານມາ.
ໂອກາດນີ້, ທ່ານ ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ໃຫ້ຮູ້ວ່າ: ການເປີດຂະບວນການຄັ້ງນີ້, ມີການເຊື່ອມສານເຕັກໂນໂລຊີທັນສະໄໝເຂົ້າຊ່ວຍ, ແນໃສ່ເພີ່ມອັດຕາປົກຄຸມການໃຫ້ວັກຊີນກັນພະຍາດ ເພື່ອຮັບປະກັນວ່າ ເດັກໄດ້ຮັບປົກປ້ອງຈາກບັນດາພະຍາດອັນຕະລາຍທີ່ປ້ອງກັນໄດ້ດ້ວຍວັກຊີນ ເນື່ອງຈາກຜ່ານມາ ເຫັນວ່າອັດຕາການກັບມາຮັບວັກຊີນຫລຸດລົງເມື່ອເດັກອາຍຸຫລາຍຂຶ້ນ. ຂະບວນການນີ້, ເຖິງວ່າຈະເປັນພຽງບາດກ້າວທຳອິດ ແຕ່ຖືເປັນບາດກ້າວທີ່ໜັກແໜ້ນ ແລະ ຂໍສະແດງຊົມເຊີຍທີມງານທັງຈາກກະຊວງສາທາລະນະສຸກ ແລະ ບັນດາຄູ່ຮ່ວມພັດທະນາ ທີ່ເອົາໃຈໃສ່ ແລະ ສະໜັບສະໜູນວຽກງານອັນສຳຄັນນີ້. ຢ່າງໃດກໍ່ຕາມ ເດັກທີ່ອາຍຸໄດ້ 1 ປີເຕັມ ແມ່ນແນະນຳໃຫ້ສັກວັກຊີນ 2 ເຂັມ ກໍຄື ວັກຊີນປ້ອງກັນພະຍາດໝາກແດງໃຫຍ່-ໝາກແດງນ້ອຍ ເຂັມທີ 2 ແລະ ວັກຊີນປ້ອງກັນພະຍາດໂປລີໂອ ໂດສ໌ທີ 2.
ທ່ານ ນາງ ເມແກນ ຈອນສ໌ ເອກອັກຄະລັດຖະທູດ ແຫ່ງ ອົດສະຕຣາລີ ປະຈຳ ສປປ ລາວ ກ່າວວ່າ: ປະເທດອົດສະຕຣາລີ ມີຄວາມໝຸ້ງໝັ້ນໃນການສະໜັບສະໜູນ ສປປ ລາວ ໃນວຽກງານການຍົກສູງສຸຂະພາບ ແລະ ສົ່ງເສີມຊີວິດການເປັນຢູ່ທີ່ດີຂອງປະຊາຊົນລາວ. ຂະບວນການທົດລອງການສົ່ງຂໍ້ຄວາມແຈ້ງເຕືອນນີ້ ຖືເປັນຕົວຢ່າງທີ່ດີອັນໜຶ່ງຂອງການນຳໃຊ້ເຕັກໂນໂລຊີ ເພື່ອສົ່ງເສີມວຽກງານການສັກວັກຊີນ ແລະ ປົກປ້ອງເດັກຈາກບັນດາພະຍາດທີ່ອັນຕະລາຍ ເຊິ່ງສະທ້ອນໃຫ້ເຫັນເຖິງຄວາມເອົາໃຈໃສ່ຂອງ ສປປ ລາວ ໃນການຮັບປະກັນໃຫ້ເດັກທຸກຄົນເຕີບໃຫຍ່ມາມີສຸຂະພາບແຂງແຮງຕາມທີ່ສົມຄວນໄດ້ຮັບ. ຂະບວນການທົດລອງດັ່ງກ່າວ, ແມ່ນກວມເອົາເຂດຕົວເມືອງທົ່ວປະເທດ ເຊິ່ງຄາດວ່າຈະສາມາດສົ່ງຂໍ້ຄວາມແຈ້ງເຕືອນຜູ້ປົກຄອງຂອງເດັກທີ່ມີອາຍຸ 1 ປີ ໄດ້ເຖິງ 50.000 ຄົນ ໃນໄລຍະ 1 ປີຕໍ່ໜ້າ ໂດຍຈະສົ່ງຂໍ້ຄວາມແຈ້ງໃຫ້ບັນດາຜູ້ປົກຄອງທີ່ໄດ້ແຈ້ງເບີໂທລະສັບໄວ້ໃນຕອນທີ່ພາລູກຫລານມາຮັບວັກຊີນຄັ້ງທຳອິດ. ໃນຂະນະດຽວກັນ, ແພດໝໍທົ່ວປະເທດ ກໍຈະເກັບກຳເບີໂທລະສັບ ຂອງພໍ່ແມ່ຜູ້ປົກຄອງທີ່ພາເດັກມາສັກຢາເປັນເທື່ອທຳອິດ ເພື່ອບັນທຶກເຂົ້າໃນລະບົບບັນທຶກການໃຫ້ວັກຊີນກັນພະຍາດລາຍບຸກຄົນ.
ທ່ານ ທິມ ອາມສະຕຣອງ ຜູ້ຕາງໜ້າຈາກອົງການອະນາໄມໂລກ ໄດ້ມີຄຳເຫັນວ່າ: ອົງການອະນາໄມໂລກ ມີຄວາມພາກພູມໃຈທີ່ໄດ້ສະໜັບສະໜູນຂະບວນການທີ່ມີຄວາມປະດິດສ້າງນີ້, ຜ່ານມາ, ເຮົາໄດ້ເຫັນແລ້ວວ່າການສົ່ງຂໍ້ຄວາມແຈ້ງເຕືອນແບບນີ້ ມີຜົນດີຕໍ່ກັບການເພີ່ມອັດຕາປົກຄຸມການໃຫ້ວັກຊີນກັນພະຍາດ ເພາະເປັນການແຈ້ງເຕືອນພໍ່ແມ່ຜູ້ປົກຄອງທີ່ອາດຈະຄາວຽກ ຫລື ຍັງບໍ່ທັນເຂົ້າໃຈລະອຽດຕໍ່ຄຳແນະນຳຕ່າງໆ. ຖ້າຂະບວນການນີ້ ໄດ້ຮັບຜົນດີ, ຈະໄດ້ມີການຂະຫຍາຍການຈັດຕັ້ງປະຕິບັດ ໃຫ້ກວມເອົາການສັກວັກຊີນຊະນິດອື່ນ ແລະ ວຽກງານອື່ນໆອີກ.
ທ່ານ ບິລາລ ດູຣານີ ຜູ້ຕາງໜ້າອົງການຢູນິເຊັບ ປະຈຳ ສປປ ລາວ ກ່າວວ່າ: ຂະບວນການທົດລອງດັ່ງກ່າວ, ໄດ້ສະແດງໃຫ້ເຫັນວ່າ ການແຈ້ງເຕືອນແບບງ່າຍໆ ແລະ ທັນການ ສາມາດປິດຊ່ອງຫວ່າງໃນອັດຕາປົກຄຸມການສັກວັກຊີນກັນພະຍາດ ໂດຍການສະໜອງຂໍ້ມູນອັນຈຳເປັນໃຫ້ແກ່ບັນດາພໍ່ແມ່ຜູ້ປົກຄອງ ເພື່ອຮັບປະກັນໃຫ້ເດັກໄດ້ຮັບການປົກປ້ອງຈາກວັກຊີນຕາມທີ່ເດັກສົມຄວນໄດ້ຮັບ.
ການສ້າງລະບົບບັນທຶກການໃຫ້ວັກຊີນກັນພະຍາດລາຍບຸກຄົນ ເລີ່ມຕົົ້ນຂຶ້ນໃນປີ 2022 ໃນໄລຍະການແຜ່ລະບາດຂອງພະຍາດໂຄວິດ-19 ແລະ ໄດ້ເລີ່ມນຳໃຊ້ທົ່ວປະເທດໃນປີ 2024 ໂດຍການນຳພາຂອງກະຊວງສາທາລະນະສຸກ ແລະ ສະໜັບສະໜູນໂດຍອົງການອະນາໄມໂລກ, ອົງການຢູນິເຊັບ, ອົງການກາວີ ແລະ ລັດຖະບານຍີ່ປຸ່ນ. ປັດຈຸບັນ, ມີເດັກນ້ອຍ ຫລາຍກວ່າ 515.000 ຄົນ ທີ່ໄດ້ຮັບວັກຊີນ 1 ເຂັມຂຶ້ນໄປ ແລະ ໄດ້ມີຂໍ້ມູນລົງທະບຽນໃນລະບົບດັ່ງກ່າວ.
